ជាទូទៅ នៅក្នុងផ្នត់គំនិតរបស់ប្រជាជនខ្មែរភាគច្រើនតែងតែមានភាពរអានៅក្នុងការហាមាត់និយាយពីបញ្ហាសិច។ ការប្រកាន់ខ្ជាប់បែបនេះមិនមែនជារឿងល្អនោះទេ ផ្ទុយទៅវិញ វារឹតតែសំខាន់បំផុតសម្រាប់អ្នកដែលមានជីវិតរស់នៅជាគូ ហើយវានឹងបង្កឱ្យក្លាយជាបញ្ហាធំនៅក្នុងជីវិត ខណៈបើមិនមានការវែកញ៉ែកដោយបើកចំហ ស្វែងរកដំណោះស្រាយនៅពេលមានបញ្ហាណាមួយកើតឡើង។ ចំពោះអាការគ្មានចំណង់ ឬអស់អារម្មណ៍សិច ត្រូវបានកើតមានយ៉ាងទូលាយ និងគ្រប់ជាតិសាសន៍ហើយក៏ជាក្ដីបារម្ភ ដែលអ្នកជំនាញកំពុងតែព្យាយាមសិក្សាស្វែងយល់ពីមូលហេតុបង្ក រួមជាមួយនឹងវិធីសាស្ត្រក្នុងការដោះស្រាយផងដែរ។
អ្នកជំនាញមួយចំនួនបានលើកឡើងថា ចំពោះការអស់ចំណង់ផ្លូវភេទ ឬគ្មានអារម្មណ៍សិចនេះ វាគឺជារឿងធម្មតា ដែលជាកត្តាធម្មជាតិនៅពេលដែលមនុស្សមានអាយុកាន់តែច្រើន ជា-ពិសេស ចាប់ពីជាង60ឆ្នាំឡើងទៅចំពោះមនុស្សស្រី ហើយអាយុចាប់70ឆ្នាំឡើងទៅចំពោះមនុស្សប្រុស។ ប៉ុន្តែក្នុងករណីដែលមនុស្សមានអាយុក្រោម60ឆ្នាំ ឬវ័យកណ្តាលពី35-50ឆ្នាំ អស់ចំណង់ផ្លូវភេទដែរនោះ វាគឺជាបញ្ហាដែលគួរតែយកចិត្តទុកដាក់។ កត្តាដែលជម្រុញឱ្យមានបញ្ហាអស់ចំណង់ផ្លូវភេទអាចបង្កមកពី ៖
ភាពមមាញឹកប្រចាំថ្ងៃ : មិនថាជាការងារក្នុងផ្ទះ ការមើលថែទាំកូន ការបំពេញការងារក្រុមហ៊ុន ឬការជួបជុំជាមួយមិត្តភក្ដិនោះទេ ការចំណាយពេលវេលាច្រើន គឺសុទ្ធតែជាកត្តាធ្វើឱ្យអារម្មណ៍ផ្លូវភេទបាត់បង់ដូចគ្នា។ ភាពនៅឆ្ងាយពីដៃគូគឺជាមូលហេតុដ៏សំខាន់ដែលធ្វើឱ្យដៃគូម្ខាងទៀតគិតថា អ្នកចាត់ទុករូបគេគ្រាន់តែជាមិត្តភាពតែប៉ុណ្ណោះ ខណៈដែលអ្នកមិនបានផ្តល់ពេលវេលាក្នុងការបង្កើតភាពផ្អែមល្ហែមដូចកាលគ្រាដែលអ្នកទើបតែភ្ជាប់សម្ព័ន្ធស្នេហ៍លើកដំបូង។ ជាដំណោះស្រាយ អ្នកគួរតែទុកពេលវេលាខ្លះសម្រាប់ខ្លួន សម្រាប់ដៃគូក្នុងការបង្កើតភាពផ្អែមល្ហែមជាមួយគ្នាខ្លះទើបជាដំណោះស្រាយដ៏ល្អប្រសើរ។
