កាលពីពេលថ្មីៗនេះ ក្រុមហ៊ុន CPL បានរៀបចំកម្មវិធី BBQ នៅ Cambodian Country Club (CCC) ដើម្បីផ្តល់ឱកាសឱ្យអ្នកវិនិយោគ សហគ្រិន និងអ្នកទិញអចលនទ្រព្យបានជួបជុំគ្នា និងចំណាយពេលវេលាដ៏មានតម្លៃជាមួយក្រុមគ្រួសាររបស់ពួកគេ។
ខុសពីកម្មវិធីនានាដែលធ្វើឱ្យអាណាព្យាបាល និងកូនៗមិនបាននៅជួបជុំគ្នា តែកម្មវិធីដែលរៀបចំឡើងដោយ CPL និង CCC នេះ ត្រូវបានបង្កើតឡើងក្នុងបរិយាកាសដ៏អស្ចារ្យមួយ គឺបញ្ចូលគ្នារវាងពិភព2 គឺអាណាព្យាបាល និងកូនៗ ជាមួយនឹងកម្មវិធីទំនាក់ទំនងដ៏ល្អក្នុងអាជីវកម្ម ក៏ដូចជាអ្នករកស៊ីផ្នែកអចលនទ្រព្យដែរ។ កម្មវិធីនេះមានការចូលរួមពីភ្នាក់ងារអចលនទ្រព្យ និងក្រុមគ្រួសារដ៏គួរឱ្យគោរពរបស់ពួកគេ ដែលអនុញ្ញាតឱ្យគេរីករាយជាមួយនឹងក្រុមគ្រួសារប្រកបដោយភាពកក់ក្តៅ។
ភ្ញៀវដែលអញ្ជើញចូលរួមកម្មវិធីទាំងអស់ ត្រូវបានទទួលស្វាគមន៍យ៉ាងរាក់ទាក់ពីក្រុមការងាររបស់ CPL និងទទួលបានការផ្ដល់ជូននូវកម្មវិធីជាច្រើនពី CCC ដែលមានដូចជាការលេង tennis, badminton, ការជិះសេះ ការរៀបចំសិល្បៈប៉ឺតប៉ោង គំនូរលើមុខ និងការជិះសេះតូចៗសម្រាប់កុមារ (pony riding)ផងដែរ។
លោកឧកញ៉ា ចេង ខេង អគ្គនាយក និងជាស្ថាបនិកនៃក្រុមហ៊ុន CPL បានថ្លែងសុន្ទរកថាស្វាគមន៍ដោយបង្ហាញពីចក្ខុវិស័យរបស់ក្រុមហ៊ុន CPL និងពន្យល់ពីអនាគតដ៏ប្រសើររបស់ប្រទេសដែលពឹងផ្អែកលើសមត្ថភាពរបស់មនុស្សជាច្រើនក្រុម ដែលរួបរួមគ្នាដើម្បីលើកស្ទួយកំណើនសេដ្ឋកិច្ច ដោះស្រាយបញ្ហាប្រឈម និងជំរុញឱកាសពាណិជ្ជកម្មឱ្យកាន់តែប្រសើរនៅក្នុងទីផ្សារបច្ចុប្បន្ន។ លោកឧកញ៉ា ក៏បានចែករំលែកផងដែរ ពីការងារនៅក្នុងវិស័យអចលនទ្រព្យ និងអត្ថប្រយោជន៍នៃការប្រើប្រាស់បច្ចេកវិទ្យារបស់ប្រទេសអ៊ីស្រាអែល ដែលនឹងនាំមកកម្ពុជាក្នុងពេលឆាប់ៗនេះដើម្បីជួយកសិករក្នុងការអភិវឌ្ឍសកម្មភាព និងសមត្ថភាពរបស់ពួកគាត់។
ស្របជាមួយគ្នានេះដែរ ដៃគូគម្រោងដ៏សំខាន់មួយរបស់ក្រុមហ៊ុន CPL Morgan En Mainson បានធ្វើបទបង្ហាញពីចក្ខុវិស័យនៅក្នុងការអភិវឌ្ឍអចលនទ្យព្យនៅកម្ពុជា ក៏ដូចជាកាលានុវត្តភាពពាណិជ្ជកម្មនៃគម្រោងអភិវឌ្ឍន៍ប្រកបដោយសក្តានុពលរបស់គាត់ថ្មីៗនេះផងដែរ។
អ្នកនាង Lea Bogatin នាយិកាផ្នែកលក់ និងទីផ្សារនៃក្រុមហ៊ុន CPL បានលើកឡើងថា ទីផ្សារអចលនទ្រព្យបច្ចុប្បន្ននេះ មានភាពប្រែប្រួល មនុស្សមិនមែនគ្រាន់តែចង់បានឱកាសវិនិយោគល្អនោះទេ តែពួកគេក៏ចង់បានសេវាកម្មជូនចំពោះអតិថិជនដ៏ល្អផងដែរ ដែលនេះជាចំណុចសំខាន់សម្រាប់យើងទាំងអស់គ្នាក្នុងការយកចិត្តទុកដាក់។ ដោយហេតុនេះហើយ ទើបយើងបានផ្លាស់ប្តូរជាវិជ្ជមានឆ្ពោះទៅរកចរន្តនៃការរៀបចំសកម្មភាពល្អ និងរៀបចំគម្រោងដោយមានភាពល្អឯកផ្ទាល់ខ្លួន ដើម្បីបង្ហាញទៅសាធារណជនឱ្យឃើញពីភាពល្អប្លែកគេរបស់យើងនេះ៕
