នៅលើលោកនេះ គ្មានអ្នកណាអាចដឹងច្បាស់ ឬស្មានត្រូវថាពិភពលោកនៅក្នុងរយៈពេលមួយទសវត្សរ៍ទៀត មួយសតវត្សរ៍ ឬមួយសហវត្សរ៍ទៀតនឹងក្លាយជាយ៉ាងណានោះទេ តែទោះជាយ៉ាងនេះក្តីមានអ្នកជំនាញ រួមទាំងអ្នកនិពន្ធផងបានចាប់ផ្តើមស្រាវជ្រាវ ហើយយកភ័ស្តុតាងសំខាន់ៗមួយចំនួននាពេលបច្ចុប្បន្នដើម្បីជាមូលដ្ឋានក្នុងការសន្និដ្ឋានពីភាពប្រែប្រួលនៅថ្ងៃអនាគត។
នៅពេលថ្មីៗនេះ វេទិកាសេដ្ឋកិច្ចពិភពលោក បានធ្វើការទំនាក់ទំនងជាមួយនឹងអ្នកជំនាញដើម្បីស្វែងរកសៀវភៅដែលមានតម្លៃ និងជឿទុកចិត្តបានសម្រាប់មនុស្សនាពេល បច្ចុប្បន្ន ដែលចង់សិក្សាពីអនាគតនៃពិភពលោក។
- Children of the New World
សៀវភៅនេះនិពន្ធដោយអ្នកនិពន្ធ Alexander Weinstein ដែលវាជាបណ្ដុំប្រលោមលោកខ្លីៗចំនួន 13 រឿងបញ្ជូលគ្នាដើម្បីបង្ហាញពីអនាគតរបស់ពិភពលោក។ អត្ថន័យសំខាន់ៗដែលត្រូវបានរំលេចឡើងក្នុងស្នាដៃយ៉ាងមានសារៈសំខាន់នេះមានដូចជាបញ្ហាទំនាក់ទំនងរវាងបណ្តាញសង្គម និងការរស់នៅ ការកសាងប្រព័ន្ធចងចាំរបស់មនុស្ស Game ដែលធ្វើឱ្យមនុស្សញៀនព្រោះវាកាន់តែមានលក្ខណៈទំនើបដូចជាមនុស្សស្ថិតក្នុងល្បែងនោះផ្ទាល់ និងមនុស្សយន្តដែលមានលក្ខណៈដូចគ្នាបេះបិទនឹងមនុស្ស។
- The Handmaid’s Tale
សៀភៅនេះនិពន្ធដោយអ្នកនិពន្ធ Margaret Atwood ដែលនិយាយពីក្តីស្រមៃពោរពេញដោយក្តីបារម្ភលើពិភពលោកនាពេលអនាគត ដែលអាចនឹងមានភាពសង្កត់សង្កិន ហើយអង្គការសាសនាទាំងអស់អាចនឹងត្រូវបានគ្រប់គ្រងដោយរដ្ឋាភិបាលដែលមានអំណាចបំផុតលើពិភពលោក។ នៅពេលនោះស្ត្រីក្មេងៗអាចស្ថិតក្នុងស្ថានភាពមិនសុវត្ថិភាពឬផុយស្រួយនឹងរងភាពចាប់ជំរិត។ មនុស្សមួយចំនួនអាចត្រូវគេបង្ខំឱ្យលុបបំបាត់អត្តសញ្ញាណរបស់ខ្លួន និងជំរុញកុមារឱ្យខំដោយមិនស្របទៅនឹងសមត្ថភាពរបស់ខ្លួន។
តែទោះជាយ៉ាងនេះក្តី ស្នាដៃនេះក៏បង្ហាញនូវដំណោះស្រាយជាច្រើនដែលអាចសង្គ្រោះបាននូវស្ថានភាពអាក្រក់នាថ្ងៃអនាគតដូចជាការអប់រំពីប្រព័ន្ធគាំពារស្ត្រីពីការរំលោភបំពាន ការបណ្តុះសីលធម៌ ការអប់រំផ្លូវភេទ និងពង្រឹងថាមពលពិតប្រាកដរបស់ប្រជាជនដែលកំពុងរស់នៅគ្រប់ទីកន្លែងនៃពិភពលោក។
- The Sixth Extinction: An Unnatural History
សៀវភៅនេះនិពន្ធដោយអ្នកនិពន្ធ Elizabeth Kolbert ដែលជាស្នាដៃបញ្ចូលគ្នានូវវិទ្យាសាស្ត្រ និងប្រវត្តិសាស្ត្រ តាមរយៈការបង្ហាញពីផលប៉ះពាល់មកលើមនុស្សតាមរយៈការបំផ្លាញបរិស្ថាន។ តាមរយៈស្នាដៃនេះអ្នកនិពន្ធទទួលបានពានរង្វាន់ Pulitzer Prize នៅឆ្នាំ2014។
