ក្រុម​ជំងឺ 5ប្រភេទ​ ដែល​គួរ​ប្រយ័ត្ន​ក្នុងអំឡុង“រដូវភ្លៀង”

July 9, 2019​ ម៉ោង 9:57 am

រដូវភ្លៀង​ គឺជា​រដូវ​មួយទៀត​ដែល​សម្បូរ​ដោយ​ជំងឺ​គ្រោះថ្នាក់​ ព្រោះ​ដោយសារតែ​ភាព​សើម​ទទឹក​ និង​ធាតុអាកាស​ដែល​ក្ដៅ​ហប់​ ទើប​វា​ជា​អំឡុង​ពេល​ដែល​មេរោគ​ វីរុស​ និង​បាក់​តេ​រី​ផ្សេង​ៗចម្រើន​ធំធាត់​បាន​ល្អ​ រួម​ទាំង​ជំងឺឆ្លង​ដែល​មាន​ជាមួយនឹង​ទឹកភ្លៀង​ក៏​មាន​ច្រើន​ដូចគ្នា​ដែរ​។

ក្រុម​ជំងឺ​ 5ប្រភេទ​ដែល​ត្រូវ​ប្រយ័ត្ន​ក្នុង​អំឡុង​រដូវភ្លៀង​
ក្រុម​ទី1​ ជា​ជំងឺឆ្លង​ខាង​ប្រព័ន្ធ​ដង្ហើម​ជំងឺឆ្លង​ខាង​ប្រព័ន្ធ​ដកដង្ហើម​ មាន​ដូចជា​ជំងឺ​ផ្ដាសាយធំ​ ដែលគេ​ប្រទះឃើញ​នៅ​លើ​មនុស្ស​គ្រប់​អាយុ​ និង​ឃើញ​មាន​ឈឺធ្ងន់​នៅ​លើ​ក្មេង​តូច​ ចំណែក​ឯអ្នក​ស្លាប់​បាត់បង់ជីវិត​ភាគច្រើន​ជា​មនុស្សចាស់​ ឬអ្នក​កើតជំងឺ​រ៉ាំរ៉ៃ​។ចំណែក​ឯជំងឺ​ហើម​សួត​ ឬរលាក​សួត​វិញ​ បណ្ដាលមកពី​មេរោគ​វីរុស​ ឆ្លងតាម​ការ​ប៉ះពាល់​សំបោរ​ ទឹកមាត់​ ឬការ​ក្អក​កណ្ដាស់​ដាក់គ្នា​។ អាច​ការពារ​បាន​ដោយ​ការ​ថែរក្សា​សុខភាព​ គេង​សម្រាក​ឱ្យ​បាន​គ្រប់គ្រាន់​ ធ្វើ​ឱ្យ​រាងកាយ​កក់ក្ដៅ​ ឧស្សាហ៍​លាង​សម្អាត​ដៃ​ និង​មិន​ប្រើប្រាស់​របស់​ផ្ទាល់ខ្លួន​រួម​ជាមួយ​អ្នកដទៃ​។

ក្រុម​ទី2​ មាន​ជំងឺ​ 5យ៉ាងដែល​មាន​សត្វ​មូស​ជា​ភ្នាក់ងារ​ចម្លងរោគ​ជំងឺ​ដែល​មាន​សត្វ​មូស​ជា​ភ្នាក់ងារ​ចម្លងរោគ​មាន​ដូចជា​ ជំងឺគ្រុនឈាម​ ជំងឺ​គ្រុន​រលាក​ខួរ​ក្បាល​ ជំងឺគ្រុនចាញ់​ គ្រុន​ឈឺសន្លាក់​ដោយសារ​មូស​ខ្លា​ ជំងឺឆ្លង​ដោយ​មេរោគ​វី​រុ​សហ្ស៊ី​កា​… តែ​ទាំងអស់​នេះ​អាច​ការពារ​បាន​ដោយ​ការ​កម្ចាត់​ប្រភព​បន្ត​ពូជ​របស់​សត្វ​មូស​ និង​ការពារ​ខ្លួនឯង​មិន​ឱ្យ​ត្រូវ​មូស​ខាំ​។

