ខ្សែប្រយុទ្ធ Harry Kane បានរកគ្រាប់បាល់ឈ្នះនៅពេលជិតបញ្ចប់ការប្រកួតសម្រាប់ក្រុមបាល់ទាត់ជម្រើសជាតិអង់គ្លេស កាលពីថ្ងៃចន្ទ តាមរយៈការតែតបាល់បញ្ចូលទីយ៉ាងល្អនៅនាទីបន្ថែម ក្នុងការប្រកួតបើកឆាកនៃយុទ្ធនាការ World Cup របស់ពួកគេ ក្រោយពីក្រុមបាល់ទាត់ជម្រើសជាតិបែលហ្ស៊ិក ផ្តួលក្រុមជម្រើសជាតិប៉ាណាម៉ា ក្នុងការប្រកួតមួយគូមុននេះ។
គ្រាប់បាល់ទី2 របស់ Kane ក្នុងការប្រកួតនេះ បានជួយឱ្យក្រុមរបស់គេទទួលជ័យជម្នះ 2-1 ក្រោយពីវាហាក់បង្ហាញថា ក្រុមជម្រើសជាតិអង់គ្លេស បានខ្ជះខ្ជាយឱកាសជាច្រើនក្នុងការបាត់បង់ 3ពិន្ទុទៅហើយ បន្ទាប់ពីក្រុមជម្រើសជាតិទុយនីស៊ី តាមស្មើវិញនៅរយៈពេល 20នាទីចុងក្រោយនៃតង់ទី1។ Kane បានឱ្យដឹងថា៖ «ខ្ញុំពិតជាមានមោទនភាពណាស់ចំពោះមិត្តួរួមក្រុមទាំងអស់។ ពួកគេបានរក្សាការឆ្ពោះទៅមុខ និងរក្សាការប្រជែងរហូតដល់វិនាទីចុងក្រោយ។ ខ្ញុំពិតជារំភើបណាស់ ក្រុមការងារទាំងអស់ក៏រំភើបដែរ។ វាបង្ហាញពីឥរិយាបថដ៏ល្អក្នុងការបំពេញការងារនេះ»។
លោក Roberto Martinez គ្រូបង្វឹកនៃក្រុមបាល់ទាត់ជម្រើសជាតិបែលហ្ស៊ិក បានកោតសរសើរទម្រង់លេងរបស់ក្រុមលោក ក្រោយពីពួកគេបានជម្នះលើបញ្ហាលំបាកក្នុងតង់ទី1 ដើម្បីផ្តួលក្រុមជម្រើសជាតិប៉ាណាម៉ា យ៉ាងចាស់ដៃក្នុងលទ្ធផល 3-០ ក្នុងការប្រកួតបើកឆាកនៃយុទ្ធនាការ World Cup របស់ពួកគេ កាលពីថ្ងៃចន្ទ។លោក Martinez បានឱ្យដឹងថា៖ «គ្រាប់បាល់ទី1 ពិតជាសំខាន់ណាស់។ វាគឺជាការជំរុញស្មារតីដ៏ធំមួយសម្រាប់ក្រុមយើង ហើយវាផ្តល់ឱ្យអ្នកនូវភាពធូរស្រាលសម្រាប់ការប្រកួតលើកទី1 របស់អ្នកក្នុងយុទ្ធនាការនេះ ហើយខ្ញុំបានគិតត្រង់ចំណុចនោះថា យើងកាន់តែលេងល្អ និងកាន់តែគ្រប់គ្រងបាល់បានច្រើន»។ ស្របពេលជាមួយគ្នានេះ ក្រុមជម្រើសជាតិស៊ុយអែត បានផ្តួលក្រុមជម្រើសជាតិកូរ៉េខាងត្បូង ក្នុងលទ្ធផល 1-០ ក្រោយពីមានគ្រាប់បាល់ប៉េណាល់ទី1 ក្នុងតង់ទី2 ដែលបានកើតឡើងដោយសារតែប្រព័ន្ធវីដេអូជំនួយការអាជ្ញាកណ្តាល(VAR)៕
ប្រភពពី៖ The Sun Daily
