ក្រុមហ៊ុនជប៉ុន VAIO បានប្រកាសចេញកុំព្យូទ័រយួរដៃថ្មី ម៉ូដែល SX12 មានបំពាក់អេក្រង់ទំហំ 12.5អ៊ីញ ហើយមានរន្ធដោតជាច្រើន(ដល់ទៅ 8រន្ធ) ច្រើនលើសកុំព្យូទ័រខ្នាតតូចប្រភេទដទៃទៀត។
VAIO SX12 នឹងចេញលក់នៅក្នុងប្រទេសជប៉ុនក្នុងសប្ដាហ៍នេះ ដែលមានតម្លៃចន្លោះពីប្រមាណ 1,100ដុល្លារ ទៅ 2,000ដុល្លារ អាស្រ័យលើអង្គផ្ទុក ពណ៌ និងជម្រើស CPU។ ការបញ្ចេញ SX12 ក្នុងគ្រានេះ អាចជាភ័ស្តុតាងមួយបង្ហាញថា ទោះជាកុំព្យូទ័រយួរដៃមានកម្រាស់ស្ដើង និងស្រាលមែន តែក៏គេអាចដាក់រន្ធដោតបានច្រើនដែរ។
VAIO មានរន្ធ USB-A ចំនួន3 រន្ធ USB-C មាន1 សម្រាប់សាកថ្ម រន្ធ HMDI 1 រន្ធសម្រាប់ដោត SD Card 1 រន្ធសម្រាប់ដោតកាស និងមីក្រូហ្វូន រន្ធ Ethernet និងរន្ធ VGA 1ទៀតផងដែរ។ ម៉ាស៊ីនមួយគ្រឿងនេះប្រើប្រាស់ CPU Intel ជំនាន់ទី8 ប្រភេទ Quad-Core Core i5 ឬ i7 និងមានជម្រើសប្រើប្រព័ន្ធអ៊ីនធើណិតទៀតផង ឯទម្ងន់វិញ ត្រឹមតែ 888ក្រាមប៉ុណ្ណោះ៕
