ក្រុមហ៊ុន Apple ត្រូវបានគេរាយការណ៍ថា នឹងមានចេញផ្សាយកាសឥតខ្សែ AirPods 3 ជាមួយការវិវឌ្ឍដ៏ធំទាក់ទិនការបំពាក់អាវក្រោះការពារទឹកនៅអំឡុងចុងឆ្នាំ2019 នេះ។ នេះបើយោងតាមការលើកឡើងរបស់អ្នកវិភាគ Daniel Ives របស់ក្រុម Wedbush។
ក្រុម Wedbush TMT បានចំណាយពេលកាលពីសប្តាហ៍មុនក្នុងការចុះត្រួតពិនិត្យនូវផ្នែកគ្រឿងបន្លាស់មួយចំនួននៅតំបន់អាស៊ីដើម្បីវាស់ស្ទង់ពីបញ្ហាតម្រូវការ និងការផ្គត់ផ្គង់។ ជាលទ្ធផលសម្រេចបាន ក្រុមខាងលើបានព្យាករថា Apple នឹងប្រកាសចេញ iPhone 3ម៉ូឌែលនៅក្នុងខែកញ្ញា ដំណាលគ្នានឹង AirPods 3 នៅអំឡុងពេលក្រោយនោះ។
ប្រភពបានសង្កត់ធ្ងន់ថា កាសឥតខ្សែជំនាន់ទី3 របស់ក្រុមហ៊ុនយក្សអាមេរិកនឹងរចនាបន្ថែមនូវមុខងារមួយចំនួន បូកផ្សំនឹងអាវក្រោះការពារទឹក ខណៈតម្លៃក៏នឹងខ្ពស់ជាងមុនដែរ។ ស្រដៀងគ្នានឹងរបាយការណ៍ Bloomberg ចុះផ្សាយកន្លងទៅ ដែលក៏បានឱ្យដឹងដែរថា Apple កំពុងសម្ងំអភិវឌ្ឍកាស AirPods ការពារជម្រាបទឹក ដែលមិនបារម្ភត្រឹមតែទឹកសាច ឬទឹកភ្លៀងប៉ុណ្ណោះ តែមិនមែនប្រភេទប្រើប្រាស់ដល់ការមុជទឹកជ្រៅឡើយ៕
