ក្រសួងសុខាភិបាលថ្មីៗនេះបានចេញសេចក្តីប្រកាសពីវិធានការណ៍ការពារជំងឺរលាកសួត មិនស្គាល់អត្តសញ្ញាណ មិនដឹងប្រភព និងមូលហេតុ ដែលកំពុងកើតឡើងនៅប្រទេសចិនឱ្យប្រជាជនប្រុងប្រយ័ត្នខ្លាចមានចម្លង ឬបង្ករហានិភ័យដល់ប្រជាជនកម្ពុជា។
នៅក្នុងសេចក្តីជូនដំណឹងក្រសួងបានបញ្ជាក់ថា សាធារណជន ជាពិសេសអ្នកធ្វើដំណើរទៅ ឬត្រលប់មកពីទីក្រុងវូហាន ខេត្តហ៊ុយបេ ប្រទេសចិនទាំងអស់ ព្រោះនៅតំបន់នេះមានជំងឺរលាកសួតមិនស្គាល់អត្តសញ្ញាកំពុងកើតឡើង។ ក្រសួងបញ្ជាក់ថាជំងឺចម្លែកនេះមិនទានកើតមាននៅប្រទេសកម្ពុជានៅឡើយទេ ហើយក្រសួងកំពុងតែតាមដានពីស្ថានភាពនៃការកើតមានករណីរលាកសួតមិនស្គាល់អត្តសញ្ញាណនេះ ក្រោយអង្គការសុខភាពពិភពលោកប្រចាំនៅកម្ពុជា (WHO) បានប្រកាសព័ត៌មានពីចំងឺរលាកសួតនេះដែលត្រូវបានគេរកឃើញនៅតំបន់ដែលបានបញ្ជាក់ខាងលើកាលពីថ្ងៃទី 31 ខែធ្នូ ឆ្នាំ2019។
រោគសញ្ញានៃជំងឺរលាកសួតមិនស្គាលអត្តសញ្ញាណនេះ គឺក្តៅខ្លួន រោគសញ្ញាហត់ ហើយក្រោយថតកាំរស្មីអ៊ិចបង្ហាញថាមានដំបៅសួតសងខាង។ លទ្ធផលបានពីមន្ទីរពិសោធន៍បានបញ្ចាក់ថា ជំងឺដែលកំពុងកើតឡើងនេះ មិនមែនជាចំងឺសា (SARS) ជំងឺផ្តាសាយបក្សី ជំងឺផ្តាសាយបង្ករដោយវីរុសអេដេណូ (adenovirus) ជំងឺ MERS ឬជំងឺផ្លូវដង្ហើមដទៃទៀតនោះទេ។ អង្គការ WHO បានបញ្ជាក់ថាមិនទាន់មានភស្តុតាងណាមួយបញ្ជាក់ពីការឆ្លងពីមនុស្សទៅមនុស្សនោះទេ តែពេលនេះអ្នកចំងឺទាំងអស់កំពុងត្រូវបានគ្រូពេទ្យតាមដាន និងដាក់ឱ្យនៅដាច់ពីគេ។
ជាការការពារទុកជាមុន ឯកឧត្តម ម៉ម ប៊ុនហេង រដ្ឋមន្ត្រីក្រសួងសុខាភិបាល បានអំពាវនាវឱ្យអ្នកដែលធ្វើដំណើរទៅ ឬវិលត្រឡប់មកពីទីក្រុងវ៉ូហាន ខេត្តហ៊ុយបេ ប្រទេសចិន សូមមានការប្រុងប្រយ័ត្នខ្ពស់។ ប្រសិនបើមានរោគសញ្ញាដូចជាគ្រុនក្តៅ ក្អក និងពិបាកដកដង្ហើម ទាំងក្នុងអំឡុងពេលធ្វើំដំណើរ ឬបន្តាប់ពីត្រឡប់មកវិញសូមទៅជួបវិជ្ជបណ្ឌិត។
ក្រសួងសុខាភិបាលបានបញ្ជាក់ថាបើទោះបីជាមិនទាន់មានកើតជំងឺចម្លែកនេះនៅកម្ពុជាក៏ដោយ តែក្រសួងនឹងដាក់ម៉ាស៊ីនស្កែនកម្តៅនៅអាកាសយានដ្ឋានអន្តរជាតិភ្នំពេញ ក្រុងព្រះសីហនុ និងសៀមរៀប រួមទាំងស្រាវជ្រាវករណីសង្ស័យដោយក្រុមចត្តាឡីស័កនៅតាមច្រកអាកាសយានដ្ឋានអន្តរជាតិ ព្រមទាំងរៀបចំបន្ទប់ដាក់អ្នកជំងឺឱ្យដាច់ដោយឡែកនៅមន្ទីរពេទ្យមិត្តភាពខ្មែរ-សូវៀត មន្ទីរពេទ្យខេត្តព្រះសីហនុ និងមន្ទីរពេទ្យខេត្តសៀមរាប៕
