នាង Marwa Elselehdar ដែលជានាវិកនាយិកាដំបូងបង្អស់របស់ប្រទេសអេហ្ស៊ីប មានការភ្ញាក់ផ្អើលជាខ្លាំងនៅពេលមានព័ត៌មានចចាមអារ៉ាមថា នាងបានបង្កឱ្យមានករណីកប៉ាល់ Ever Given ជាប់គាំង ធ្វើឱ្យស្ទះផ្លូវទឹករបស់ព្រែកជីក Suez កាលពីពេលថ្មីៗនេះ។
Marwa Elselehdar បានឱ្យដឹងថា មានមតិ និងខ្លឹមសារអត្ថបទសារព័ត៌មានមួយចំនួនដែលត្រូវគេកែប្រែ ត្រូវបានបង្ហោះលើបណ្ដាញសង្គមនៅអេហ្ស៊ីបចាប់ពីថ្ងៃទី23 ខែមីនា ដោយយល់ថា នាងជាប់ទាក់ទិននឹងករណីកប៉ាល់ដឹកកុងតឺន័រ Ever Given ដែលបានជាប់គាំងទទឹងព្រែកជីក Suez។ ប៉ុន្តែ Marwa Elselehdar មិនបានឱ្យដឹងច្បាស់អំពីខ្លឹមសារនៃពាក្យចចាមអារ៉ាមទាំងនោះទេ។
«ខ្ញុំពិតជាភ្ញាក់ផ្អើលណាស់។ ខ្ញុំគិតថា ខ្ញុំត្រូវគេវាយប្រហារ ដោយសារតែជាស្ត្រីដែលទទួលបានជោគជ័យក្នុងវិស័យនេះ ឬថា ខ្ញុំគឺជាជនជាតិអេហ្ស៊ីប» នាង Marwa Elselehdar និយាយដូច្នេះ និងបានបន្ថែមថា នាងកំពុងធ្វើការនៅលើកប៉ាល់ Aida IV Alexandria ក្នុងពេលកប៉ាល់ Ever Given ជួបបញ្ហា។
Marwa Elselehdar អាយុ29ឆ្នាំ គឺជាស្ត្រីដំបូងគេដែលកាន់តំណែងជាប្រធានក្រុមនាវិករបស់ប្រទេសអេហ្ស៊ីប។ នាងធ្លាប់ទទួលរងការរិះគន់ប្រកបដោយការរើសអើងភេទកាលពីនៅសិក្សានៅឯវិទ្យាស្ថានវិទ្យាសាស្ត្រ បច្ចេកវិទ្យា និងដឹកជញ្ជូនជើងទឹកនៅ Alexandria។ នាង Marwa Elselehdar មិនត្រូវបានគេអនុញ្ញាតឱ្យចូលសិក្សានៅសាកលវិទ្យាល័យនេះ រហូតដល់មានការយល់ព្រមពីប្រធានាធិបតីអេហ្ស៊ីប ដែលពេលនោះគឺលោក Hosni Mubarak។
«សង្គមអេហ្ស៊ីប នៅតែមិនទាន់ទទួលយកគំនិតដែលថា ស្ត្រីអាចធ្វើការនៅលើសមុទ្រ និងឆ្ងាយពីផ្ទះសម្បែងក្នុងរយៈពេលយូរ។ ប៉ុន្តែ អ្នកមិនចាំបាច់សុំច្បាប់គ្រប់គ្នានោះឡើយ នៅពេលចង់ធ្វើអ្វីដែលខ្លួនចូលចិត្ត» Marwa Elselehdar ថ្លែងបញ្ជាក់។
Ever Given ដែលជាកប៉ាល់ដឹកកុងតឺន័រធំជាងគេមួយក្នុងពិភពលោក ដោយមានទម្ងន់សរុបជាង 200,000 តោន បានជ្រុលទៅបុកច្រាំងរបស់ព្រែកជីក Suez និងជាប់គាំងទទឹងផ្លូវទឹកកាលពីព្រឹកថ្ងៃទី 24មីនា នៅពេលកំពុងធ្វើដំណើរពីសមុទ្រក្រហម ទៅកាន់មជ្ឈិមបូព៌ា ធ្វើឱ្យកប៉ាល់ទាំងអស់ដែលមកពីមុខ និងតាមពីក្រោយ ត្រូវកកស្ទះអស់រយៈពេល 6ថ្ងៃ។
ក្រុមមន្ត្រីអេហ្ស៊ីប ក្រោយមកក៏បានបញ្ជូនកប៉ាល់អូស រួមនឹងគ្រឿងចក្រជាច្រើនគ្រឿងទៅជួយសង្គ្រោះ។ កិច្ចខិតខំរបស់អាជ្ញាធរ ទទួលបានជោគជ័យកាលពីថ្ងៃទី29 ខែមីនា ស្របពេលដេលទឹកជោរបានឡើងដល់ចំណុចកំពូល។
ក្រុមអ្នកជំនាញបានគណនាឃើញថា ទំនិញដែលបានស្ទះនៅក្នុងករណីខាងលើនេះ មានតម្លៃរហូតដល់ 9.6ពាន់លានដុល្លារអាមេរិក ខណៈដែលក្រុមហ៊ុនធានារ៉ាប់រងអាល្លឺម៉ង់ Allianz បានប្រាប់ថា វិស័យពាណិជ្ជកម្មទូទាំងពិភពលោក ទំនងជាបានខាតបង់អស់ចាប់ពី 6-10ពាន់លានដុល្លារ។
ទីប្រឹក្សាម្នាក់របស់ប្រធានាធិបតីអេហ្ស៊ីប បានឱ្យដឹងថា ទីក្រុងគែរ អាចស្នើឱ្យម្ចាស់កប៉ាល់ Ever Given សងការខូចខាត និងតម្រូវឱ្យប្រធានក្រុមនាវិកទទួលខុសត្រូវចំពោះករណីជាប់កប៉ាល់នេះ។ ប្រធានស្ថាប័នគ្រប់គ្រងព្រែកជីក Suez (SCA) លោក Osama Rabia បានឱ្យដឹងថា ប្រាក់ចំណាយទៅលើការជួយសង្គ្រោះកប៉ាល់ Ever Given នេះ កើនដល់ 1ពាន់លានដុល្លារអាមេរិក៕
ប្រភព៖ BBC
ប្រែសម្រួល៖ បុត្រា
