នៅព្រឹកថ្ងៃទី2 ខែមិថុនា តារាចម្រៀង កញ្ញា មាស អាលីស បានធ្វើដំណើរចាកចេញពីប្រទេសកម្ពុជាហើយ ដើម្បីទៅជួបតារាចម្រៀង៣ដួង គឺលោក ម៉េង ម៉េង ប៊ុនឡូ លោក ម៉េង ប៊ុនល និង លោក យក់ ដួងតារា ដែលរង់ចាំនៅ សហរដ្ឋអាមេរិក។ នាង និងតារាទាំង៣ នឹងបើកការប្រគំតន្ត្រីរួមគ្នា ខណៈដែលនាងប្រាប់ថា ដំណើរទៅឆ្ងាយពីម្ដាយរហូតដល់ជាងកន្លះឆ្នាំនេះ គឺពិតជាធ្វើឱ្យនាងនឹកម្ដាយ ប៉ុន្តែត្រូវតែកាត់ចិត្ត ដើម្បីការងារ និងកេរ្តិ៍ឈ្មោះ។
ថ្វីដ្បិតតែប្រឡូកអាជីពចម្រៀងមិនយូរ ប៉ុន្តែតារាស្រីរូបនេះទើបប្រឡូកក្នុងអាជីពជាពិធីការិនីហើយក្លាយជាតារាចម្រៀងក៏បានទទួលជោគជ័យក្នុងអាជីពរបស់ខ្លួនយ៉ាងខ្លាំង ដោយក្រៅពីមានមុខឡើងប៉ុស្តិ៍ទូរទស្សន៍មិនសូវលោះពេល នាងក៏បានច្រៀងប្រចាំក្នុងហាងធំមួយយ៉ាងកាលីបផងដែរ ដោយសារតែទឹកដមសម្លេងរបស់នាងស្រដៀងគ្នា អ្នកចម្រៀង អ្នកនាង ហួយ មាស។ នាងក៏ទើបតែត្រូវបានស្ថានទូតអាមេរិក ផ្ដល់សិទ្ធិឲ្យចេញទៅច្រៀងនៅសហរដ្ឋអាមេរិកជាលើកដំបូងនេះផងដែរ ខណ:ដែលនាងប្រកាសថា សុខចិត្តទម្លាក់ចោលការងារក្នុងស្រុកទាំងអស់ គ្រាន់តែបានដំណឹងជាប់ទៅច្រៀង។
កញ្ញា មាស អាលីស បាននិយាយប្រាប់អ្នកសារព័ត៌មាន នាងប្រឡូកក្នុងអាជីពចម្រៀង ច្រើនឆ្នាំមកហើយ ហើយក៏ប្រឡូកក្នុងអាជីពជាអ្នកនិយាយវិទ្យុមិនតិចឆ្នាំដូចគ្នាផងដែរ ប៉ុន្តែនាងមិនដែលមានសំណាងត្រូវបានស្ពុនស័រទាក់ទងអោយចេញច្រៀងក្រៅប្រទេសទាល់តែសោះ។ នាងថាខ្លួនមានបំណងចង់ចេញច្រៀងក្រៅប្រទេសជាយូរមកហើយ ប៉ុន្តែមិនដែលមានឱកាសសោះ ទើបនាងរំភើបចង់ហូរទឹកភ្នែក នៅពេលបានជាប់ទៅច្រៀងនៅសហរដ្ឋអាមេរិក ហើយជាប់ដល់រយៈពេល7ខែ ដែលជារយៈពេលយូរមួយសម្រាប់សិល្បករស្រករក្រោយដូចនាង។ នាងថាខ្លួននឹងឡើងទៅសម្ដែង ជាមួយលោក ម៉េង ប៊ុនឡូ លោក ម៉េង ប៊ុនលី និងលោក យក់ ដួងតារា ដោយក្នុងរយៈពេល7ខែនៅលើទឹកដីអាមេរិកនោះ នឹងមានការសម្ដែងរៀងរាល់ចុងសប្ដាហ៍ ហើយសម្ដែងច្រើនរដ្ឋ។ យ៉ាងណាមិញនាងថា នឹងមិនបន្តកុងត្រាលើសពី7ខែនោះទេ ដើម្បីកុំឱ្យបាត់បង់ទីផ្សារក្នុងស្រុក គឺនាងនឹងទទួលតែរយៈពេល7ខែ ដែលបានកុងត្រា ជាមួយខាងអ្នកធានាទៅប៉ុណ្ណោះ។
សូមជម្រាបថា ក្នុងឱកាសជូនដំណើរកូនស្រីឡើងយន្តហោះនោះ គេឃើញ ម្ដាយរបស់ មាស អាលីស អរផង ទឹកភ្នែករលីងរលោងផង ដោយសារតែអ្នកទាំងពីរមិនធ្លាប់បែកគ្នារយៈពេលយូរបែបនេះ។ អ្នកស្រី ពេជ្រ ច័ន្ទសុខា ម្ដាយរបស់នាងនិយាយថា មាស អាលីស ជាកូនស្រីតែម្នាក់ ក្នុងចំណោមបងប្អូន3នាក់។ អ្នកស្រី រស់នៅជាមួយកូន មិនដែលបែកគ្នាក្នុងរយៈពេលយូរបែបនឹងនោះទេ ប៉ុន្តែដើម្បីសម្រេចក្ដីប្រាថ្នារបស់កូនស្រី ចង់សាងកេរ្តិ៍ឈ្មោះនៅសហរដ្ឋអាមេរិក អ្នកស្រីមានតែបង្ហាញការត្រេកអរ និងជូនពរឱ្យកូនស្រីជួបតែសុខសប្បាយ និងជោគជ័យ៕
