ត្រៀមខ្លួន​ថែរក្សា​សុខភាព​បែបណា​ក្នុងពេល​ធ្វើដំណើរ?

June 11, 2019​ ម៉ោង 2:51 pm

ក្នុងអំឡុងពេល​នេះ​ ជា​ពេលវេលា​មួយ​នៃ​ការ​ជួបជុំ​ក្រុម​គ្រួសារ​ និង​ធ្វើដំណើរ​កម្សាន្ដ​ទៅ​គ្រប់​ទីកន្លែង​យ៉ាង​រីករាយ​។ តែ​ងាក​មក​សង្កេតមើល​ពី​អាកាសធាតុ​វិញ​ ដូចជា​មិន​អំ​ណោច​ផល​ទាល់តែសោះ​ ជួន​ក្ដៅ​ ជួន​ត្រជាក់​។ ពេលខ្លះ​ធ្វើ​ឱ្យ​អ្នកមាន​អារម្មណ៍​មិន​ស្រួលខ្លួន​ ឈឺក្បាល​ញឹកញាប់​ ឬកើតមាន​អាការ​ពុល​ឡាន​ និង​ធ្វើ​ឱ្យ​អ្នក​ងាយ​នឿយហត់​ក្នុង​ការ​ធ្វើដំណើរ​ទៀតផង​។ បើ​មាន​អាការ​ឈឺក្បាល​ញឹកញាប់​ក្នុង​ពេល​ធ្វើដំណើរ​នោះ​ តើ​អ្នក​គួរតែ​ថែរក្សា​សុខភាព​បែប​ណា​? សូម​ពិនិត្យ​នូវ​ចំណុច​ខាងក្រោម​នេះ​ ដើម្បី​ប្រតិបត្តិ​តាម​ក្នុង​ការ​ការពារ​ និង​ទុកជា​គន្លឹះ​ត្រៀមខ្លួន​ទុកជាមុន​។

1. កុំ​ទទួលទាន​កាហ្វេ​ច្រើន​អំឡុង​ពេល​ធ្វើ​ដំណើរ
អ្នក​គួរតែ​ចាប់អារម្មណ៍​ទៅលើ​ភេ​សជ្ជៈ​ផ្សេង​ៗវិញ​ប្រសើរ​ជាង​ ព្រោះថា​សារធាតុ​កា​ហ្វេ​អុីន​គឺជា​សារធាតុ​មួយ​ជំរុញ​ឱ្យ​មាន​អាការ​ឈឺក្បាល​ដ៏​អា​-ក្រ​ក់​មួយ​ និង​អាច​ធ្វើ​ឱ្យ​អ្នកមាន​អាការ​ធីងធោង​ក្នុង​ពេល​ធ្វើដំណើរ​ទៀតផង​។ ដូច្នេះហើយ​សូម​ងាក​មក​ទទួលទាន​អាហារ​ ឬទឹកតែ​ ឬទឹក​ផ្លែឈើ​វិញ​ ដើម្បី​ជួយ​បំពេញ​ជាតិទឹក​នៅក្នុង​រាងកាយ​របស់​អ្នក​។

2. ប្រើប្រាស់​ថ្នាំ​បំបាត់​អាការ​ឈឺក្បាល​
ទោះជា​មានឈ្មោះ​ថា​ជា​ថ្នាំ​មែន​ តែបើ​ប្រើ​ខុស​ក៏អាច​នឹង​ធ្វើ​ឱ្យ​មានគុណ​វិបត្តិ​បាន​ដែរ​ ដូច្នេះ​ហើយ​ពពួក​ថ្នាំ​បំបាត់​អាការ​ឈឺ​ក្បាល​ផ្សេង​ៗ គួរ​តែ​ទទួលទាន​ឱ្យ​សម​ល្មម​ចំពោះតែ​ពេលណា​ដែល​ឈឺក្បាល​ខ្លាំង​មែនទែន​បាន​ហើយ​។ ហាម​ប្រើ​ក្នុង​បរិមាណ​ច្រើនលើស​ពី​កំណត់សម្គាល់​ដែល​មាន​នៅ​លើ​ប្រអប់​ថ្នាំ​ និង​មិន​គួរ​ទទួលទាន​ញឹកញាប់​ពេក​ទេ​ មិន​ដូច្នោះ​ទេ​នឹង​ធ្វើ​ឱ្យ​កើតមាន​អាការ​ស៊ាំ​នឹង​ថ្នាំ​ ធ្វើ​ឱ្យ​ពេល​ឈឺក្បាល​ឡើង​ ថ្នាំ​ប្រហែលជា​លែង​អាច​ជួយ​បាន​ទៀតហើយ​។

