លោក Elon Musk គឺជាកំពូលមហាសេដ្ឋីពិភពលោកលំដាប់ទី3 ដោយមានទ្រព្យសរុប 115ពាន់លានដុល្លារ ប៉ុន្តែ Elon Musk មិនមែនជាមនុស្សតែម្នាក់គត់ក្នុងគ្រួសារ ដែលមានភាពជោគជ័យក្នុងមុខជំនួញ និងភាពល្បីល្បាញនៃកេរ្តិ៍ឈ្មោះនោះឡើយ តែសមាជិកគ្រួសាររបស់មហាសេដ្ឋីរូបនេះ សុទ្ធតែជាមនុស្សអស្ចារ្យ។
លោក Elon Musk កើតនៅអាហ្វ្រិកខាងត្បូង ក្រោយមកក៏បានទៅរស់នៅក្នុងប្រទេសកាណាដា រួចហើយក៏ទៅតាំងទីលំនៅនៅក្នុងរដ្ឋ California សហរដ្ឋអាមេរិក។
លោក Errol Musk ជាឪពុករបស់លោក Elon Musk
លោក Errol Musk ដែលជាឪពុករបស់ Elon Musk គឺជាវិស្វករម្នាក់មកពីប្រទេសអាហ្វ្រិកខាងត្បូង។ យោងតាមលោក Elon Musk លោក Errol មានពិន្ទុនៃភាពវៃឆ្លាត (IQ/Intelligence Quotient) ស្មើនឹងអ្នកប្រាជ្ញ និងជាមនុស្សដែលមានវ័យនៅក្មេងបំផុតដែលទទួលបានវិញ្ញាបនបត្រវិស្វករជំនាញនៅអាហ្វ្រិកខាងត្បូង។
ពេលនៅក្មេង លោក Elon Musk បានទៅរស់នៅជាមួយឪពុក ក្រោយពីម្ដាយនិងឪពុកបានលែងលះគ្នា។ កាលណោះ លោក Errol កំពុងធ្វើការនៅក្នុងវិស័យសំណង់ និងរុករកត្បូងមរកត។ ឆ្នាំ2018 លោក Errol បានធ្វើឱ្យមនុស្សជាច្រើនមានការភ្ញាក់ផ្អើល នៅពេលបានបង្ហើបឱ្យដឹងថា លោកមានកូនម្នាក់ជាមួយនឹងកូនស្រីដោយឡែកនៃអតីតភរិយារបស់គាត់។
ទំនាក់ទំនងរវាងលោក Elon Musk និងឪពុករបស់ខ្លួនមិនមានភាពល្អប្រសើរទេ។ CEO របស់ Tesla ធ្លាប់បាននិយាយថា ឪពុករបស់លោកគឺជាមនុស្សអាក្រក់។ លោក Elon ថ្លែងថា៖ “អ្នកមិនអាចស្រមៃឃើញនូវប្រការអាក្រក់បំផុត។ គាត់បានបង្កកំហុសឆ្គងស្ទើរតែទាំងអស់នៃអ្វីដែលអ្នកអាចគិតឃើញ”។
Maye Musk ជាម្ដាយរបស់លោក Elon Musk
អ្នកស្រី Maye Musk គឺជាតារាម៉ូដែល និងជាអ្នកជំនាញផ្នែកអាហារូបត្ថម្ភ។ អ្នកស្រីបានធ្វើជាអ្នកដើរម៉ូតចាប់ទីអាយុ15ឆ្នាំ និងធ្លាប់បង្ហាញខ្លួននៅលើប្រអប់ផលិតផលគ្រាប់ធញ្ញជាតិ Special K ក៏ដូចជាទំព័រមុខរបស់ទស្សនវដ្ដី Time។ អ្នកស្រីក៏ធ្លាប់បានចូលរួមសម្ដែងនៅក្នុងព្រឹត្តិការណ៍បង្ហាញម៉ូដជាច្រើននៅទីក្រុង New York។
ឆ្នាំ2017 ក្នុងវ័យ69ឆ្នាំ អ្នកស្រី Maye Musk បានក្លាយជាអ្នកនាំពាក្យរបស់ក្រុមហ៊ុនផលិតគ្រឿងសម្អាង CoverGirl។ ក្រោយពីបានលែងលះជាមួយនឹងលោក Errol Musk អ្នកស្រីក៏បាននាំកូនៗចំនួន3នាក់ទៅរស់នៅក្នុងប្រទេសកាណាដា និងបានចាប់ផ្ដើមរកស៊ីក្នុងនាមជាអ្នកឯកទេសផ្នែកអាហារូបត្ថម្ភ។
Kimbal Musk ប្អូនប្រុសរបស់ Elon Musk
