ឯកឧត្តម អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងឯកអគ្គរដ្ឋទូតអាល្លឺម៉ង់ប្រចាំនៅកម្ពុជា Christian Berger បានចុះហត្ថលេខាលើកិច្ចព្រមព្រៀងហិរញ្ញប្បទានសហប្រតិបត្តិការចំនួន2 ដែលមានតម្លៃ 67.1 លានអឺរ៉ូ ស្មើនឹង 74លានដុល្លារ។
កិច្ចព្រមព្រៀងហិរញ្ញប្បទានសហប្រតិបត្តិការចំនួន2 ដែលមានតម្លៃប្រមាណ 74លានដុល្លារនេះ នឹងត្រូវប្រើប្រស់លើគម្រោងប្រសិទ្ធភាពថាមពល សម្រាប់ការផ្គត់ផ្គង់អគ្គិសនីជនបទ ក្រោមកិច្ចព្រមព្រៀងសហប្រតិបត្តិការឆ្នាំ2018 និងគម្រោងអភិវឌ្ឍន៍ហេដ្ឋារចនាសម្ព័ន្ធជនបទ សម្រាប់ប្រទេសកម្ពុជា ក្រោមកិច្ចព្រមព្រៀងសហប្រតិបត្តិការឆ្នាំ2019។
ឯកឧត្តម អូន ព័ន្ធមុនីរ័ត្ន បានមានប្រសាសន៍ថា កិច្ចព្រមព្រៀងហិរញ្ញប្បទានសហប្រតិបត្តិការទាំង2 តំណាងឱ្យចំណងមិត្តភាពល្អ រវាងរដ្ឋាភិបាលនៃប្រទេសទាំង2 ក្នុងការគាំទ្រដល់ការអភិវឌ្ឍសង្គម និងសេដ្ឋកិច្ចរបស់ប្រទេសកម្ពុជា។
លោក Berger បានកត់សម្គាល់ថា តំបន់ និងមនុស្សដែលជួបការលំបាក នឹងទទួលបានអត្ថប្រយោជន៍ពីការអភិវឌ្ឍសេដ្ឋកិច្ចទាំងមូលរបស់ប្រទេសមួយនេះ។
យោងតាមសេចក្តីប្រកាសព័ត៌មានចុះថ្ងៃទី28 ខែវិច្ឆិកា ឆ្នាំ2019 រដ្ឋាភិបាលអាល្លឺម៉ង់នឹងផ្តល់ប្រាក់កម្ចីសម្បទានចំនួន 30លានអឺរ៉ូ និងផ្តល់ជំនួយ 2លានអឺរ៉ូសម្រាប់ហិរញ្ញប្បទានដល់គម្រោងប្រសិទ្ធភាពថាមពល សម្រាប់ការផ្គត់ផ្គង់អគ្គិសនីជនបទ ក្រោមកិច្ចព្រមព្រៀងសហប្រតិបត្តិការឆ្នាំ 2018។
ប្រាក់កម្ចីសម្បទាន 30លានអឺរ៉ូដំបូងដែលភាគីអាល្លឺម៉ង់ ហៅថា «ឥណទានការប្រាក់កាត់បន្ថយ» នឹងត្រូវផ្តល់ជូនតាមរយៈធនាគារអភិវឌ្ឍន៍អាល្លឺម៉ង់។
លើសពីនេះ រដ្ឋាភិបាលអាល្លឺម៉ង់ នឹងផ្តល់ប្រាក់កម្ចីសម្បទានចំនួន 30លានអឺរ៉ូបន្ថែមទៀតសម្រាប់គម្រោងអភិវឌ្ឍន៍ហេដ្ឋារចនាសម្ព័ន្ធជនបទសម្រាប់ប្រទេសកម្ពុជា និង 5.1លានអឺរ៉ូសម្រាប់ហិរញ្ញប្បទានគម្រោងជាក់លាក់ក្រោមកិច្ចព្រមព្រៀងសហប្រតិបត្តិការឆ្នាំ2019។
ក្រសួងសេដ្ឋកិច្ច និងហិរញ្ញវត្ថុ នឹងចុះហត្ថលេខាលើកិច្ចព្រមព្រៀងឥណទាន និងកិច្ចព្រមព្រៀងប្រាក់កម្ចីជាមួយធនាគារអភិវឌ្ឍន៍អាល្លឺម៉ង់នៅពេលក្រោយ ដើម្បីទទួលបានឥណទានសម្រាប់ការអនុវត្តគម្រោងប្រសិទ្ធភាពថាមពល សម្រាប់ការផ្គត់ផ្គង់អគ្គិសនីជនបទ៕
