តើស្រ្តីមានផ្ទៃពោះជិះយន្តហោះបានដែរ ឬទេ?

យើង​ប្រហែលជា​ធ្លាប់​បានឮ​ពី​ជំនឿ​កាលពី​បុរាណ​ដែល​ពាក់ព័ន្ធ​នឹង​ការ​ហាមប្រាម​មិន​ឱ្យ​ស្រ្តី​ធ្វើ​ក្នុងអំឡុងពេល​មានគភ៌​។ វា​ជា​ការ​ហាមប្រាម​ធម្ម​តាៗ​ និង​រឿង​ជាច្រើន​ទៀត​ តាំង​ពី​ហាម​កាន់​កន្ត្រៃ​ រហូត​ទៅដល់​ហាម​លាប​ពណ៌​សក់​ជាដើម​ ហើយ​លោកអ្នក​ក៏​ប្រហែលជា​ធ្លាប់​បានឮ​ដែរ​ហើយ​ថា​ ស្ត្រី​មានគភ៌​ត្រូវ​បាន​ហាម​មិន​ឱ្យ​ជិះ​យន្តហោះ​ឡើយ​ តើ​ជា​រឿង​ពិត​ឬ ដែលគេ​និយាយ​ថា​ ការ​ធ្វើដំណើរ​ដោយ​យន្តហោះ​ក្នុងអំឡុងពេល​មានផ្ទៃពោះ​នឹង​បង្ក​ឱ្យ​មាន​គ្រោះថ្នាក់​នោះ​? ដូច្នេះ​សរុប​ថា​តើ​ស្រ្តី​មានផ្ទៃពោះ​ជិះ​យន្តហោះ​បាន​ដែរ​ឬទេ​? ឡា​រ៉ែ​ន មាន​ចម្លើយ​សម្រាប់​សំណួរ​នេះ​…។

អ្នកជំនាញ​ការ​ផ្នែក​សុខភាព​ស្រ្តី​ បាន​រៀបរាប់​ផ្ទុយពី​ចំណុច​ហាម​ប្រាម​ចាស់​ៗដែល​លោកអ្នក​ធ្លាប់​បានឮ​មក​នោះ​ថា​ នៅក្នុង​ផ្នែក​ជំនួញ​ ការ​ធ្វើ​ដំណើរ​ដោយ​យន្តហោះ​ មិន​មាន​ភាព​ប្រថុយប្រថាន​ជាពិសេស​ណាមួយ​សម្រាប់​ស្ត្រី​មានគភ៌​ដែល​មាន​សុខភាព​រឹងមាំ​ល្អ​ ឬសូម្បីតែ​ទារក​នៅក្នុង​ផ្ទៃ​នោះ​ឡើយ​ តែ​ហេតុផល​ធំ​ចម្បង​នោះ​គឺ​ ជា​ក្តី​កង្វល់​របស់​ក្រុមហ៊ុន​អាកាសចរណ៍​នោះ​ទៅ​វិញ​ទេ​ ព្រោះ​មាន​ភាព​អាច​ទៅរួច​ច្រើន​ដែល​ស្រ្តី​មានគភ៌​នឹង​ប្រសូត​បុត្រ​នៅក្នុង​យន្តហោះ​ដែល​កំពុង​ហោះហើរ​ ដែល​ធ្វើ​ឱ្យ​ក្រុមហ៊ុន​អាកាសចរណ៍​នោះ​ត្រូវ​ចេញថ្លៃ​ចាយវាយ​បន្ថែម​តាមច្បាប់​កំណត់​និង​ថែមទាំង​ជា​ការ​រុក​គួ​នរំ​ខាន​អ្នកដំណើរ​ដទៃទៀត​ផង​ដែរ​។

