គម្រោងវិនិយោគវារីវប្បកម្មសមុទ្រ ពោលគឺផែនការចិញ្ចឹមត្រីក្នុងបែរ លើសមុទ្រកម្ពុជា របស់ក្រុមហ៊ុនជីន យូ តាំង (ខេមបូឌា) ហ្វីសឺរី ឯ.ក ទទួលបានការគាំទ្រពីរដ្ឋមន្ត្រីក្រសួងកសិកម្ម។
ក្រោយពីបានចុះហត្ថលេខាលើអនុស្សរណៈនៃការយោគយល់គ្នា រវាងក្រសួង និងក្រុមហ៊ុន ជីន យូ តាំង (ខេមបូឌា) ហ្វីសឺរី ឯ.ក កាលពីឆ្នាំ ២០១៧ ក្រុមហ៊ុននេះបានធ្វើការពិនិត្យ សិក្សា និងពិភាក្សាជាមួយក្រសួងពាក់ព័ន្ធរួចហើយ ក្នុងនោះ ក្រសួងពាក់ព័ន្ធបានសម្រេចកំណត់យកតំបន់កោះថាស ជាតំបន់សក្តិសមបំផុតសម្រាប់ក្រុមហ៊ុនធ្វើការវិនិយោគ។
ខាងលើគឺជាការអះអាងរបស់លោកស្រី ជេស៊ីកា តំណាងក្រុមហ៊ុន ជីន យូ តាំង (ខេមបូឌា) ហ្វីសឺរី ឯ.ក ដែលបានចូលជួបពិភាក្សាជាមួយ ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់និងនេសាទ នាថ្ងៃទី ១១ មករា ២០២២។
លោកស្រី ជេស៊ីកា ថ្លែងថា នៅក្នុងសំណើវិនិយោគរបស់ក្រុមហ៊ុន ដំណាក់កាលទី១ នៃផែនការវិនិយោគលើការចិញ្ចឹមត្រីសមុទ្រក្នុងបែ គឺនៅលើផ្ទៃទឹកសមុទ្រចំនួន ១,៩៨៤ ហិកតា។
ក្នុងជំនួបនេះ រដ្ឋមន្ត្រីក្រសួងកសិកម្ម បានបញ្ជាក់ថា ផែនការវិនិយោគវារីវប្បកម្មសមុទ្រ ក៏បានចូលរួមបង្កើតការងារជូនប្រជាពលរដ្ឋ បង្កើនផលត្រីសមុទ្រធម្មជាតិ និងផលត្រីចិញ្ចឹមសម្រាប់ផ្គត់ផ្គង់ក្នុងស្រុក។
ទោះជាយ៉ាងណាក៏ដោយ រដ្ឋមន្ត្រីក្រសួងកសិកម្ម បានណែនាំបន្ថែមដល់ក្រុមហ៊ុនឱ្យបញ្ជូនឯកសារវាយតម្លៃលើផលប៉ះពាល់បរិស្ថាន និងសង្គម មកក្រសួង និងត្រូវស្នើសុំ និងមានការអនុម័តពីក្រុមប្រឹក្សាអភិវឌ្ឍន៍កម្ពុជា ជាមុនសិន៕