អារម្មណ៍ស្ត្រេស : នៅពេលដែលអ្នកមានភាពតឹងតែងក្នុងអារម្មណ៍ ឬព្រួយបារម្ភពីបញ្ហាការងារណាមួយ នោះចំណង់នៃការរួមភេទត្រូវបានក្លាយជាចំណុចចុងក្រោយគេបង្អស់។ បើអ្នកនៅតែគិតដោយគ្មានការបែងចែកឱ្យច្បាស់លាស់រវាងពេលវេលាធ្វើការ និងពេលវេលាសម្រាប់ខ្លួនឯង និងដៃគូនោះទេ បានន័យថាអ្នកកំពុងតែរុញច្រានសម្ព័ន្ធភាពដែលធ្លាប់តែផ្អែមល្ហែមឱ្យធ្លាក់កប់ជ្រៅទៅក្នុងសាគរជាក់ជាមិនខាន។ ដូច្នេះ ជាដំណោះស្រាយលោកអ្នកគួរតែមានភាពច្បាស់លាស់លើខ្លួនឯងក្នុងការចាកចេញពីភាពស្ត្រេសទាំងនោះ ហើយងាកមកផ្តល់ពេលវេលាសម្រាប់ដៃគូវិញ។
ភាពដែលៗ : ភាពដដែលៗវាគឺជាចំណុចមួយដែលសម្លាប់អារម្មណ៍។ ត្រង់នេះមានន័យថា ប្រសិនបើអ្នកប្រព្រឹត្តសិចជាមួយដៃគូដោយប្រើតែស្នៀតដដែលៗ ក្បាច់ដដែលៗ គឺគ្មានន័យនោះទេ។ លោកអ្នកគួរតែព្យាយាមអនុវត្តនូវវិធីផ្សេងៗទៀតដែលខុសពីសកម្មភាពដែលអ្នកធ្លាប់ប្រើជាប្រចាំ ដូចជា ប្ដូរពីក្បាច់ដូនតាទុកឱ្យដែលបុរសនៅពីលើមនុស្សស្រី មកជាមនុស្សស្រីជាអ្នកកាច់បង្កូតដោយអង្គុយនៅពីលើដៃគូជាបុរស ឬស្នៀតផ្សេងទៀត ដូចជា ការសម្រុកពីក្រោយ ពីចំហៀង ឬវិធីសាស្ត្រផ្សេងទៀតដែលអ្នកអាចច្នៃទៅតាមលទ្ធភាពអាចប្រព្រឹត្តទៅបាន។
ការទទួលទានអាហារប្រត្តិកម្ម : ការទទួលទានអាហារមិនមែនសុទ្ធតែអាចផ្តល់នូវភាពល្អប្រសើរចំពោះសុខភាពរាងកាយ និងសុខភាពផ្លូវភេទនោះទេ។ ផ្ទុយទៅវិញ វាក៏ជាឃាតករលាក់មុខដែលអាចវាយសម្លាប់អារម្មណ៍របស់អ្នកវិញ។ ចំណីអាហារដែលអាចជះឥទ្ធិពលអាក្រក់ដល់សុខភាពផ្លូវភេទរបស់អ្នករួមមានដូចជាស្រា បារី ស្ករសូកូឡា ស៊ុត និងកាហ្វេជាដើម។ ថ្វីដ្បិតអាហារប្រភេទជា ស៊ុត និងស្ករសូកូឡាវាបានផ្តល់ថាមពលដល់អ្នកក្រោយពេលទទួលទាន ប៉ុន្តែវាក៏ជះឥទ្ធិពលត្រឡប់មកវិញផងដែរខណៈបើការទទួលទានរបស់អ្នកមិនមានតុល្យភាពត្រឹមត្រូវ។
ជាចុងក្រោយយើងជឿជាក់ថា បន្ទាប់ពីលោកអ្នកបានស្វែងយល់ពីបញ្ហាបង្កឱ្យបាត់បង់ចំណង់សិច រួមជាមួយនឹងការផ្តល់នូវដំណោះស្រាយដូចបានជម្រាបជូនខាងលើនេះ ពិតជាអាចចូលរួមចំណែកក្នុងការកែខៃបញ្ហាមួយចំនួនឱ្យវិលត្រឡប់មកមានភាពល្អប្រសើរជាមិនខាន៕
