មិនអាចបដិសេធបានឡើយថា នៅក្នុងអំឡុងខែតុលាទៅនេះ តែងតែមានការរៀបចំពិធីជប់លៀងផ្សេងៗ ជាពិសេសពិធីរៀបអាពាហ៍ពិពាហ៍គ្រប់ទីកន្លែងតែម្តង ចុះអ្នកវិញបានត្រៀមរៀបអាពហ៍ពិពាហ៍ជាមួយនឹងគូស្នេហ៍របស់អ្នកនាចុងឆ្នាំនេះហើយឬនៅ? ឬក៏កំពុងតែត្រៀមរៀបការនៅក្នុងផ្នែកផ្សេងៗយ៉ាងមមាញឹក មិនថាតែការជ្រើសរើសវត្ថុអនុស្សាវរីយ៍ ឈុតអាពាហ៍ពិពាហ៍ ថតរូប រួមទាំងអ្វីដែលអនាគតកូនក្រមុំត្រូវការផងដែរ នោះគឺការមានរូបរាងដ៏ល្អឥតខ្ចោះ ដើម្បីស្លៀកឈុតអាពាហ៍ពិពាហ៍ឱ្យបានស្រស់ស្អាតហ្នឹងឯង។
តែនឹងទៅសម្រកទម្ងន់មុនពេលរៀបការ2-3សប្តាហ៍ឱ្យបេះដូងវាភ័យអរៗធ្វើអី ព្រោះថាបើអនាគតកូនក្រមុំទាំងឡាយចាប់ផ្តើមមានផែនការសម្រកទម្ងន់នោះ គួរតែចាប់ផ្តើមពីពេលនេះតែម្តង ក្រៅពីអ្នកអាចធ្វើឱ្យក្តីស្រមៃក្លាយជាការពិតយ៉ាងមិនពិបាក និងមិនបាច់បង្ខំចិត្តហើយនោះ នៅមានពេលវេលាល្មមគ្រប់គ្រាន់សម្រាប់ការសម្រកទម្ងន់បានដោយមិនប៉ះពាល់ដល់សុខភាពរាងកាយទៀតផង។ ថ្ងៃនេះ ឡារ៉ែន មានតិចនិកល្អៗពីអ្នកស្រី Helen Bond អ្នកជំនាញការផ្នែកភោជនាហារពីប្រទេសអង់គ្លេសមកជម្រាបជូន តើមានអ្វីខ្លះនោះសូមតាមដានដូចតទៅ។
1. កំណត់គោលដៅដែលអាចធ្វើទៅរួច : សម្រាប់កូនក្រមុំគ្រប់រូប ការសម្រកទម្ងន់គួរឱ្យចង់សាកល្បង និងគួរឱ្យរីករាយ ការកំណត់គោលដៅដែលអ្នកអាចធ្វើបាននោះគឺជារឿងចាំបាច់ណាស់ ផ្ទុយទៅវិញបើអ្នកកំណត់គោលដៅដែលមិនងាយនឹងធ្វើបានសម្រេចនោះ វានឹងធ្វើឱ្យអ្នកអស់ទឹកចិត្ត អស់សង្ឃឹម និងបញ្ឈប់ការតាំងចិត្តយ៉ាងងាយ។ ឧទាហរណ៍ គោលដៅដែលអាចទៅរួច ដូចជា ខ្ញុំនឹងព្យាយាមសម្រកទម្ងន់ឱ្យបានពី 10ភាគរយនៃទម្ងន់ខ្លួនឱ្យបានក្នុងរយៈពេល3-6ខែជាដើម។
2. ត្រៀមចិត្តចាំទទួលថ្ងៃដែលអាក្រក់ឱ្យបាន : ក្រៅពីការងារប្រចាំហើយ នារីៗជាច្រើនអាចនឹងត្រូវរៀបផែនការពីពិធីមង្គលការជាមួយនឹងគូដណ្តឹង ដែលអាចមានថ្ងៃខ្លះដែលអ្វីៗគ្រប់យ៉ាងមិនដំណើរការទៅតាមផែនការ ឬគួរឱ្យខកបំណង ក៏សុំឱ្យត្រៀមចិត្តត្រៀមថ្លើមចាំទទួលថ្ងៃនោះឱ្យហើយផង កុំអស់សង្ឃឹម ឬបញ្ឈប់កណ្តាលទីឱ្យសោះ។
3. កត់កំណត់ត្រារាយមុខចំណីអាហារ និងអារម្មណ៍ក្នុងមួយថ្ងៃៗ : ព្រោះការសម្រកទម្ងន់នឹងមានលទ្ធផលបើអ្នកដឹងថាក្នុងមួយថ្ងៃៗអ្នកបានទទួលទានអ្វីខ្លះនោះ ដែលភាគច្រើនមនុស្សជាច្រើនមិនសូវជាកត់កំណត់ហេតុនោះទេ តែបើអ្នកមានកំណត់ហេតុវិញ នឹងធ្វើឱ្យមនុស្សយើងមានភាពប្រយ័ត្នប្រយែងក្នុងការទទួលទានអាហារកាន់តែខ្លាំងឡើងហ្នឹងឯង។
4. រក្សាកម្រិតជោគជ័យ : ទោះជាអ្នកបានតាំងគោលដៅជោគជ័យធំទុកជាមុនហើយមែន តែក៏គួរតាំងគោលដៅតូចៗទុកដែរ ដូចជា សុំឱ្យទម្ងន់ស្រកចុះក្នុងមួយខែ2ភាគរយនៃទម្ងន់ខ្លួនទាំងមូល និងឈានសន្សឹមៗទៅមុខទៀត នោះនឹងធ្វើឱ្យគោលដៅធំបានទទួលជោគជ័យយ៉ាងងាយ។
5. សម្លឹងពិភពលោកក្នុងន័យវិជ្ជមាន : សម្រាប់កូនក្រមុំ ការសម្លឹងពិភពលោកក្នុងន័យល្អ ជួយឱ្យការត្រៀមខ្លួនសម្រកទម្ងន់ក្លាយជារឿងដែលគួរឱ្យរីករាយ ហើយនឹងធ្វើឱ្យអ្នកមានសេចក្តីសុខជាមួយនឹងអាហារសម្រកទម្ងន់ដែលត្រូវទទួលទានទៀតផង។ ទាំងអស់ខាងលើនេះ គឺដើម្បីឱ្យនារីៗយើងទាំងអស់មានអំឡុងពេលនៃសេចក្តីសុខឱ្យបានច្រើន មិនចាំបាច់មានអារម្មណ៍តានតឹងធុញថប់រហូតដល់លែងស្អាតអស់នៅថ្ងៃរៀបមង្គលការ៕