សៀវភៅនេះក៏បង្ហាញផងដែរពី ផលប៉ះពាល់នៃបរិយាកាស ផលប៉ះពាល់ និងគ្រោះថ្នាក់ដែលកើតចេញពីសកម្មភាពមនុស្សចំពោះមហាសមុទ្រ ការផ្លាស់ប្តូរអាកាសធាតុ និងការបំផ្លិចបំផ្លាញជាច្រើនទៀតដែលអាចជះផលប៉ះពាល់ដល់អនាគតពិភពលោក។
- This Changes Everything: Capitalism vs. The Climate
ស្នាដៃនេះនិពន្ធដោយអ្នកនិពន្ធ Naomi Klein ដែលបង្ហាញអ្នកអានពីការបោះបង់ចោលសេដ្ឋកិច្ចបែបមូលធននិយម និងកសាងនូវប្រព័ន្ធសេដ្ឋកិច្ចសកលបែបថ្មី និងប្រព័ន្ធនយោបាយដើម្បីឱ្យពិភពលោកមានភាពបៃតងនៅថ្ងៃអនាគត។ អ្នកនិពន្ធរូបនេះក៏បានបង្ហាញពីករណីសំខាន់ៗមួយចំនួនដែលអាចផ្លាស់ប្តូរប្រព័ន្ធសេដ្ឋកិច្ចបច្ចុប្បន្នដែលឧស្សាហកម្មជាច្រើនកំពុងបង្កើតឧស្ម័នកាបូនិក ឱ្យរៀបចំដំណើរការដើម្បីអភិវឌ្ឍន៍សង្គមដោយកាត់បន្ថយផលប៉ះពាល់។
សៀវភៅដែលសង្កត់ធ្ងន់លើវិធីសាស្ត្រសំខាន់ៗក្នុងការសង្គ្រោះពិភពលោកនេះ និងក៏បានបង្ហាញផងដែរពីផលប៉ះពាល់នៃសេដ្ឋកិច្ច និងនយោបាយសកលលោក ដែលមាននាពេលបច្ចុប្បន្នរួមទាំងចន្លោះប្រហោងមួយចំនួនទៀតដែលត្រូវកែសម្រួលផងដែរ។
- In 100 Years: Leading Economist Predict the Future
សៀវភៅនេះរៀបចំឡើងដោយអ្នកនិពន្ធ Ignacio Plalacios-Huerta ដោយវាជាស្នាដៃដែលបញ្ចូលគ្នានូវគំនិតសេដ្ឋកិច្ចល្បីៗចំនួន10 លើពិភពលោក ដោយក្នុងនោះមានស្នាដៃដែលជាប់ពានរង្វាន់ណូបែលផងដែរ។ គំនិតទាំងអស់នោះគឺជាការសន្និដ្ឋានពីស្ថានភាពពិភពលោកក្នុងសតវត្សរ៍ទី22 ដោយផ្តោតលើអនាគតនៃវិស័យការងារ ប្រាក់ខែ គុណភាពនៃការងាររបស់មនុស្សជំនាន់ថ្មី បច្ចេកវិទ្យា និងការផ្លាស់ប្តូរអាកាសធាតុ។
- Physics of the Future: How Scientist Will Shape Human Destiny and Our daily Lives by the Year 2100
ស្នាដៃនេះនិពន្ធដោយអ្នកនិពន្ធ Michio Kaku ដែលត្រូវបានបោះពុម្ពផ្សាយនៅឆ្នាំ2011 ជាមួយនឹងគំនិតដែលបង្ហាញពីការពិភាក្សាលើការអភិវឌ្ឍបច្ចេកវិទ្យា ឱសថវេជ្ជសាស្ត្រ ការធ្វើដំណើរ និងការប៉ាន់ស្មានពីការរុករកថ្មីៗរបស់ពិភពលោកក្នុងរយៈពេល 100ឆ្នាំទៀត។
ក្នុងចំណោមការប៉ាន់ស្មានរបស់គាត់ មានរឿងអស្ចារ្យមួយចំនួនដែលមនុស្សគិតថានឹងអាចកើតមានដូចជា ជណ្តើរយន្តលំហ រថយន្តអាចហោះបាន និងតំបន់នានាដែលគ្រប់គ្រងដោយអីុនធើណិត៕
