អាជ្ញាធរខេត្តស្ទឹងត្រែង នៅក្នុងសន្និសីទសារព័ត៌មានមួយ បានឱ្យដឹងថា ក្នុងករណីដែលព្រលានយន្តហោះចាស់មានទំហំតូច ពិបាកក្នុងការពង្រីកបន្ថែម និងមិនអំណោយផលដល់ការចុះចតរបស់យន្តហោះធុនធំ នោះអាកាសយានដ្ឋានថ្មីមួយអាចនឹងត្រូវបង្កើតឡើង។
កាលពីថ្ងៃទី 21 ខែមករានេះ នៅក្នុងសន្និសីទសារព័ត៌មានមួយ ក្រោមប្រធានបទ «វឌ្ឍនភាពមូលដ្ឋានឃុំ សង្កាត់ និងទិសដៅការងារបន្ដខេត្ដស្ទឹងត្រែង» លោក ដួង ពៅ អភិបាលរងនៃគណៈឣភិបាលខេត្តស្ទឹងត្រែងបានលើកឡើងថា ព្រលានយន្តហោះនៅក្នុងខេត្តស្ទឹងត្រែង អាចនឹងត្រូវសាងសង់ឡើងនាពេលអនាគត ដោយពង្រីកពីព្រលានយន្តហោះចាស់។ លោកបានថ្លែងថា អនាគតអាកាសយានដ្ឋាននេះនឹងមានទំហំផ្ទៃដីប្រមាណ 500 ហិកតា និងបន្ថែមថា រាជរដ្ឋាភិបាលបានអនុញ្ញាតឱ្យក្រសួងទេសចរណ៍ និងអាជ្ញាធរអាកាសចរណ៍ស៊ីវិលកម្ពុជា ធ្វើការសិក្សា និងរៀបចំផែនទីគោលសម្រាប់ការសាងសង់ដើម្បីពង្រីកព្រលានយន្តហោះចាស់ក្នុងខេត្តនេះ។
ទាក់ទងនឹងគម្រោងសាងសង់ខាងលើ អភិបាលរងខេត្តស្ទឹងត្រែងមានប្រសាសន៍ថា គោលដៅរយៈពេល 5 ឆ្នាំខាងមុខទៀត អាជ្ញាធរអាកាសចរណ៍ស៊ីវិល និងក្រសួងទេសចរណ៍កម្ពុជា កំពុងតែសិក្សាលម្អិតជាមួយភាគីធនាគារអភិវឌ្ឍន៍អាស៊ី (ADB) ហើយអាជ្ញាធរក៏កំពុងតែសិក្សាអំពីទីតាំងដទៃទៀតដែលអាចសាងសង់ជាអាកាសយានដ្ឋានថ្មីបាន ក្នុងករណីព្រលានយន្តហោះចាស់មិនអំណោយផលដល់ការចុះចតរបស់យន្តហោះប្រភេទធំ។
លោកអភិបាលរងខេត្តស្ទឹងត្រែង បានបញ្ជាក់យ៉ាងច្បាស់ថា អនាគតអាចមានព្រលានយន្តហោះនៅខេត្តនេះ ដោយការស្ដារ ពង្រីក និងអភិវឌ្ឍនៅពេលណាមួយ។ ក៏ប៉ុន្តែលោកសង្កត់ធ្ងន់ថា មិនទាន់ដឹងច្បាស់ថា នឹងអាចមាននៅពេលណាឱ្យប្រាកដនៅឡើយ៕
