ព្រឹត្តិការណ៍តាំងពិព័រណ៍អចលនទ្រព្យ និងលំនៅដ្ឋានប្រចាំឆ្នាំ2019 ដែលបានប្រព្រឹត្តទៅចាប់់ថ្ងៃទី4 ដល់5តុលា ឆ្នាំ2019 នេះ ទទួលបានការចូលរួមតាំងបង្ហាញ នៃអ្នកជំនួញវិស័យអចលនទ្រព្យយ៉ាងច្រើន ក្នុងគម្រោងអភិវឌ្ឍពីសំណាក់ក្រុមហ៊ុនជាតិ អន្តរជាតិប្រមាណ 70ក្រុមហ៊ុននិង ទទួលបានការចាប់អារម្មណ៍ពីសាធារណជនទូទៅ។
កាន់តែពិសេសជាងនេះទៅទៀត អ្នកចូលរួមក៏អាចប្រើប្រាស់ឱកាសនេះ ដើម្បីធ្វើការសិក្សាពីឱកាស ភាពរីកចម្រើន និងសក្តានុពលនានាសម្រាប់ការវិនិយោគទៅលើវិស័យអចលនទ្រព្យនៅ ប្រទេសកម្ពុជា ដែលជាវិស័យមួយកំពុងទទួលបានការចាប់អារម្មណ៍ និងរីកចម្រើនឥតឈប់ឈរ។
ក្រៅពីមានគោលបំណងប្រមូលផ្ដុំ អ្នកដែលស្វែងរក ឬមានគោលបំណងចង់ទិញអចលនទ្រព្យ ឱ្យមកជួបជាមួយម្ចាស់គម្រោងផ្ទាល់ ពិព័រណ៍នេះក៏មានគោលបំណង ចង់ចែករំលែកចំណេះដឹង និងផ្ដល់ការអប់រំពីវិស័យអចលនទ្រព្យទៅដល់សាធារណជន តាមរយៈវគ្គសិក្ខាសាលាជាច្រើនដែលនឹងត្រូវធ្វើបទបង្ហាញ ដោយអ្នកជំនាញសំខាន់ៗទៅលើប្រធានបទមួយចំនួន ជុំវិញនិន្នាការទីផ្សារអចលនទ្រព្យឱកាសវិនិយោគ ច្បាប់ និងគន្លឺះនៃការវិនិយោគ ដែលអាចជៀសវាងហានីភ័យ។
វាគ្មិនសំខាន់ៗទាំងនេះរួមមាន៖
លោក ឧកញ៉ា ចេង ខេង ប្រធានក្រុមប្រឹក្សាភិបាលក្រុមហ៊ុន CPL Cambodia អចលនទ្រព្យនៅក្នុងប្រទេសកម្ពុជា មានការរីកចំរើន ជាពិសេសគឺទីអចលនទ្រព្យនៅក្នុងទីក្រុងភ្នំពេញ។ ក្រុមអ្នកអភិវឌ្ឍន៍ជាច្រើនបាន នឹងកំពុងផ្តោតសំខាន់នៅក្នុងខេត្តព្រះសីហនុ តែកាលពីកន្លងទៅ រដ្ឋាភិបាលបានបិទល្បែងអនឡាញ និងមិនចេញអាជ្ញាប័ណ្ណ លើការប្រកបមុខរបរវិស័យអនឡាញនេះនៅក្នុងខេត្ត ធ្វើឱ្យអ្នកវិនិយោគ បែរមកចាប់អារម្មណ៍លើការវិនិយោគនៅក្នុងទីក្រុងភ្នំពេញ។
លោក ឧកញ៉ា បានបញ្ជាក់ថា៖«ការរីកចម្រើននៅក្នុងខេត្តព្រះសីហនុមានល្បឿនលឿន និងមានសក្តានុពល ដូច្នេះរាជរដ្ឋភិបាលមានការគិតគូរយ៉ាងល្អិតល្អន់ អំពីបញ្ហាដែលនឹងជួបប្រទះ ដូច្នេះការបិទល្បែងអនឡាញ ជាការបង្ហាញថាការវិនិយោគអចលនទ្រព្យ មិនមែនដោយសារល្បែងអនឡាញនោះទេ ដែលសាធារណជនមិនគួរបារម្ភឡើយ គឺវិស័យនេះនៅខេត្តព្រះសីហនុនៅតែរឹងមាំ។
លោកឧកញ៉ា ចេង ខេង អគ្គនាយកក្រុមហ៊ុនវាយតម្លៃអចលនទ្រព្យ CPL បានបញ្ជាក់បន្ថែមថា៖«ចំណេះដឹងពីការវិនិយោគនៅខេត្តព្រះសីហនុផងដែរ ដោយលោកឧកញ៉ាលើកឡើងថា ការចាកចេញរបស់ចិន ក្រោយរដ្ឋាភិបាលប្រកាសបិទហ្គេមអនឡាញ វានឹងមិនធ្វើឱ្យប៉ះពាល់ដល់វិស័យអចលនទ្រព្យនៅក្នុងខេត្តនេះទេ តែផ្ទុយទៅវិញអ្នកវិនិយោគ គួរតែបង្កើនការវិនិយោគវិស័យអចលនទ្រព្យ តែផ្ដោតទៅលើវិស័យទេសចរណ៍ជំនួសវិញ ដោយសារតែខេត្តនេះ ជាខេត្តដែលមានសក្ដានុពលខ្ពស់លើវិស័យទេសចរណ៍។
