ពិតជានឹកស្មានមិនដល់ ហើយក៏មិនមែនធម្មតាឡើយ ទម្រាំទទួលបានពានជាតារាលេចធ្លោក្នុងឈុតសំលៀកបំពាក់បុរាណរបស់គ្រួសារតារាកម្ពុជា ក្នុងការប្រកួតប្រជែងដែលក្រុមសិល្បៈមួយនេះធ្វើឡើង។ យ៉ាងណាមិញ ម្ចាស់ពានឆ្នាំចាស់ លោក រុន ណាកូ បែរជាទទួលបានពានដល់ទៅ២ ពីគ្រួសារតារាកម្ពុជា បន្ទាប់ពីលោកត្រូវបានគេដាក់ឱ្យបោះឆ្នោតនៅលើផេក”គ្រួសារតារាកម្ពុជា” និងផេក”ផ្ទះតារា Home Stars” ហើយទទួលបានសំឡេងនាំមុខគេ។
តារាសម្ដែង និងជាសមាជិកក្រុមបង្ហាញម៉ូដ BN រូបនេះបានគ្រងឈុតព្រះបាទសុរិយាវរ្ម័ន ទី២ ហើយទទួលបានពានលេចធ្លោ និងត្រូវទម្រង់នោះ កាលពីឆ្នាំ២០១៨។ លោកក៏ទទួលបានពាន Year Award ឬ ពានប្រជាប្រិយភាពពីការបោះឆ្នោត យ៉ាងមានកិត្តិយស ដោយពានរបស់លោក ត្រូវបានប្រគល់ឱ្យដោយអ្នកនាង ចាន់ តារាទី នៅក្នុងវេទិកាការប្រកួតឈុតបុរាណលើកទី២ កាលពីថ្ងៃទី៨ កក្កដា ឆ្នាំ២០១៩ នៅប្រាសាទសំបូរព្រៃគុក។
លោក រុន ណាកូ បង្ហាញអារម្មណ៍រំភើបចិត្តយ៉ាងខ្លាំង បន្ទាប់ពីដណ្ដើមបានពានជាលើកទី២ ពីការបោះឆ្នោតរបស់មហាជន។ លោកកាន់តែសប្បាយចិត្ត ដែលតារារៀមច្បង អ្នកនាង ចាន់ តារាទី គឺជាអ្នកឡើងប្រគល់ពាន ដែលលោកបញ្ជាក់ថា កាលពីមុនធ្លាប់តែស្រម៉ៃ ប៉ុន្តែពេលនេះ ស្រាប់តែបានទទួលពានយ៉ាងមានកិត្តិយសពី អ្នកនាង។ លោកក៏ប្រកាសអរគុណ ដល់គ្រួសារតារាកម្ពុជា ផងដែរ ដែលបានបង្កើតព្រឹត្តិការណ៍ប្រកួតឈុតបុរាណនេះឡើង ហើយផ្ដល់ឱកាសអោយលោកក្លាយជាម្ចាស់ពានកាលពីឆ្នាំ២០១៨ ដែលជួយឱ្យលោកបន្តកាន់ពានប្រជាប្រិយភាពលើកនេះ ជាថ្មីទៀត៕
