នវានុវត្តន៍ និង​សហគ្រិន​ភាពជា​ជំនាញ ដែល​សង្គម​ត្រូវការ​បំផុត​នៅ​ថ្ងៃ​អនាគត

និស្សិតកំពុងពិនិត្យ និងស្វែងយល់ពីបច្ចេកវិទ្យាថ្មីៗ

នាពេល​បច្ចុប្បន្ននេះ យើង​សង្កេតឃើញថា​មាន​បញ្ហា​មួយចំនួន​ទាក់ទង​នឹង​ភាពមិន​ស៊ីចង្វាក់​គ្នា​រវាង​ជំនាញ​ដែលមាន​នៅក្នុង​ប្រព័ន្ធ​អប់រំ និង​ជំនាញ​ដែលជា​តម្រូវការ​របស់​សង្គម។

នៅក្នុង​វិស័យ​អប់រំ​របស់​ប្រទេស​នៅ​លោកខាងលិច ជាទូទៅ​បានបង្ហាញ​លទ្ធ​ផល​ឱ្យដឹងថា បើទោះបីជា​យើង​រកឃើញ​ពិន្ទុ​គុណភាព​នៃ​ភាព​វៃឆ្លាត (IQ) តាំងពី​ឆ្នាំ1990មែន តែ​គេ​សង្កេតឃើញថា សញ្ញាណ​នៃ​ភាព​ច្នៃប្រឌិត​របស់​មនុស្ស​នៅតែ​មិនទាន់មាន​ភាពខ្លាំង​ក្លា​នៅឡើយ។ ការអប់រំ​រៀនសូត្រ តាមបែប​ប្រពៃណី​ត្រូវបាន​គេ​រកឃើញថា​មិនបាន​បង្រៀន​មនុស្ស​ច្រើន​ទេ​អំពី​នវានុវត្តន៍ និង​ការគិត​បែប​សហគ្រិន ខណៈ​ពិភពលោក​បាន​ដើរ​យ៉ាង​លឿន ហើយ​ត្រូវ​ការជំនាញ​ទាំងអស់នេះ។

ដើម្បីឱ្យ​មនុស្ស​ដើរ​ទាន់​ការប្រែប្រួល​របស់​ពិភពលោក ការអប់រំ​រៀនសូត្រ​ចាំបាច់​ត្រូវតែមាន​ការផ្លាស់ប្តូរ។ ដូចដែល​យើង​បានដឹងហើយថា យើង​រស់នៅក្នុង​ពិភពលោក​ដែលមាន​គ្រឿងយន្ត​ទំនើប និង​មាន​បច្ចេកវិទ្យា​រហូតដល់ AI ទៅហើយ តែ​យើង​នៅតែ​ប្រើប្រាស់​ប្រព័ន្ធ​អប់រំ​ដែល​រៀបចំ​សម្រាប់​មនុស្ស​ធ្វើ​ការងារ​រោងចក្រ​កាលពី​ជាង 200ឆ្នាំមុន​ដដែល។ ដើម្បី​ដោះស្រាយ​បញ្ហា​នេះ ប្រទេស​ទាំងអស់​ចាំបាច់​ត្រូវតែ​ផ្តោតលើ​ការពង្រឹង​ជំនាញ និង​ជំរុញ​ឱ្យ​អ្នកសិក្សា​ទទួលបាន​នូវ​ចំណេះដឹង​ដែល​ពិភពលោក​ត្រូវការ​ជា​ជំហាន​បន្តិចម្តង។

ការអប់រំ និង​រៀនសូត្រ​ពី​សហគ្រិន​ភាពជា​ជំនាញ​ដែល​ពិភពលោក​ត្រូវ​ការជំនាញ​សហគ្រិនភាព គឺជា​ការបង្រៀន​ពី​សារៈសំខាន់​នៃ​នវានុវត្តន៍ និង​គំនិត​ច្នៃប្រឌិត សម្រាប់​ជួយ​មនុស្ស​ឱ្យមាន​ការអភិវឌ្ឍ​ប្រកបដោយ​ភាពបត់បែន ដែល​ធ្វើឱ្យ​ផ្នត់គំនិត​របស់​ពួកគេ​មានការ​រីកចម្រើន (growth mindset) ដើម្បី​ជា​ថាមពល​សម្រាប់​ដោះស្រាយ​បញ្ហាថ្មីៗដែល​នឹង​កើតមានឡើង​សម្រាប់​ការរស់នៅ​របស់​មនុស្ស។ ការបង្រៀន​ជំនាញ​សហគ្រិនភាព​បែប​ថ្មី​នេះ​គឺ មិនមែន​បង្រៀន​លើ​ជំនាញ​គណនេយ្យ ឬ​ការធ្វើ​បទ​បង្ហាញ​ពី​អាជីវកម្ម (pitching) នោះទេ តែ​ជាការ​បង្រៀន​ដែល​ផ្តោតលើ​ការជំរុញ​ទឹកចិត្ត​ឱ្យមាន​ភាព​តស៊ូ ចេះ​ដោះស្រាយ​បញ្ហា និង​វិធីសាស្ត្រ​ដើម្បី​សម្រេច​ចក្ខុវិស័យ​របស់ខ្លួន​ក្នុងការ​អភិវឌ្ឍ​ប្រកបដោយ​ភាព​វិជ្ជមាន។

