វិទ្យាស្ថានអន្តរអាមេរិកសម្រាប់កិច្ចសហប្រតិបត្តិការលើវិស័យកសិកម្ម (IICA) ថ្មីៗនេះបានអះអាងថា ទ្វីបអាម៉េរិក អាចរួមចំណែកដ៏សំខាន់នៅក្នុងការដោះស្រាយបញ្ហាសន្តិសុខថាមពលសកល ក្នុងគ្រាពិភពលោកកំពុងប្រឈមនឹងវិបត្តិបច្ចុប្បន្ន ដោយសារសង្គ្រាម រុស្ស៊ី-អ៊ុយក្រែន ដែលកំពុងនាំឱ្យមានបញ្ហាខ្វះប្រេងប្រើប្រាស់។
នៅក្នុងប្រកាសមួយដែលត្រូវបានដាក់ចំណងជើងថា «សារសំខាន់ភូមិសាស្ត្រនយោបាយរបស់វិស័យកសិកម្មក្នុងបញ្ហាសន្តិសុខថាមពល» វិទ្យាស្ថាន IICA លើកឡើងថា ទ្វីបអាម៉េរិក កំពុងផលិតជីវឧស្ម័នរាវប្រមាណ ៧១% នៃបរិមាណសរុបទូទាំងពិភពលោក ដែលនេះគឺមានសារសំខាន់ជាយុទ្ធសាស្ត្រដើម្បីជំនួសប្រេង និងឧស្ម័នធម្មជាតិបច្ចុប្បន្ន។
យោងតាម IICA រុស្ស៊ី គឺជាប្រទេសដែលផ្គត់ផ្គង់ឧស្ម័នធម្មជាតិចម្បងទៅឱ្យ អឺរ៉ុប ហើយក៏ជាប្រទេសមួយដែលផលិតប្រេងក្នុងបរិមាណច្រើនជាងគេក្នុងពិភពលោកផងដែរ ដូច្នេះ ទណ្ឌកម្មដែលដាក់ទៅលើវិស័យថាមពលរបស់ រុស្ស៊ី ក៏ជះឥទ្ធិពលធ្ងន់ធ្ងរដល់ពិភពលោក។ តម្លៃប្រេងចេះតែកើនឡើងពីមួយថ្ងៃទៅមួយថ្ងៃ ក្នុងគ្រាពិភពលោកកំពុងខ្វះប្រភពផ្គត់ផ្គង់។
ទាក់ទងនឹងបញ្ហាខាងលើ វិស័យកសិកម្មរបស់ ទ្វីបអាម៉េរិក អាចដើរតួនាទីយ៉ាងសំខាន់មួយ ព្រោះតែជាទ្វីបដែលនាំចេញផលិតផលកសិកម្មច្រើន រួមចំណែកមិនតិចនោះទេ ក្នុងការធានាដល់សន្តិសុខស្បៀង និងរួមទាំងសន្តិសុខថាមពល។ IICA លើកឡើងថា គោលដៅទាំងពីរនេះមិនអាចខ្វះមួយណាបានឡើង ព្រោះតែភាពសម្បូរបែបក្នុងការប្រើប្រាស់ទូទៅ រួមជាមួយនឹងប្រសិទ្ធភាពនៃជីវម៉ាស (ជីវម៉ាស គឺជារូបធាតុសរីរាង្គដែលមាននៅក្នុងផលិតផលរបស់ ធម្មជាតិដូចជា សត្វ ឬរុក្ខជាតិ) ដើម្បីផលិតឧស្ម័នជីវសាស្ត្រដែលអាចបង្កើនប្រសិទ្ធភាព និងសុវត្ថិភាពរបស់ប្រព័ន្ធអាហារកសិកម្ម។
លោក Agustin Torroba អ្នកជំនាញផ្នែកឥន្ធនៈ និងថាមពលជីវសាស្ត្ររបស់ IICA បាននិយាយថា ឧស្ម័នជីវសាស្ត្របានរួមចំណែកជាង ១៥០ លានម៉ែត្រគូប ទៅក្នុងពិភពលោក ក្នុងនោះ មាន ៣៣% ជាប្រភេទជីវម៉ាស៊ូត និង ៦៧% ជាប្រភេទអាល់កុលជីវសាស្ត្រសម្រាប់លាយ ឬជំនួសប្រេងសាំង។
ទ្វីបអាម៉េរិក កំពុងក្ដោបក្ដាប់តួនាទីស្នូលក្នុងការផលិតអាល់កុលជីវសាស្ត្រ ដោយកំពុងផ្គត់ផ្គង់រហូតដល់ ៨៨% នៃបរិមាណអាកុលជីវសាស្ត្រសរុប និង ៣៦% នៃបរិមាណជីវម៉ាស៊ូត សម្រាប់ពិភពលោក។
វត្ថុធាតុដើមសម្រាប់ផលិតអាកុលជីវសាស្ត្រ ភាគច្រើនគឺជាពោត និងស្ករអំពៅ ចំណែកជីវម៉ាស៊ូត ត្រូវបានផលិតពីប្រេងសណ្ដែក និងប្រេងរបស់ដូងប្រេង។
បច្ចុប្បន្ន ជីវឧស្ម័នរាវដែលត្រូវបានផលិតនៅ ទ្វីបអាម៉េរិក កំពុងជួយប៉ះប៉ូវប្រមាណ ២២% នៃកង្វះប្រេងពីរ៉ែធម្មជាតិ និងបណ្ដានិស្សន្ទវត្ថុ (និស្សន្ទវត្ថុ គឺជា វត្ថុដែលចេញពីធាតុដើម ដូចជា «ប្រេងដូងគឺជានិស្សន្ទវត្ថុរបស់ដូង» ឯ «ប្រេងសណ្តែក គឺជា និស្សន្ទវត្ថុរបស់សណ្ដែក») របស់ ទ្វីបនេះ។ យោងតាមការគណនារបស់ IICA ជីវឧស្ម័នរាវអាចប៉ះប៉ូវទៅលើតម្រូវការប្រេងបានពីរ៉ែ ប្រមាណ ៥៣% ឯណោះ។