គន្លឹះ​សំ​ខាន់​ៗសម្រាប់​អ្នកម្តាយ​មានគភ៌​ខណៈ​ជិះ​យន្តហោះ​
1. ក្រោក​ឡើង​ដើរ​រយៈ​ចម្ងាយ​ខ្លី​ៗតាមផ្លូវ​ដើរ​នៅក្នុង​យន្តហោះ​រៀងរាល់30នាទី​ម្តង​ បើសិន​ជា​មាន​សុវត្ថិ​ក្នុង​ការ​ធ្វើ​។
2. សណ្តូកជើង​ឱ្យ​ត្រង់​ និង​ធ្វើ​ចលនា​ជើង​បែប​ អៃ​ហ្សូ​មេ​ធ្រិ​ក(Isometric​)។
3. ញ៉ាំទឹក​ឱ្យ​បាន​ច្រើន​។
4. ជ្រើសរើស​កន្លែង​អង្គុយ​ដែល​នៅ​ក្បែរ​បន្ទប់ទឹក​។
5. គួរ​បំពាក់​ខ្សែក្រវាត់​សុវត្ថិភាព​ឱ្យ​ទាប​ ម្តុំ​ជុំវិញ​ឆ្អឹងត្រគាក​រហូត​ក្នុង​ការ​ធ្វើដំណើរ​។
6. ចៀសវាង​អាហារ​ដែល​ធ្វើ​ឱ្យ​កើតមាន​ហ្កាស​ និង​អាហារ​ដែល​បម្រើ​នៅក្នុង​យន្តហោះ​ ព្យាយាម​យក​អាហារ​របស់​ខ្លួនឯង​ទៅ​ទុក​ទទួលទាន​។
ការ​ធ្វើដំណើរ​ក្នុងរយៈ​ដំបូង​នៃ​ការ​មានគភ៌​មាន​សុវត្ថិភាព​ តែ​អ្វី​ដែល​គួរ​ប្រុងប្រយ័ត្ន​នោះ​គឺ​ អាការ​ពាក់ព័ន្ធ​នឹង​ការ​មានគភ៌​ ដូចជា​ អាការ​ចាញ់កូន​ដែល​អាច​កាន់តែ​យ៉ាប់​ឡើង​ ដូច្នេះ​អ្នក​គួរ​មាន​ថង់​សម្រាប់​ក្អួត​នៅ​ជិត​ខ្លួន2​-3ជាស្រេច​។
មាន​ស្រ្តីជា​ច្រើន​មាន​អារម្មណ៍​ថា​ សប្បាយ​និង​ស្រួលខ្លួន​ល្អ​ឡើងវិញ​នៅក្នុង​អំឡុង​ត្រីមាស​ទី2នៃ​ការ​មានគភ៌​ អាការ​ចាញ់កូន​របស់​អ្នក​បាត់​ទៅវិញ​ហើយ​ នៅក្នុង​ត្រីមាស​នេះ​មាន​ភាព​ប្រថុយប្រថាន​តិច​បំផុត​ក្នុង​ការ​ប្រសូត​មុន​កំណត់​ ទើប​មិន​មែន​ជា​រឿង​ប្លែក​ឡើយ​ដែល​ស្រ្តីជា​ច្រើន​ឆ្លៀតឱកាស​នេះ​ធ្វើដំណើរ​ទៅ​កម្សាន្ត​ទី​ឆ្ងាយ​ តែ​យ៉ាងណា​ក៏ដោយ​អ្នក​គួរ​ប្រយ័ត្ន​រឿង​ប្រព័ន្ធ​ឈាម​រត់​ផង​ យើង​មាន​ពាក្យណែនាំ​ដើម្បី​ជួយ​ឱ្យ​លំហូរ​វិល​របស់​ឈាម​ដំណើរការ​ទៅ​យ៉ាង​ប្រក្រតី​ដូច​ខាងក្រោម​ ៖
– ស្លៀក​សម្លៀកបំពាក់​ណា​ដែល​ធូររលុង​សប្បាយ​ស្រួលខ្លួន​។
– ពាក់​ស្រោម​បារ​ដែល​មាន​ភាព​រឹប​ ដើម្បី​ជួយ​បង្កើន​ការ​ហូរ​វិល​របស់​ឈាម​ពីក​ជើង​ទៅ​រក​បេះដូង​ និង​សួត​របស់​អ្នក​។
– ចៀសវាង​ការ​អង្គុយ​គង​អន្ទាក់ខ្លា​។
– ទទួលទានទឹក​ឱ្យ​បាន​ច្រើន​ ដើម្បី​រក្សា​ភាព​ស្រស់បស់​នៅក្នុង​រាងកាយ​។រឿង​មួយ​ដែល​ជួយ​រក្សា​លំហូរ​វិល​របស់​ឈាម​បាន​ច្រើន​នោះ​ គឺ​ ការ​ធ្វើ​ចលនា​រាងកាយ​ ដោយ​ការ​ក្រោក​ឡើង​ដើរ​នៅ​តាមផ្លូវ​ដើរ​ក្នុង​យន្តហោះ​ សណ្តូកជើង​ និង​ពង្រឹង​សាច់ដុំ​ជើង​រៀងរាល់​កន្លះ​ម៉ោង​ម្តង​ បង្វិល​កជើង​ទៅមក​ និង​កម្រើក​ម្រាមជើង​ អ្វី​ទាំងអស់​នេះ​គឺជា​ឧទាហរណ៍​តូច​ៗដែល​អ្នក​អាច​ធ្វើ​បាន​នៅនឹង​កន្លែង​ដែល​អ្នក​អង្គុយ​ ដោយ​មិន​រំខាន​អ្នក​ដែល​អង្គុយ​នៅ​ក្បែរ​ខ្លួន​ឡើយ​៕

Advertisement