ក្រុម​ទី3​ ជំងឺឆ្លង​តាមរយៈ​អាហារ​ និង​ទឹក​ជំងឺឆ្លង​តាម​អាហារ​ និង​ទឹក​ មាន​ដូចជា​ ជំងឺអាសន្នរោគ​ បណ្ដាលមកពី​មេរោគ​បាក់តេរី​ដែល​ប្រឡាក់ប្រឡូស​នៅក្នុង​អាហារ​ ទឹក​បរិភោគ​ ឬពី​សត្វ​រុយ​ដែល​ជា​ភ្នាក់ងារ​ចម្លងរោគ​។ចំណែក​ជំងឺ​រលាក​ថ្លើម​ប្រភេទA​ ឆ្លងតាម​រយៈ​ការ​ប៉ះពាល់​របស់របរ​ប្រើប្រាស់​ឡូកឡំ​គ្នា​ ទឹកមាត់​ និង​ឈាម​របស់​អ្នកជំងឺ​។ ជំងឺ​ទាំង2​ នេះ​អាច​ការពារ​បាន​ដោយ​ការ​ទទួលទាន​អាហារ​ដែល​ចម្អិន​ឆ្អិន​ល្អ​ ថ្មី​ៗ គ្មាន​សត្វ​រុយ​មក​រោម​ និង​អាហារ​នៅសល់​គួរ​កម្ដៅ​ឱ្យ​ក្ដៅ​ខ្លាំង​ មុននឹង​ទទួលទាន​ ចៀសវាង​ពី​អាហារ​ស្ទើរ​ឆ្អិន​ ស្ទើរ​ឆៅ​ ញ៉ាំទឹក​ស្អាត​ និង​ចាក់​វ៉ាក់សាំង​ការពារ​ជំងឺឆ្លង​។

ក្រុម​ទី4​ ជំងឺ​ឆ្លង​ផ្សេង​ៗជំងឺ​ឆ្លង​ផ្សេង​ៗ ដូចជា​ ជំងឺ​ដៃ​ ជើង​ មាត់​ ប្រទះ​ឃើញ​នៅ​លើ​កុមារ​ ដែល​រាតត្បាត​រៀងរាល់​ឆ្នាំ​ក្នុង​អំឡុង​រដូវភ្លៀង​ ដោយ​ឆ្លងតាម​រយៈ​ការ​ប៉ះពាល់​ទឹកសំបោរ​ ទឹកមាត់​ ឬលាមក​របស់​អ្នក​ជំងឺ​។ ចំណែក​ជំងឺ​លេប​តូ​ស្ប៉ៃ​រ៉ូ​ស៊ិស​ មេរោគ​បាក់តេរី​នឹង​ឆ្លង​ចូល​ទៅ​ក្នុង​រាងកាយ​មនុស្ស​តាមរយៈ​ស្នាមរបួស​ ស្នាម​ដាច់​រលាត់​ សាច់​ភ្នាស​ភ្នែក​ ច្រមុះ​ មាត់​ ឬត្បុល​ចូល​ទៅ​ក្នុង​ស្បែក​ដែល​ត្រាំទឹក​យូរ​រហូត​ទន់​។

ក្រុម​ទី5​ មហន្ត​ភ័យ​ក្នុង​រដូវភ្លៀង​
* គ្រោះថ្នាក់​ពី​ការ​ទទួលទាន​ផ្សិត​ពុល​ ដូច្នេះ​ទើប​មិន​គួរ​ទទួលទាន​ផ្សិត​ដែល​មិនធ្លាប់​ស្គាល់​ឡើយ​។
* គ្រោះថ្នាក់​ពី​សត្វ​មានពិស​ : គួរ​រៀបចំផ្ទះ​ឱ្យ​បាន​ស្អាត​ មិន​ឱ្យ​ក្លាយជា​ជម្រក​របស់​សត្វ​មានពិស​ ប្រុងប្រយ័ត្ន​នៅពេល​ដែល​ត្រូវ​ចូល​ទៅ​ក្នុង​ទីកន្លែង​ដែល​ស៊ុបទ្រុប​ គំនរ​ស្មៅ​ ឬគំនរ​ឈើ​ជាដើម​។
* ចំណែក​ឯមហន្ត​ភ័យ​ពី​ភ្លៀង​ផ្គរ​រន្ទះ​ : នៅ​ពេល​មាន​ភ្លៀង​ផ្គរ​រន្ទះ​ ចូរ​ពួន​សម្ងំ​នៅក្នុង​ទី​សុវត្ថិភាព​ ដូចជា​ក្នុង​អគារ​ខ្នាត​ធំ​ ហាម​ប្រើ​ទូរស័ព្ទ​ដៃ​នៅ​កណ្ដាល​ទីវាល​ខណៈ​កំពុង​កើតមាន​ព្យុះភ្លៀង​ផ្គរ​រន្ទះ​ ដោយសារតែ​វា​នឹង​នាំ​ក្រសែ​ចរន្ត​អគ្គិសនី​ចូល​មក​ក្នុង​ទូរស័ព្ទ​ដៃ​បាន​។
* បើកបរ​រថយន្ត​ដោយ​ក្ដី​ប្រុងប្រយ័ត្ន​ ដោយសារតែ​ពេល​ភ្លៀង​ធ្លាក់​ ផ្លូវថ្នល់​នឹង​រអិល​ ធ្វើ​ឱ្យ​រយៈ​ចម្ងាយ​នៃ​ការដែល​រថយន្ត​នឹង​ឈប់​ វែង​ជាង​ប្រក្រតី​ និង​ថែមទាំង​កាត់បន្ថយ​ទស្សនវិស័យ​មើលឃើញ​ក្នុង​ការ​បើកបរ​ទៀតផង​៕