លោក ឧកញ៉ា សៀ ឬទ្ធី ប្រធានក្រុមប្រឹក្សាភិបាលក្រុមហ៊ុន World Bridge Group បានមានប្រសាសន៍ឱ្យដឹងថា ការវិនិយោគលើវិស័យអចលនទ្រព្យអាចធ្វើឱ្យកើនទ្រព្យច្រើនក្នុងពេលដ៏ខ្លី ប៉ុន្តែវាក៏អាចធ្វើឱ្យជួបហានិភ័យផងដែរ ប្រសិនបើការវិនិយោគ មិនត្រូវបានធ្វើប្រកបដោយភាពជំនាញ។
លោកឧកញ៉ាបានលើកជាឧទាហរណ៍ថា៖«បើជាអ្នកទិញដី ត្រូវតែដឹង និងយល់ច្បាស់ពីព័ត៌មាននានាដែលពាក់ព័ន្ធនឹងតំបន់ និងគម្រោងអភិវឌ្ឍន៍។ ត្រូវតែប្រាកដថា ជាដីស្របច្បាប់ មានកម្មសិទ្ធិច្បាស់លាស់ និងត្រឹមត្រូវ កុំទិញដីដែលមានជម្លោះ បើទោះជាតម្លៃថោកក៏ដោយ»។
វិនិយោគិនបរទេសលោក Raymond Chio ប្រធានក្រុមហ៊ុន Prestrige Homes Cambodia បានអះអាងថា ទីផ្សារអចលនទ្រព្យនៅភាគខាងត្បូងនៃទីក្រុងភ្នំពេញ កំពុងមានការីកចំរើនយ៉ាងខ្លាំងនាពេលបច្ចុប្បន្ន ដោយសារមានគម្រោងវិយោគធំៗជាច្រើន បាននឹងកំពុងអភិវឌ្ឍន៍នៅតំបន់នេះ។
លោក Raymond បន្តថា៖« អចលនទ្រព្យនៅទីក្រុងភ្នំពេញ គឺជាចំណុចកណ្តាល និងសក្តានុពលខ្ពស់ ដែលអ្នកវិនិយោគមកពីគ្រប់ទិសទី បាននឹងកំពុងចាប់អារម្មណ៍យ៉ាងខ្លំាង” ។ លោកបន្តថា “វិស័យអចលនទ្រព្យនៅទិសទាំង៤នៃទីក្រុងភ្នំពេញ មានទិសខាងលិចខាងកើត ខាងជើង និងខាងត្បូង បាននឹងកំពុងរីកចំរើន តែសម្រាប់វិស័យអចលនទ្រព្យនៅទិសខាងត្បូងបាននឹងកំពុងមានការរីកចំរើនខ្លាំងជាបណ្តាទិសទាំងនោះ”។
លោកសន សៀបនាយកប្រតិត្តិក្រុមហ៊ុន Key Real Estate បានមានប្រសាសន៍ថា ពិព័រណ៍អចលនទ្រព្យឆ្នាំ2019 នឹងចូលរួមចំណែកលើកកម្ពស់ដល់វិស័យអចលនទ្រព្យតាមរយៈការជួយផ្សព្វ ផ្សាយពីគម្រោង និងផ្តល់ព័ត៌មានទៅដល់សាធារណៈជន អ្នកវិនិយោគ អ្នកទិញ និងភ្នាក់ងារអចលន ទ្រព្យ។
លោកបានធ្វើបទបង្ហាញចែករំលែកអំពីការវិវត្ត នៃទីផ្សារអទចលនទ្រព្យ និន្នាការ ទិសដៅវិនិយោគ និងការព្យាករពីតំបន់វិនិយោគសក្តានុពលនៅជុំវិញទីក្រុងភ្នំពេញនាពេលអនាគត។ត្រូវស្វែងយល់ពីគម្រោងអភិវឌ្ឍន៍របស់រដ្ឋាភិបាលថា តើនឹងឆ្ពោះទៅទិសខាងណា មានលំហូរប្រជាជនរស់នៅឬទេ?មានគម្រោងអភិវឌ្ឍធំៗដូចជាគម្រោងបុរី គម្រោងសំណង់អគារពាណិជ្ជកម្ម ឬគម្រោងក្លាយជាតំបន់ឧស្សាហកម្មជាដើម។ នៅពេលដែលយើងបានដឹងទាំងអស់នេះ ត្រូវនឹងគម្រោងនៃការវិនិយោគរបស់អ្នក ហើយមុននឹងទិញអ្នកវិនិយោគត្រូវតែសិក្សា នោះអ្នកនឹងមិនត្រូវជួបភាពបរាជ័យទេ។
លោកសៀប ជឿជាក់ថា ពិព័រណ៍អចលនទ្រព្យឆ្នាំ2019នេះ ជាឱកាសល្អមួយ សម្រាប់អ្នក ចូលរួមអាចស្វែងរកព័ត៌មានគន្លឹះសំខាន់ៗ នៅពេលពួកគេចង់ធ្វើការវិនិយោគ ទៅលើគម្រោងអច លនទ្រព្យណាមួយនៅតំបន់ណាមួយ៕