លោក Kimbal Musk បច្ចុប្បន្នគឺជាស្ថាបនិកនៃក្រុមហ៊ុនចំនូន3ដែលរកស៊ីខាងអាហារ រួមមានក្រុមហ៊ុន The Kitchen Restaurant Group អង្គការមិនស្វែងរកកម្រៃដែលមានឈ្មោះថា Big Green និងក្រុមហ៊ុន Square Roots ដែលជាក្រុមហ៊ុនកសិកម្មក្នុងទីក្រុង។
ដូចលោក Elon លោក Kimbal ក៏បានធ្វើដំណើរតាមម្ដាយនិងបងប្អូន ទៅកាន់ប្រទេសកាណាដាដើម្បីបង្កើតជីវភាពថ្មី។ ពួកគេបាននាំគ្នាបង្កើតក្រុមហ៊ុន Zip2 ដែលក្រោយមក ក្នុងពីឆ្នាំ1999 ក៏ត្រូវបានលក់ក្នុងតម្លៃ307លានដុល្លារ។ Kimbal ក៏បានវិនិយោគទៅលើ PayPal ហើយបច្ចុប្បន្ន លោកគឺជាសមាជិកម្នាក់នៃក្រុមប្រឹក្សាភិបាលរបស់ក្រុមហ៊ុន Tesla និង SpaceX ផងដែរ។
Tosca Musk ប្អូនស្រីរបស់ Elon Musk
Tosca Musk បានចូលប្រលូកក្នុងវិស័យផលិតភាពយន្តចាប់ពីឆ្នាំ2001 ហើយមកដល់ពេលនេះ នាងមានស្នាដៃដល់ទៅ30រឿងឯណោះ។ បច្ចុប្បន្ន នាងTosca Musk ក៏ជាសហស្ថាបនិក និងជា CEO របស់ក្រុមហ៊ុន Passionflix ដែលផ្ដល់សេវាកម្មចាក់ផ្សាយខ្សែភាពយន្តដែលត្រូវបានប្ដូរទម្រង់ពីប្រលោមលោកបែបមនោសញ្ចេតនា។
នាងបានបង្កើតក្រុមហ៊ុននេះតាំងពីឆ្នាំ2016 និងទាក់ទាញបានទុនវិនិយោគចំនួន4លានដុល្លារអាមេរិក។ ទ្រព្យសម្បត្តិសរុបរបស់ Tosca Musk មានប្រមាណជា169លានដុល្លារ៕
ក្រៅពីនេះ Elon Musk ក៏មានមានប្អូនជីដូនមួយជាច្រើននាក់ដែលរកស៊ីមានបានផងដែរ និងជោគជ័យផងដែរ ដែលក្នុងនោះមានដូចជា៖
1.លោក Lyndon Rive ជាសហស្ថាបនិកនៃក្រុមហ៊ុន Everdream ដែលបានលក់ឱ្យ Dell ក្នុងតម្លៃ120លានដុល្លារ និង ធ្លាប់ជាសហស្ថាបនិក និងជា CEO របស់ក្រុមហ៊ុន SolarCity រហូតដល់ក្រុមហ៊ុនត្រូវបាន Tesla ទិញកាលពីឆ្នាំ2016ក្នុងតម្លៃ2.6ពាន់លានដុល្លារ។
2.លោក Peter Rive ដែលជាបងជីដូនមួយរបស់ Elon Musk គឹជាសហស្ថាបនិក និងជាប្រធានផ្នែកបច្ចេកវិទ្យារបស់ SolarCity។ Lyndon និង Peter បានចូលរួមធ្វើការឱ្យ Zola Electric ដែលជាក្រុមហ៊ុនផ្គត់ផ្គង់ថាមពលស្អាត និងតម្លៃទាបនៅអាហ្វ្រិក។
3.លោក Russ Rive ដែលជាបងជីដូនមួយរបស់ Elon Musk។ លោកគឺជាស្ថាបនិកក្រុមហ៊ុន SuperUber ដែលធ្វើការផ្នែកសិល្បៈ បច្ចេកវិទ្យា ស្ថាបត្យកម្ម និងការរចនាបែបច្នៃប្រឌិត។ លោកក៏ជាសហស្ថាបនិកនៃក្រុមហ៊ុន Everdream ផងដែរ។
4.នាង Almeda Rive ដែលជាប្អូនស្រីរបស់ Russ, Peter និង Lyndon និងត្រូវជាជីដូនមួយរបស់លោក Elon។ យោងតាម Vanity Fair នាង Almeda គឺជាអត្តពលិកផ្នែកប្រណាំងម៉ូតូលក្ខណៈគ្រួសារ។
នាង Almeda Rive ធ្លាប់ធ្វើការនៅក្នុងវិស័យលក់ដូរក្នុងក្រុមហ៊ុន SolarCity ផងដែរ៕
ប្រភព៖ BI
