កីឡាករប្រដាល់ជើងចាស់ Floyd Mayweather បានប្រកាសថា រូបគេនឹងបញ្ចប់ការចូលនិវត្តន៍ ដើម្បីប្រកួតសងសឹកជាមួយនឹងកីឡាករ Manny Pacquiao របស់ហ្វីលីពីន នៅចុងឆ្នាំនេះ។
Mayweather បានប្រកាសពីគម្រោងនៃការប្រកួតសងសឹកមួយនេះ នៅលើបណ្តាញសង្គម Instagram កាលពីយប់ថ្ងៃសៅរ៍។ Mayweather បានសរសេរនៅលើបណ្តាញសង្គម Instagram ថា៖ «ខ្ញុំនឹងវិលត្រឡប់ទៅវិញដើម្បីប្រកួតជាមួយនឹង Pacquiao នៅឆ្នាំនេះ ជាមួយនឹងតម្លៃខ្លួនប្រកួតដែលមានចំនួនលេខ9ខ្ទង់»។ កីឡាករប្រដាល់សញ្ជាតិអាមេរិករូបនេះ មិនបានផ្តល់កាលបរិច្ឆេទជាក់លាក់សម្រាប់ការប្រកួតសងសឹកឡើយ ប៉ុន្តែក្នុងរូបភាពវីដេអូដែលរូបគេបានពិភាក្សាជាមួយនឹង Pacquiao រូបគេបានបញ្ជាក់ថា ការប្រកួតសងសឹកនឹងប្រព្រឹត្តទៅនៅខែធ្នូ។ Mayweather ទទួលបានចំណូលប្រមាណជា 220លានដុល្លារពីការប្រកួតលើកទី1 របស់គេជាមួយនឹង Pacquiao ដែលបានកើតឡើងក្រោយពីការចរចាគ្នាអស់គ្នារយៈពេលជាច្រើនឆ្នាំ ឯPacquiao ទទួលបានចំណូលចំនួន 100លានដុល្លារពីការប្រកួតនោះ។ ក្រោយមក Mayweather បានចូលនិវត្តន៍នៅចុងឆ្នាំ2015 ក្រោយពីការដណ្តើមបានជ័យជម្នះជាលើកទី49របស់គេ ប៉ុន្តែ រូបគេបានវិលទៅកាន់សង្វៀនប្រដាល់វិញ ដោយបានយកឈ្នះលើកីឡាករគុនចម្រុះ Conor McGregor។
Pacquiao ដែលបានអះអាងថា ខ្លួនបានរងរបួសស្មាកាលពីការប្រកួតលើកទី១របស់គេជាមួយ Mayweather នោះ បានបង្ហាញពីបំណងរបស់គេក្នុងការប្រកួតសងសឹកជាយូរមកហើយ។ Pacquiao ដែលមានកំណត់ត្រាឈ្នះ 60លើក ចាញ់ 7លើក និងស្មើ 2លើក ក្នុងនោះផ្តួលដៃគូឱ្យសន្លប់ 39លើកនោះ បានវិលទៅកាន់សង្វៀនប្រកួតវិញកាលពីខែកក្កដាដោយបានផ្តួលកីឡាករអាហ្សង់ទីន Lucas Matthysse ក្នុងទឹកទី7 ក្នុងទីក្រុងគូឡាឡាំពួ៕
ប្រភពពី៖ ESPN
