ចង់ទៅទស្សនាគយគន់ផ្កាចម្រុះពណ៌ដែលមិនឆ្ងាយពីប្រទេសយើងដែរទេ! មិនចាំបាច់ទៅដល់ប្រទេសជប៉ុន ចិន កូរ៉េ ឬប្រទេសហូឡង់នោះទេ គ្រាន់តែទៅទស្សនាតំបន់សួនផ្កានៅប្រទេសថៃក៏បានដែរ ហើយនៅជិតប្រទេសយើងស្រាប់ផង។ នៅក្នុងខែនេះ ទស្សនាវដ្តី ឡារ៉ែន នឹងនាំអារម្មណ៍លោកអ្នកទៅកាន់ពិភពសួនផ្កាចម្រុះពណ៌ក្នុងសួន CORO Field នាឱកាស “បុណ្យផ្កា”។
សួន CORO Field ត្រូវបានរចនាម៉ូដសួនច្បារឱ្យក្លាយជាសួនផ្កាដូចនៅប្រទេសជប៉ុន ហើយក៏បានរៀបចំពិធីបុណ្យផ្កា “Color De Fleur” ផងដែរ។ នៅក្នុងបរិយាកាសបុណ្យផ្កា ដែលមានលម្អដោយផ្កា Forget Me Not និងផ្កា Cleome ជាច្រើនដើម មិនថាតែពណ៌ស្វាយ ពណ៌ផ្កាឈូក និងពណ៌ទឹកសមុទ្រនោះទេ គឺសុទ្ធតែស្អាតៗទាំងអស់។ ផ្កាដ៏ស្រស់ឆើតឆាយទាំងនោះ នឹងធ្វើឱ្យអារម្មណ៍របស់អ្នកហោះហើរទៅកាន់ពិភពមួយផ្សេងទៀត ដែលឈ្លក់វង្វេងនឹងការថតរូប។ ទេសភាពនាបុណ្យផ្កានេះ ត្រូវបានប្រារព្ធធ្វើឡើងចាប់ដើមខែធ្នូ រហូតដល់ខែមករាតែប៉ុណ្ណោះ។
ក្រៅពីបុប្ផាស្រស់បំព្រងខាងលើហើយ សួនធម្មជាតិមួយនេះក៏មាននូវហាងកាហ្វេស្ទាយជប៉ុនមួយផងដែរ ដែលមានឈ្មោះថា “G.I.Y. Café” បើកលក់នូវប្រភេទភេសជ្ជៈផ្សេងៗ និងនំផ្អែមៗជាច្រើនស្ទាយ។ អ្វីដែលស្អាតប្លែកភ្នែកនោះគឺ ការឌីហ្សាញម៉ូដកាហ្វេ និងភេសជ្ជៈដោយប្រើផ្កាស្អាតៗដូចជា Sparkling White Yuzu , Pastel De Fleur, Afternoon Tea , Major Fleur Tea Set និង Simple Fleur Tea Set ជាដើម។
ក្រៅពីនេះ សួនផ្កានេះក៏មានសិក្ខាសាលាខ្លីៗស្ដីអំពីការដាំផ្កា និងការថែទាំងផ្កាផងដែរ។ ហើយក៏មានបង្ហាត់បង្ហាញឱ្យអ្នកចេះធ្វើការតុបតែងកែច្នៃផ្កា ដូចជា ច្នៃផ្កាក្រៀមធ្វើជាគ្រឿងតាំងលម្អ ខ្មៅដៃផ្កា សៀវភៅកំណត់ត្រាផ្កា ស៊ុមរូបភាពផ្កា និងកាតប៉ុស្តិ៍ស្ទឺរផ្កាជាដើម។ អ្វីដែលពិសេសជាងនេះទៅទៀតនោះគឺ ភ្ញៀវទេសចរក៏អាចភ្លក្សនូវរសជាតិផ្លែត្រសក់ស្រូវ ដែលនាំពូជពីប្រទេសជប៉ុនមានរសជាតិផ្អែមត្រជាក់ចិត្តតែម្ដង។ ប្រសិនបើមានចំណាប់អារម្មណ៍ចង់ទៅទស្សនា និងចូលរួមពិធីបុណ្យផ្កានេះ លោកអ្នកអាចស្វែងរកទីតាំងបានយ៉ាងងាយស្រួលនៅលើហ្កួលហ្កលផែនទី ឬនៅលើទំព័រហ្វេសប៊ុក CORO Field និងបើកឱ្យចូលទស្សនារៀងរាល់ថ្ងៃច័ន្ទ ដល់ថ្ងៃសុក្រ ពីម៉ោង9ព្រឹក ដល់ម៉ោង5ល្ងាច សម្រាប់ថ្ងៃសៅរ៍-អាទិត្យ ចាប់បើកពីម៉ោង9ព្រឹក ដល់ម៉ោង7យប់៕