ជំនាញ​ទាំងអស់នេះ គឺមាន​សារៈសំខាន់​ខ្លាំងណាស់​សម្រាប់​ទីផ្សារការងារ​នៅ​ថ្ងៃ​អនាគត ហើយ​មនុស្ស​ចាំបាច់​ត្រូវ​ទទួល​នូវ​ចំណេះដឹង​ដើម្បី​ក្លាយជា​ប្រជាជន​សកម្ម​ដែលមាន​សមត្ថភាព​ឆ្លើយតប​បាន​ជាមួយនឹង​ការផ្លាស់ប្តូរ​យ៉ាង​លឿន​របស់​ពិភពលោក។ គោលដៅ​សម្រាប់​ការផ្លាស់ប្តូរ​ប្រព័ន្ធ​អប់រំ​បែប​ថ្មី​នេះ​គឺជា​ចំណុច​អាទិភាព​មួយ​របស់​គោលនយោបាយ​អឺរ៉ុប​នាពេល​បច្ចុប្បន្ននេះ។

យោងតាម​គម្រោងការ​រ​បស់​សហភាព​អឺរ៉ុប ការបណ្តុះបណ្តាល​ជំនាញ​សហគ្រិនភាព​គឺ​ប​ញ្ជូ​ល​នូវ​ជំនាញសំខាន់ៗជាច្រើន​ដូចជា បំ​ណិ​ន​ជីវិត និង​ជំនាញ​ជាច្រើន​ផ្សេងទៀត​ដែល​អាច​ជំរុញ​ឱ្យ​បង្កើតជា​អាជីវកម្ម។ ចំណេះដឹង​ទាំងអស់នេះ អាចជួយ​អ្នកសិក្សា​ឱ្យមាន​សមត្ថភាព​ក្នុងការ​បង្កើត​គំនិត និង​ឱកាសថ្មីៗ ដើម្បី​បំប្លែង​វា​ឱ្យទៅជា​គុណ​តម្លៃ​សម្រាប់​មនុស្ស​ទូទៅ មិន​ថា​ផ្នែក​ហិរញ្ញវត្ថុ វប្បធម៌ ឬ​សង្គម​នោះទេ។

លទ្ធផល​នៃ​ការបង្រៀន​ពី​គំនិត​ច្នៃប្រឌិត មានតម្លៃ​ជា​សកល​សម្រាប់​មនុស្ស​មុខ​វិជ្ជា​ដែល​ផ្តល់​គុណ​តម្លៃ​ប្រកបដោយ​និរន្តរភាព​នាពេល​បច្ចុប្បន្ននេះ គឺ​គំនិត​ច្នៃប្រឌិត និង​នវានុវត្តន៍ ព្រោះ​ជំនាញ​នេះ​អាចបង្កើត​ឱ្យមាន​សមិទ្ធ​ផល​គ្រប់យ៉ាង ជាមួយនឹង​ការទាញយក​ប្រយោជន៍​ជា​និរន្តរ៍​ពី​ការដោះស្រាយ​បញ្ហា​មនុស្ស។

អ្នកជំនាញ​រកឃើញថា នៅពេលដែល​ប្រព័ន្ធ​អប់រំ​ចាប់ផ្តើម​ងាក​មក​បង្រៀន និង​បំផុស​ឱ្យមាន​គំនិត​ច្នៃប្រឌិត​នោះ​អ្នកសិក្សា​នឹង​លែងមាន​ភាព​ធុញទ្រាន់​ទៀតហើយ ព្រោះ​អ្វីដែល​គេ​កំពុង​ធ្វើ​គឺ​បំបែក​មូលដ្ឋានគ្រឹះ​នៃ​គំនិតចាស់ៗដើម្បី​បង្កើតជា​ផលិតផល ឬ​សមិទ្ធផល​ថ្មី​ដែលមាន​ប្រយោជន៍។ គំនិត​ទាំងអស់នេះ​អាច​នឹង​ផ្តល់ឱកាស​ជាច្រើន​ដើម្បី​បង្កើតជា​គំនិត​ឆ្លាត​វៃ​ដែល​អាច​ជំនួយ​ដល់​ការធ្វើ​អាជីវកម្ម ព្រមទាំង​ដំណោះស្រាយថ្មីៗដែល​ធ្វើឱ្យ​ការរស់នៅ​របស់​មនុស្ស​កាន់​តែមាន​ភាពងាយស្រួល។

ឧស្សាហកម្ម សេវាកម្ម និង​ផលិតកម្មផ្សេងៗ រួមទាំង​បច្ចេកវិទ្យា​នឹង​លែង​ក្លាយជា​រឿង​ថ្មី​ពេក​ហើយ​សម្រាប់​មនុស្ស​នៅ​ប៉ុន្មាន​ឆ្នាំ​ខាងមុខ​ទៀត ហេតុនេះ​គំនិត​ច្នៃប្រឌិត​លើ​របស់​ទាំងអស់នោះ​នឹង​ក្លាយជា​គន្លឹះ​ប្រកបដោយ​គុណ​តម្លៃ ដើម្បី​បន្ត​អភិវឌ្ឍ និង​ទាញយក​ប្រយោជន៍​ពី​វិស័យសំខាន់ៗទាំងអស់នោះ៕

Advertisement