3. ព្យាយាម​អង្គុយ​ឱ្យ​ត្រង់​ខ្នង​ និង​កុំ​ចុច​ទូរស័ព្ទ​
បើ​អ្នកដឹងខ្លួន​ថា​ ខ្លួនឯង​ជា​មនុស្ស​ចូលចិត្ត​អង្គុយ​ធ្វើ​ខ្នងកោង​ ឬចុច​ទូរស័ព្ទ​ជាប់​ជានិច្ច​ខណៈ​ពេល​ធ្វើដំណើរ​នោះ​ អ្នក​គួរតែ​កាត់បន្ថយ​ទម្លាប់​នេះ​ទៅ​ ព្រោះ​កាលណា​អ្នក​ព្យាយាម​សម្លឹង​អេក្រង់​ទូរស័ព្ទ​ច្រើន​ អាច​ធ្វើ​ឱ្យ​អ្នក​វិលមុខ​ ហើយ​ការ​អង្គុយ​មិន​ត្រង់​ខ្លួន​កាន់តែ​ធ្វើ​ឱ្យ​សាច់ដុំ​កឡើង​រឹង​ និង​បណ្ដាល​ឱ្យ​កើតមាន​អាការ​ឈឺក្បាល​កើតឡើង​ទៀតផង​។ ខណៈ​ធ្វើដំណើរ​គួរតែ​ត្រៀមខ្លួន​ប្ដូរ​ឥរិយាបថ​ថែទាំ​សុខភាព​ឱ្យ​បាន​ល្អ​ទើប​ត្រឹមត្រូវ​។ អ្នក​គួរតែ​មាន​ខ្នើយ​ពាក់​-កតាម​ខ្លួន​ទើប​ជា​ការ​ប្រសើរ​ជាង​។

4. បញ្ហា​ភ្នែក​
ក្នុងអំឡុងពេល​ធ្វើដំណើរ​នៅពេល​ព្រឹក​ អាច​ធ្វើ​ឱ្យ​អ្នក​កើតមាន​អាការ​ដូចជា​ ធីងធោង​ គ្រុន​ក្តៅ​ ជាប់​-ក វិលមុខ​ ភាំង​ស្មារតី​ ស្រវាំង​ភ្នែក​ ពិបាក​និយាយ​ ឬគាំង​ដៃជើង​ និង​ស្ពឹក​រាងកាយ​ជាដើម​វា​អាច​បណ្តាល​មក​ពី​បញ្ហា​ភ្នែក​ បញ្ហា​វ៉ែនតា​ ឬការ​អង្គុយ​ខុស​លក្ខណៈ​។ នៅពេល​អ្នក​ឈឺក្បាល​ពេលព្រឹក​ នៅ​ខាងក្រោយ​ក្បាល​ ឬលើ​លលាដ៏​ក្បាល​ គឺ​អាច​បណ្តាល​មក​ពី​ជំងឺ​សរសៃឈាម​។ ខណៈ​ធ្វើដំណើរ​ ប្រសិនបើ​អ្នកមាន​បញ្ហា​ភ្នែក​ អ្នក​គួរតែ​ដោះ​វ៉ែនតា​ទុក​សិន​ ហើយ​ងាក​មក​ប្រើ​នៅ​ពេល​ចាំបាច់​វិញ​បាន​ហើយ​។ អនុវត្ត​តាមវិធី​នេះ​អាច​ជួយ​ឱ្យ​អ្នក​លែង​មាន​អាការ​ធីងធោង​ វិលមុខ​ឈឺក្បាល​បាន​។

5. ព្យាយាម​ជួយ​ខ្លួនឯង​
ប្រសិនបើ​អាច​ សូម​បើក​កញ្ចក់ឡាន​ ដើម្បី​ស្រូប​យក​ខ្យល់​បរិសុទ្ធ​។ នៅ​ឱ្យ​ឆ្ងាយ​ពី​អ្នក​ ដែល​មាន​អាការ​ពុល​ធីងធោង​ ឬអ្នក​ពុល​ឡាន​។ ការ​ស្តាប់​ឭអ្នកដទៃ​និយាយ​ពី​ការ​ពុល​ឡាន​ ឬមើល​ឃើញ​ពួកគេ​ពុល​ឡាន​ ក៏អាច​ធ្វើ​ឱ្យ​អ្នក​ពុល​ឡាន​បាន​ដូចគ្នា​ដែរ​។ ការ​តាំងស្មារតី​ក៏អាច​ជួយ​កាត់​បន្ថយ​អាការ​ពុល​ឡាន​បាន​ដែរ​ សម្រាប់​ការ​ធ្វើ​ដំណើរ​ក្នុង​ចម្ងាយ​ជិត​ ឬអាការ​ពុល​ឡា​នយូរៗ​ម្តង​។ អ្នក​ក៏អាច​ពិភាក្សា​ជាមួយ​គ្រូពេទ្យ​ ក្នុង​ការ​ចេញ​វេជ្ជបញ្ជា​ទិញថ្នាំ​ សម្រាប់​ការ​ធ្វើដំណើរ​ផ្លួវ​ឆ្ងាយ​ ឬក្នុងករណី​ដែល​អាការ​ជំងឺ​របស់​អ្នក​កាន់​តែ​ធ្ងន់ធ្ងរ​។ សូម​ចងចាំ​ថា​ ការប្រើ​ប្រាស់​ថ្នាំ​ការពារ​ពុល​ឡាន​អាច​បណ្តាល​ឱ្យ​អ្នក​ងងុយគេង​ ឬផ្តល់​ផល​ប៉ះពាល់​លើ​ផ្នែក​ផ្សេងទៀត​នៃ​រាងកាយ​របស់​អ្នក​។ ដូច្នេះ​ការប្រើ​ប្រាស់​ឱសថ​ គួរតែ​មាន​ការពិភាក្សា​ជាមួយនឹង​គ្រូពេទ្យ​ជំនាញ​ជាមុន​សិន​៕