នៅក្នុងយុគសម័យបច្ចុប្បន្ននេះ ការសិក្សាចាំបាច់ត្រូវតែមានភាពទូលំទូលាយ ព្រោះការធ្វើការងារ និងការប្រកួតប្រជែងកាន់តែមានលក្ខណៈធំទូលាយឡើងពី 1ថ្ងៃទៅ 1ថ្ងៃ។ ដោយមើលឃើញពីចំណុចនេះ ក្រុមហ៊ុន វេសឡាញ អេឌ្យូខេសិន គ្រុប បានបង្កើតគម្រោងសំខាន់មួយ ដែលអនុញ្ញាតឱ្យសិស្សក្នុងបណ្តាញសាលារៀនរបស់ខ្លួន បានបង្ហាញសមត្ថភាពតាមរយៈការសិក្សាស្រាវជ្រាវពីប្រទេសនានានៅក្នុងតំបន់អាស៊ាន។ 
លោក ពូន សារឿន នាយកសាលាវេសឡាញ សាខាសន្ធរម៉ុក បានលើកឡើងថា កម្មវិធីដ៏មានសារៈសំខាន់នេះមានឈ្មោះថា “ទិសដៅទេសចរណ៍ក្នុងតំបន់អាស៊ាន” ដែលគោលបំណងសំខាន់នៃកម្មវិធីនេះ គឺជំរុញឱ្យសិស្សានុសិស្សចេះសិក្សាស្រាវជ្រាវ ធ្វើការងារជាក្រុម បង្កើនភាពជាអ្នកដឹកនាំ និងស្វែងយល់ពីវប្បធម៌ និងការរស់នៅរបស់ប្រជាជនក្នុងតំបន់ឱ្យកាន់តែទូលំទូលាយ។ កម្មវិធីនេះតម្រូវឱ្យសិស្សស្រាវជ្រាវតាមរយៈបច្ចេកវិទ្យាពីប្រទេសនីមួយៗក្នុងតំបន់អាស៊ានឱ្យបានច្បាស់លាស់ ទាំងវប្បធម៌ ការស្លៀកពាក់ ទំនៀមទម្លាប់ សិល្បៈរបាំ ទីតាំងភូមិសាស្ត្រ និងសេដ្ឋកិច្ចជាដើម ដោយមានការជួយតម្រង់ទិសណែនាំពីគ្រូបង្រៀនបន្ថែម។ បន្ទាប់ពីបានស្រាវជ្រាវច្បាស់លាស់ហើយ សិស្សត្រូវសរសេរជាអត្ថបទខ្លីៗ និងត្រៀមរៀបចំសម្ភារ ដើម្បីបង្ហាញនៅក្នុងកម្មវិធីជួបជុំធំមួយនៅថ្ងៃទី25ធ្នូ សម្រាប់ធ្វើបទបង្ហាញស្តីពីទិសដៅទេសចរណ៍ក្នុងតំបន់អាស៊ាន។ 
លោក ពូន សារឿន បានមានប្រសាសន៍ថា៖ «បន្ថែមពីការរៀបចំ និងបង្ហាញជាអត្ថបទ ឬសិល្បៈមួយចំនួនហើយ សិស្សក៏ត្រូវបង្ហាញការសម្តែងសិល្បៈតាមប្រទេសនីមួយៗទៅកាន់អ្នកទស្សនាផងដែរ។ ការធ្វើបែបនេះ គឺធ្វើឱ្យពួកគេអាចប្រើប្រាស់ថ្ងៃទី25ធ្នូ ដើម្បីទទួល និងចែករំលែកចំណេះដឹងជាអន្តរជាតិឱ្យបានកាន់តែទូលំទូលាយ»។
លោក ពូន សារឿន បានលើកឡើងផងដែរថា យើងចង់ឱ្យយុវជនសិក្សាស្វែងយល់ឱ្យបានទូលំទូលាយពីវប្បធម៌នៃប្រទេសនានាលើពិភពលោក តែយើងក៏ចង់ឱ្យពួកគេសិក្សាស្វែងយល់ស៊ីជម្រៅតែម្តងលើមរតកវប្បធម៌ខ្មែរផងដែរ។ ហេតុនេះហើយទើបជារៀងរាល់ឆ្នាំ នៅថ្ងៃទី25ធ្នូនេះយើងរៀបចំជាកម្មវិធីដ៏មានសារៈសំខាន់ជាច្រើន ដូចជាការស្រាវជ្រាវពីប្រវត្តិសាស្ត្រខ្មែរតាមសម័យកាល រួមទាំងការស្រាវជ្រាវប្រកបដោយគុណតម្លៃជាច្រើនផ្សេងទៀត។ 
យុវតី លី ហៀក សិស្សនៃសាលារៀនវេសឡាញ សាខាសន្ធរម៉ុក បានលើកឡើងថា កម្មវិធីទិសដៅទេសចរណ៍ក្នុងតំបន់អាស៊ាន នេះជាកម្មវិធីដ៏ល្អមួយដែលជួយឱ្យគាត់មិនត្រឹមតែទទួលបានភាពរីករាយប៉ុណ្ណោះទេ តែក៏ទទួលបានបទពិសោធជាច្រើន ក្នុងការធ្វើការសិក្សាស្រាវជ្រាវពីប្រទេសនានាក្នុងតំបន់ និងបទពិសោធក្នុងការសម្របសម្រួលការងារជាក្រុម។ ម្យ៉ាងវិញទៀត វាក៏ជាឱកាសដ៏ល្អផងដែរសម្រាប់ឱ្យសិស្សដែលចូលរួមក្នុងសកម្មភាពទាំងអស់នេះ បានបង្កើនភាពក្លាហានក្នុងការសម្តែងនៅលើឆាកសម្រាប់ឱ្យសិស្សានុសិស្សជាច្រើនផ្សេងទៀតបានទស្សនា៕
