យោងតាមឯកសាររបស់គណៈកម្មការមូលបត្រអាម៉េរិក (SEC) លោក Elon Musk បច្ចុប្បន្នគឺជាអ្នកកាន់កាប់ភាគហ៊ុន Twitter ចំនួន ៩.២% ធ្វើឱ្យលោកក្លាយជាម្ចាស់ភាគហ៊ុនធំជាងគេបង្អស់នៅក្នុងបណ្ដាញសង្គមនេះ។
ចំនួនភាគហ៊ុនរបស់មហាសេដ្ឋី Musk គឺច្រើនជាងសហស្ថាបនិករបស់ Twitter លោក Jack Dorsey ដែលមានតែ ២.២៥%។
ភាគហ៊ុនរបស់ Twitter បានកើនឡើង ២៥% បន្ទាប់ពីព័ត៌មានខាងលើត្រូវបានបង្ហើប។ ភាគហ៊ុនរបស់លោក Musk មានតម្លៃប្រហែល ២.៨៩ ពាន់លានដុល្លារ នេះបើយោងតាមតម្លៃទីផ្សារដែលបានបិទទ្វារកាលពីថ្ងៃសុក្រសប្ដាហ៍មុន។
ការដែលនាំឱ្យលោក Musk ក្លាយជាម្ចាស់ភាគហ៊ុនធំជាងគេនៅ Twitter ទំនងជាមកពីលោកមិនចូលចិត្ត Facebook។ កាលពីពេលកន្លងទៅ លោក Musk ធ្លាប់បានធ្វើការស្ទង់មតិនៅលើ Twitter ស្ដីពីការគោរពសេរីភាពក្នុងការបញ្ចេញមតិរបស់បណ្ដាញសង្គមនេះ។ លទ្ធផលបង្ហាញថា មានអ្នកលេង Twitter ជាង ៧០% ឆ្លើយថា Twitter មិនគោរពសេរីភាពបញ្ចេញមតិ ចំណែកជាង ២៩% ឆ្លើយថា គោរព។
ដូច្នេះ ក្រុមអ្នកវិភាគយល់ថា ការដែលលោក Musk ទិញភាគហ៊ុនយ៉ាងច្រើនរបស់ Twitter អាចថា មកពីលោកចង់បង្វែរទិសដៅរបស់ Twitter ទៅរកភាពវិជ្ជមាន គឺការគោរពសិទ្ធិបញ្ចេញមតិឱ្យបានច្រើនជាងមុន។
ជាងនេះ លោក Elon Musk គឺជា «សត្រូវធំ» របស់ Mark Zuckerberg ដែលជាម្ចាស់ Facebook និងជាគូប្រជែងរបស់ Twitter។
កន្លងមក លោក Musk ក៏ធ្លាប់បានឱ្យក្រុមការងាររបស់លោក លុបចោលទំព័រ Facebook របស់ ក្រុមហ៊ុន SpaceX និង Tesla ផងដែរ។ មហាសេដ្ឋីរូបនេះ ធ្លាប់បង្ហោះសារស្នើឱ្យគ្រប់គ្នាលុបបណ្ដាញសង្គមនេះចេញពីទូរស័ព្ទ និងងាកទៅប្រើកម្មវិធីផ្ញើសារដែលបំប្លែងជាកូដ Sinnal ទៀតផង។