មកដល់ខណៈពេលនេះ ក្រុមតារាៗ និងអ្នកដឹកនាំប្រចាំក្រុម«តារារះថ្មី»ដែលត្រូវគេស្គាល់ថា កញ្ញា សូរ្យ អែនណា ជាអ្នកគ្រប់គ្រងនោះបានធ្វើដំណើរត្រឡប់មកដល់ទឹកដីកម្ពុជាវិញហើយ ដោយពួកគេបានទទួលកិត្តិយសយ៉ាងធំសម្បើមនៅក្នុងកម្មវិធី Asian Model Festival 2018 និងកម្មវិធី Asian Model Star Award 2018 នៅប្រទេសកូរ៉េយ៉ាងគួរឱ្យកោតសរសើរ។
ជាមួយគ្នានោះដែរ កញ្ញា សូរ្យ អែនណា អតីត Miss Global Cambodia កាលពីឆ្នាំ2016 បាននិយាយថា ក្នុងការប្រកួត Asian Model Festival 2018 តារាម៉ូដែលដែលក្រុម«តារារះថ្មី»បានបញ្ជូនទៅ គឺលោក ប្រាជ្ញ ឆវ័ន្ត ទទួលបានរង្វាន់ និងការឧបត្ថម្ភពីក្រុមហ៊ុន JMA ដែលជាក្រុមហ៊ុនធំមួយក្នុងនាមជាតារាមួយរូបដែលក្រុមហ៊ុននេះពេញចិត្ត។ ដោយឡែកចំពោះតារាសម្ដែងលោក អែត វីន វិញ កញ្ញាអែនណា បានបន្ដប្រាប់ថា លោកក៏ត្រូវបានគេអញ្ជើញឱ្យទៅទទួលពានក្នុងកម្មវិធី Asian Model Star Award 2018 ដែលបានធ្វើឡើងនៅក្នុងប្រទេសកូរ៉េនោះដែរ ក្នុងនាមជាតារាតំណាងឱ្យប្រទេសកម្ពុជា។
គួរបញ្ជាក់ផងដែរថា ការទទួលពាននេះគឺជាកិត្តិយសមួយសម្រាប់តារាខ្មែរយើង ដែលធ្វើឱ្យកញ្ញាកាន់តែមានកម្លាំងចិត្តក្នុងការដឹកនាំតារាខ្មែរទៅចូលរួមប្រកួត និងបង្ហាញរូបសម្រស់លើឆាកអន្តរជាតិច្រើនឡើង បន្ទាប់ពីលើកនេះបានទទួលជោគជ័យខ្លាំង៕
