ក្រុមហ៊ុន Sony បានដាក់ចេញនូវស៊េរីប្រដាប់បំពងសំឡេងតូចៗជាច្រើនម៉ូដែលកាលពីប៉ុន្មានខែមុនជាមួយនឹងលក្ខណៈសម្បត្តិល្អប្រសើរជាច្រើនសម្រាប់អ្នកប្រើប្រាស់ ទោះបីជាវាមានទំហំតូចប៉ុណ្ណឹងក្ដី។
សម្រាប់អ្នកចូលចិត្តសំឡេងតន្រ្ដីដាក់តាមខ្លួន Sony SRS-XB40 អាចជាជម្រើសថ្មី និងល្អមួយរបស់លោកអ្នក។ ឧបករណ៍បំពងសំឡេងមួយនេះត្រូវបានក្រុមហ៊ុន Sony បញ្ជាក់ឱ្យដឹងថា វាត្រូវបានបង្កើតឡើងយ៉ាងពិសេសបំផុត ជាមួយនឹងរូបរាងតូចតែស្រស់ស្អាត និងគួរឱ្យទាក់ទាញ ផ្តោតខ្លាំងទៅលើមិត្តយុវវ័យ។ វាអាចចាក់ចម្រៀងតាមរយៈបច្ចេកវិទ្យា Bluetooth និង NFC លើសមត្ថភាពថ្មបាន 24 ម៉ោង និងបំពាក់នូវបច្ចេកវិទ្យាការពារការជ្រាបទឹក Water Resistant បាន ទោះជាស្ថិតនៅក្នុងកាលៈទេសៈណាក៏អាចកម្សាន្តបានដែរ។
SRS-XB40 ក៏បានបំពាក់បច្ចេកវិទ្យាសំឡេង EXTRA BASS ជំនាន់ទី 2 ដែលយើងអាចបន្ថែមសំឡេងបុកបាស់ខ្លាំងបាន ដោយគ្រាន់តែចុងប៊ូតុងនៅផ្នែកខាងលើ ព្រមជាមួយនឹងភ្លើងពណ៌លោតរាំតាមចង្វាក់ភ្លេងទៀតផង។ ចំណុចដែលកាន់តែពិសេសមួយទៀត គឺវាមានបំពាក់នូវបច្ចេកវិទ្យា Wireless Party Chain ដែលអាចតភ្ជាប់កូនធុងបាស់នេះទៅកូនធុងបាស់ដូចគ្នាផ្សេងទៀតបានចំនួន 10 ដែលជាស៊េរីតែមួយ (ចាក់បទចម្រៀងជាក្រុម)។ ក្នុងនោះយើងក៏អាចទាញយកកម្មវិធី Fiestable app សម្រាប់គ្រប់គ្រង និងរៀបចំចម្រៀង ហើយអាចផ្លាស់ប្ដូរពណ៌ភ្លើងដែលលោតលើកូនធុងបាស់ SRS-XB40 នេះព្រមជាមួយមុខងារ DJ Sound Effects ចេញពីស្មាតហ្វូនបានទៀតផង។ ចំពោះតម្លៃ Sony SRS-XB40 នេះត្រូវបានក្រុមហ៊ុនដាក់ក្នុងតម្លៃ 199 ដុល្លារ សម្រាប់ទីផ្សារកម្ពុជា៕
