ខុសពីការប៉ាន់ស្មានដែលថា អតីតតារាសម្ដែង និងជា Freshies boy ល្បីល្បាញ លោកថៃ នរ:វិទូ ធ្វើខួបកំណើតឆ្លងវ័យ30ចូល31ឆ្នាំ ទំនងនឹងមានតារាសិល្ប: និងភ្ញៀវកិត្តិយសមិនច្រើនណាស់ណា ចូលរួមពិធីខួបរបស់លោក ដែលបានធ្វើឡើងកាលពីយប់ថ្ងៃទី26 មេសា តែផ្ទុយទៅវិញ បែរជាឃើញភ្ញៀវយ៉ាងច្រើនកុះករតែម្ដង ដោយក្នុងពិធីនោះ គេឃើញភ្ញៀវអ្នកចូលរួម ស្ទើរមិនមានតុអង្គុយនោះផង។
ខួបកំណើតដែលបានធ្វើឡើងជាទ្រង់ទ្រាយធំនេះ ត្រូវបានម្ដាយរបស់លោក គឺ អ្នកស្រី ងិន ម៉ានីយ៉ា ដែលជាអ្នកនិពន្ធបទចម្រៀង ដ៏ឆ្នើមរៀបចំឱ្យ ដើម្បីប្រកាសឲ្យដឹងថា លោក ថៃ នរ:វិទូ ក្រោយបញ្ចប់ពិធីខួបកំណើតទៅ គឺត្រលប់មកកាន់វិថីសិល្ប:វិញហើយ។
លោកថៃ នរ:វិទូ ដែលត្រូវលោក ថៃ នរ:សត្យា ជាឳពុកលើកសរសើរ មិនដាច់ពីមាត់ក្នុងពេលជូនពរខួបកំណើត បានថ្លែងបញ្ជាក់ថា នៅអំឡុងចុងខែ5ខាងមុខ លោកនឹងបង្ហាញមុខថតកុនវិញហើយ ដោយមានក្រុមហ៊ុនមួយ បានទាក់ទងឱ្យលោកថតកុនរឿងខ្លី ដែលរឿងបើកឆាកក្នុងជីវិតសិល្ប:ជាថ្មីរបស់លោកនោះ គឺលោកនៅតែទទួល បានតំណែងតួឯក។ លោកថាខ្លួនត្រលប់មកកាន់សិល្ប:ម្ដងនេះ មិនមែនគ្រាន់តែចូលលេងៗ នោះទេ គឺចូលឱ្យស៊ប់តែម្ដង ដោយទទួលទាំងថតស្ពត ថតរឿងដុំ និងថតរឿងភាគ បើទោះជាត្រូវប្រើពេលច្រើនខែ និងត្រូវចុះទៅខេត្តឆ្ងាយៗ ប៉ុន្តែលោកនឹងម្រេចដើរផ្លូវសិល្ប:ជាថ្មី ដើម្បីកសាងកេរ្តិ៍ឈ្មោះ។លោករំពឹងថាវិថីសិល្ប:របស់ខ្លួន នឹងមិនយឺតពេលទេ ដោយសារតែគ្រាន់តែប្រកាសសម្ដែង នៅលើហ្វេសប៊ុកកកាលពីប៉ុន្មានថ្ងៃមុនលេងៗផង ក៏មានផលិតករទាក់ទងបានមួយរឿងទៅហើយ៕
