តើអ្នកធ្លាប់មានបញ្ហាក្លៀកខ្មៅដែរឫទេ? ការដករោមក្លៀក អាចបណ្តាលឱ្យដាច់របួសស្បែកនៅត្រង់បរិវេណក្លៀកបាន ហើយវាអាចក្លាយទៅជាដំបៅនៅត្រង់បរិវេណដែលបានដករោមក្លៀកនោះ។ ម្យ៉ាងវិញទៀត វាធ្វើឱ្យស្បែកឡើងពណ៌ខ្មៅ ដែលស្ត្រីភាគច្រើនតែងតែមានការអាក់អន់ចិត្តចំពោះបញ្ហានេះ។
ដោយឡែក ស្ត្រីជនជាតិអឺរ៉ុបមួយចំនួន មិនប្រើប្រាស់វិធីដករោមក្លៀកនោះទេ ផ្ទុយទៅវិញពួកគេចូលចិត្តទុករោមក្លៀក ដើម្បីឱ្យមើលទៅសិចស៊ី។ ក៏ប៉ុន្ដែចំពោះស្ត្រីនៅតំបន់អាស៊ី បែរជាចូលចិត្តកម្ចាត់រោមក្លៀក ដោយការប្រើប្រាស់ផលិតផលជម្រុះរោមក្លៀក ឬការដករោមក្លៀកជាដើម។ជាមួយគ្នានេះដែរ ប្រសិនបើអ្នកចង់ដករោមក្លៀកអ្នកគួរតែជូតសម្អាតដោយអាកុលជាមុនសិន ហើយទុកវាឱ្យស្ងួត ដើម្បីកុំឱ្យឆ្លងមេរោគនៅពេលដករោមក្លៀកចេញ។ បន្ទាប់មកអ្នកត្រូវយកដង្កៀបស្អាតមកចាប់កៀបរោមក្លៀកត្រង់គល់រោម រួចដកវាចេញមក។ ការធ្វើបែបនេះ អាចបណ្តាលឱ្យរោមក្លៀកសណ្តកមកដោយងាយស្រួល ហើយវាក៏មិនបង្កឱ្យដាច់ស្បែក ដូចចាប់ដករោមត្រង់កណ្តាល ឬចុងរោមនោះទេ។
ពីធម្មជាតិសារជាតិអាស៊ីត, សារធាតុប្រឆាំងនិងបាក់តេរីផ្សេងៗ ដែលមាននៅក្នុងបន្លែ និងផ្លែឈើអាចជួយឱ្យស្បែករបស់អ្នកភ្លឺរលោងតាមបែបធម្មជាតិ។ ជាមួយគ្នានេះដែរ ដំឡូងបារាំង ត្រសក់ និងក្រូចឆ្មារ អាចកម្ចាត់ស្នាមខ្មៅរបស់ក្លៀកបាន។
1. ដំឡូងបារាំង
ចិតដំឡូងបារាំងជាចំណិតស្តើងៗ ហើយយកមកដុសលើកន្លែងដែលមានស្នាមខ្មៅ។ មួយវិញទៀតអ្នកអាចយកវាទៅកៀបយកទឹក រួចយកមកលាបនៅលើក្លៀកទុកចោលរយៈពេល10នាទី ទើបលាងស្អាតចេញវិញក៏បាន។
2. ក្រូចឆ្មារ
យកចំណិតក្រូចឆ្មារមកដុសនៅលើកន្លែងក្លៀកខ្មៅ វានឹងជួយកម្ចាត់ស្នាមខ្មៅ និងធ្វើឱ្យស្បែកសភ្លឺឡើងវិញ។ ទុកវាចោលចំនួន10នាទី រួចសឹមលាងសម្អាតចេញវិញ។ ចូរកុំភ្លេចលាបឡេ ដើម្បីផ្តល់សំណើមដល់ស្បែកផង ពីព្រោះថា អាស៊ីតនៅក្នុងក្រូចឆ្មារ អាចនាំឱ្យស្បែកស្ងួត។ ជាមួយគ្នានេះដែរ អ្នកក៏អាចលាយក្រូចឆ្មារជាមួយនឹងម្សៅល្មៀតមួយភាគតូច ឬយ៉ាអួសាប ឬទឹកឃ្មុំ ដើម្បីធ្វើឱ្យស្បែកមានសភាពទន់។
3. ត្រសក់
ចូរចិតផ្លែត្រសក់ស្តើងៗ ឬកៀបយកទឹកដូចជា ដំឡូងបារាំងដែរក៏បាន។ មួយវិញទៀត អ្នកក៏អាចបន្តក់ទឹកក្រូចឆ្មារ 2ឬ 3ដំណក់ និងម្សៅល្មៀតលាយទៅក្នុងទឹកត្រសក់ រួចលាបល្បាយនោះ នៅលើក្លៀកត្រង់កន្លែងឡើងខ្មៅ ហើយទុកចោលរយៈពេល30នាទី សឹមលាងជាមួយនឹងទឹកស្អាតចេញជាការស្រេច។
4. ស៊ុតលឿង
យកស៊ុតពណ៌លឿងមកម៉ាស្សានៅបរិវេណក្លៀកខ្មៅ រួចទុកវាចោលមួយយប់។ ដោយឡែក សារជាតិអូមេហ្កា3 ដែលមាននៅក្នុងប្រេងស៊ុត អាចជួយឱ្យភាពគ្រើមនៅលើក្លៀក មានសភាពទន់ និងរលោងឡើងវិញ។ អ្នកគួរតែលាង វានៅពេលភ្ញាក់ឡើង ជាមួយនឹងសាប៊ូ pH ជាការស្រេច៕
