បន្ទាប់ពីបញ្ចប់បេសកកម្មរយៈពេល10ថ្ងៃនៅកម្ពុជា លោកស្រី រ៉ូណា ស្មីត អ្នករាយការណ៍ពិសេសរបស់អង្គការសហប្រជាជាតិស្តីពីបញ្ហាសិទ្ធិមនុស្សនៅកម្ពុជាបានចេញផ្សាយនូវសេចក្តីថ្លែងការណ៍របស់ខ្លួន ដោយលើកសរសើរពីកំណើនសេដ្ឋកិច្ចដ៏រឹងមាំរបស់កម្ពុជា។
លោកស្រីសាស្ត្រាចារ្យ រ៉ូណា ស្មីត បានលើកឡើងនៅក្នុងរបាយការណ៍នោះថា ប្រទេសកម្ពុជានៅតែបន្តទទួលបានកំណើនសេដ្ឋកិច្ចដ៏រឹងមាំ និងការអភិវឌ្ឍយ៉ាងឆាប់រហ័សដែលបានផ្តល់ធនធានសម្រាប់ការលើកកម្ពស់កិច្ចការពារសង្គម និងការទទួលបានការអប់រំ ការងារ និងកិច្ចគាំពារសុខភាពសមរម្យ «ខ្ញុំរីករាយចំពោះផែនការអភិវឌ្ឍន៍ សន្តិសុខសង្គម និងមូលនិធិសមធម៌សុខភាព និងធ្វើការឈានទៅរកលទ្ធភាពទទួលបានកិច្ចគាំពារសុខភាពជាសកល»។
ជាមួយគ្នានេះ ឯកឧត្តម អូន ព័ន្ធមុនីរ័ត្ន បានវាយតម្លៃខ្ពស់ចំពោះតួនាទីរបស់អង្គការសហប្រជាជាតិក្នុងដំណើរការអភិវឌ្ឍន៍នៅកម្ពុជា។ លោកថា កម្ពុជាកំពុងបន្តដំណើរយ៉ាងស្វាហាប់ដើម្បីប្រែក្លាយកម្ពុជាទៅជាប្រទេសមានចំណូលមធ្យមកម្រិតខ្ពស់នៅឆ្នាំ2030 ដោយត្រូវសម្រេចឱ្យបាននូវលទ្ធផលជាសារវ័ន្ត នៃការកែទម្រង់សំខាន់ៗ និងជាបន្តបន្ទាប់។
ផ្អែកលើលទ្ធផលនៃការអនុវត្តកម្មវិធីកែទម្រង់ជាបន្តបន្ទាប់ រាជរដ្ឋាភិបាលធានាបានប្រក្រតីភាពនៃដំណើរការសង្គម-សេដ្ឋកិច្ចកម្ពុជា ពិសេសធានា និងរក្សាបាននូវសន្តិភាព សន្តិសុខ អធិបតេយ្យភាព ការអភិវឌ្ឍ និងកំណើនសេដ្ឋកិច្ច ព្រមទាំងលំនឹងជីវភាពរស់នៅប្រចាំថ្ងៃរបស់ប្រជាជន។ ទំហំសេដ្ឋកិច្ចជាតិ (ផ.ស.ស. តាមថ្លៃបច្ចុប្បន្ន) បានកើនឡើងពី 61,326,928លានរៀល ឬសមមូលនឹងប្រមាណជាង 15,237លានដុល្លារ អាមេរិកក្នុងឆ្នាំ2013 ដល់89,509,422លានរៀល ឬសមមូលនឹងប្រមាណជាង 22,172 លានដុល្លារអាមេរិកក្នុងឆ្នាំ2017 ហើយនឹងបន្តឡើងដល់ 99,116,041លានរៀល ឬសមមូលនឹងប្រមាណជាង 24,552 លានដុល្លារ អាមេរិកនៅឆ្នាំ2018៕
