ក្រោយបាត់មុខអស់មួយរយៈ ពេលនេះដែរ តារាចម្រៀងស្រី ឡេង មុន្នីរចនា ក៏បានប្រកាសចូលសិល្បៈជាថ្មី ដែលធ្វើឱ្យអ្នកគាំទ្រ សប្បាយចិត្តខ្លាំង ពេលឃើញនាងបង្ហាញមុខយ៉ាងដូច្នេះ។ ជាពិសេស គេសង្កេតឃើញថា សម្រស់របស់អ្នកនាង ឡេង មុន្នីរចនា កាន់តែស្រស់ស្អាត ជាងមុន បើទោះបីជា វ័យរបស់នាង កាន់តែជ្រេបន្តិចក៏ដោយ។
គួររំឭកដែរថា តារាចម្រៀងស្រីយេៗអង្រួនអារម្មណ៍មិត្តយុវវ័យ ល្បីខ្លាំងនាដើមឆ្នាំ2000 និយមសិចស៊ីរូបនេះ អ្នកនាងបានស្ងាត់ស្ងៀមពីសិល្បៈអស់មួយរយៈធំមកហើយ រហូតដល់យុវវ័យជំនាន់ថ្មីស្ទើរតែភ្លេចទៅហើយថា ឡេង មុន្នីរចនា ជាតារាចម្រៀងមួយដួងដែលធ្លាប់មានឈ្មោះបោះសំឡេង។ ការបាត់មុខពីសិល្បៈយ៉ាងអាថកំបាំង អស់រយៈពេលជាង 10ឆ្នាំមកនេះ បានធ្វើឱ្យកេរ្តិ៍ឈ្មោះរបស់នាង ស្ទើរតែបានសាបសូន្យពីមជ្ឈដ្ឋានសិល្បៈទៅហើយដែរ ប៉ុន្តែអ្វីដែលគួរឱ្យភ្ញាក់ផ្អើលនោះ គឺនៅត្រង់ថា នាងបាត់មុខមិនមែន ដោយសារតែទៅរស់នៅ បរទេសនោះទេ ពោលគឺនាងកំពុងតែសំងំ ក្លាយជាថៅកែលក់គ្រឿងចក្រ មួយក្នុងរាជធានីភ្នំពេញ។ អ្នកនាង ឡេង មុន្នីរចនា មានវ័យកាន់តែជ្រេហើយមិនបានបណ្ដើរប្ដីអ្នកនាងឱ្យមហាជនបានស្គាល់នៅឡើយទេ ខណៈដែលចូលរួមក្នុងកម្មវិធីមួយ តែបណ្ដើរ ឪពុកម្ដាយនាង ជាលក្ខណៈគ្រួសារទៅវិញ។
អ្នកនាងថា បច្ចុប្បន្នមិនសូវសម្បូររការងារ ក្នុងសិល្បៈដូចមុនទេ ព្រោះតារាចម្រៀងថ្មីៗរះច្រើន នាងកាន់តែចាស់ ដូចនេះនាងត្រូវរកមុខរបរមួយ ដើម្បីលំនឹងជីវភាពគ្រួសារ ។ យ៉ាងណាមិញ អ្នកនាង ឡេង មុន្នីរចនា សព្វថ្ងៃនេះជាថៅកែគ្រឿងចក្រមួយ ដែលជាអាជីពគោល។នាងលក់គ្រឿងចក្រ ជាមួយក្រុមគ្រួសារ តែសិល្បៈនាងមិនចោលទេ ដរាបណាទស្សនិកជន នៅតែចង់ឃើញ នាងនៅតែបន្ត លុះត្រាតែលែងមានអ្នកចង់មើល គឺនាងឈប់ឯងតែម្ដង។យ៉ាងណាក៏ដោយអ្នកនាង ឡេង មុន្នីរចនា បានរៀបការពីរដងរួចទៅហើយ ខណៈដែលស្នេហ៍ទីមួយខកបំណង តែចំណងស្នេហទីពីរ ទើបតែរៀបការស្ងាត់ៗមិនកក្រើកក្នុងពិភពសិល្បៈនៅអំឡុងឆ្នាំ2015 តែសម្រាប់ចំណងស្នេហ៍ថ្មីនេះ មិនមែនជាបញ្ហាអ្វីទៀតឡើយ ព្រោះនាងចាស់ទុំជាងមុនក្នុងរឿងនេះ។
ទន្ទឹងនឹងមុខរបររកស៊ីក៏រីកចម្រើនច្រើនគួរសម ឥលូវនេះស្រាប់ថា ធ្លាយដំណឹងថា អ្នកកំពុងងាកចូលប្រលូកក្នុងវិស័យសិល្បៈវិញ ព្រោះថា ក៏ជាតារាស្រីម្នាក់ដែលមានសមត្ថភាពពេញទី មិនថាសម្តែង និងចម្រៀង ហើយអ្នកនាងអាចច្រៀងបានច្រើនភាសាទៀតផង៕
