កាលពីប៉ុន្មានថ្ងៃមុនកន្លងផុតទៅថ្មីៗនេះអ្នកនាង ចន ច័ន្ទលក្ខិណា បានព្រលះលោក អ៊ឹម ជីវ៉ា យ៉ាងចាស់ដៃថាជាអ្នកយកសាំងទៅចាក់លើភ្លើងពាក់ព័ន្ធរឿង ធី សុវណ្ណថា អេង ចរិយា និងលោក ហេង ឡុង។ ប៉ុន្តែរឿងរ៉ាវខាងលើត្រូវបានសាធារណៈជនគិតថាជារឿងសម្ដែងឆាកល្ខោនតែប៉ុណ្ណោះគ្មានអ្វីជាការពិតឡើយ។
ការគិតរបស់មហាជនមួយចំនួនគឺផ្ទុយស្រលះទាំងស្រុងស្រាប់តែម្សិលមិញនេះ អ៊ឹម ជីវ៉ា បានប្រកាសនៅលើហ្វេសប៊ុករបស់ខ្លួនថា លោកនឹងលាលែងពីមុខតំណែងក្រុមប្រឹក្សាភិបាលរបស់សមាគមសិល្បករខ្មែរចាប់ពីថ្ងៃទី១៥ ខែវិច្ឆិកា ឆ្នាំ២០១៩នេះតទៅ។ ដោយលោកលើកហេតុផលថាអ្នកនាង ចន ច័ន្ទលក្ខិណា គឺជាថ្នាក់ដឹកនាំដែលមានអារម្មណ៍ឆេវឆាវធ្វើអ្វីទៅតាមអារម្មណ៍ខ្លួនឯង និងឆាប់ជឿគេពេកហើយមិនចេះទប់អារម្មណ៍ក្នុងនាមជាមេដឹកនាំសិល្បៈ ចំពោះការដឹកនាំទៀតសោតនៅមានកម្រិត។
មួយវិញទៀតពេលមាន កម្មវិធីមានលុយកាក់គឺហៅតែតារាល្បីមានមុខមាត់ឯតារាមិនល្បីបានត្រឹមមកជួយកម្មវិធីសប្បុរសធម៌តែប៉ុណ្ណោះ។ រីឯប្រាក់ចំណូល និងចំណាយផ្សេងៗ ព្រមទាំងថវិការមូលនិធិវាហាក់បីដូចច្រពិចច្រពិល ដោយមិនបានប្រជុំរៀងរាល់ខែឡើយម្ដងឡើយ។ លើសពីនេះទៅទៀតរាល់ពេលមានការបង្កើតកម្មវិធីម្តងៗសមាគមមិនដែលបានកោះប្រជុំក្រុមប្រឹក្សាឡើយក្នុងចំណោម១០កោះហៅ២ដងប៉ុណ្ណោះ។
ពាក់ព័ន្ធការបង្ហោះខាងលើនេះដែរលោក អ៊ឹម ជីវ៉ា បានប្រាប់អ្នកសារព័ត៌មានថា មិនមែនជារឿងសម្ដែងចង់បានប្រជាប្រិយភាពអ្វីឡើយរឿងរ៉ាវលោក និងអ្នកនាង ចន ច័ន្ទលក្ខិណា គឺជាការពិតទាំងអស់ដូច្នេះលោក សុំចិត្តមហាជនកុំគិតថាលោកសម្ដែងឆាកល្ខោនតទៅទៀតអី។ ចំណែកឯអ្នកនាង ចន ច័ន្ទលក្ខិណា មិនអាចទាក់ទងសុំការបញ្ជាក់បន្ថែមបាននោះទេ៕
