នេះបើយោងតាមការប្រកាសរបស់ក្រុមហ៊ុន កាលពីថ្ងៃចន្ទកន្លងទៅ បានឱ្យដឹងថា ក្រុមហ៊ុនលក់ទំនិញអនឡាញ Amazon ចង់ជួលបុគ្គលិកផ្នែកឃ្លាំងផ្ទុកទំនិញ និងដឹកជញ្ជូនបន្ថែមទៀតចំនួន 10ម៉ឺននាក់ ដើម្បីបំពេញតម្រូវការដែលមានការកើនឡើងខ្លាំង អំឡុងពេលផ្ទុះការឆ្លងរាលដាលនៃមេរោគ COVID-19។
ក្រុមហ៊ុនក៏នឹងបន្ថែមប្រាក់កម្រៃគិតម៉ោង សម្រាប់បុគ្គលិកក្នុងផ្នែកនេះដោយបន្ថែម 2 ដុល្លារទៀត សម្រាប់នៅសហរដ្ឋអាមេរិក រហូតដល់ខែមេសា។ ស្របពេលដែលពលរដ្ឋអាមេរិកកាន់តែច្រើន កំពុងសម្ងំនៅក្នុងផ្ទះ ដើម្បីការពារខ្លួនពីការឆ្លងវីរុសកូរ៉ូណា ពួកគេបានងាកទៅប្រើហាងលក់ទំនិញអនឡាញដូចជា Amazon ដើម្បីទិញគ្រឿងទេស និងសម្ភារប្រើប្រាស់ក្នុងផ្ទះ។
Amazon បានប្រាប់អតិថិជនរបស់ខ្លួនថា អាចនឹងមានការពន្យារពេលនៃការដឹកជញ្ជូនទំនិញ ហើយក្រុមហ៊ុនក៏បានអស់ស្តុកទំនិញមួយចំនួនដែលមានគេរកទិញច្រើនផងដែរ។
ក្នុងសេចក្ដីថ្លែងការណ៍មួយ លោក Dave Clark ដែលជាអនុប្រធានប្រតិបត្តិទូទាំងពិភពលោក បាននិយាយថា ៖ “យើងចង់ឱ្យមនុស្សទាំងនោះដឹងថា ពួកយើងស្វាគមន៍ពួកគេមកកាន់ក្រុមរបស់យើង រហូតដល់គ្រប់យ៉ាងត្រឡប់ទៅដូចដើមវិញ”
រដ្ឋមួយចំនួន ដូចជា New York និងរដ្ឋ Ohio ជាដើម បានបិទហាងជាច្រើនកន្លែងដើម្បីកាត់បន្ថយឱកាសនៃការឆ្លងវីរុសកូរ៉ូណា ដែលនេះជាហេតុធ្វើឱ្យបុគ្គលិកជាច្រើននាក់លែងមានការងារធ្វើ និងមិនមានប្រាក់ចំណូលក្នុងរយៈពេលប៉ុន្មានសប្ដាហ៍ខាងមុខទៀត។ ដោយឡែក Amazon គឺចង់បានមនុស្សទាំងនោះមកបម្រើការងារនៅឃ្លាំងទំនិញរបស់ខ្លួន៕
