សហព័ន្ធសេវាអប់រំនៃកម្ពុជាសំណូមពរឱ្យភាគីពាក់ព័ន្ធជួយគ្រឹះស្ថានអប់រំឯកជនក្នុងពេលលំបាកដែលត្រូវប្រយុទ្ធប្រឆាំង covid-19

នៅអំឡុងពេលសម្រាកវិស្សមកាលតូចនេះ គ្រឹះស្ថានអប់រំ​ឯកជនទាំងអស់បាន និងកំពុងប្រឹងប្រែងបន្តការបង្រៀនពីចម្ងាយសម្រាប់ជូនសិស្ស និស្សិតទាំងអស់តាមលទ្ធភាពដែលខ្លួនមាន។ ក្នុងដំណាក់កាលនេះ គ្រឹះស្ថានអប់រំ​ស្ទើរទាំងអស់ជាពិសេស​គ្រឹះស្ថាន​ដែលទទួលថ្លៃសិក្សាប្រចាំខែ និងត្រីមាសកំពុងជួបបញ្ហាប្រឈមជាច្រើនលើការបើកប្រាក់ឈ្នូលជូនបុគ្គលិក​ គ្រូបង្រៀន ថ្លៃឈ្នួលអគារ និងកាតព្វកិច្ច​ចំណាយផ្សេងៗទៀត។

លោក ប៉ិច បូឡែន ប្រធានសហព័ន្ធសេវាអប់រំនៃកម្ពុជា និងជាអគ្គនាយកក្រុមហ៊ុន Westline Education Group បានលើកឡើងថា​ក្នុងដំណាក់កាលនៃការប្រយុទ្ធប្រឆាំងនឹងមេរោគ covid-19 នេះលោកសូមថ្លែងអំណរគុណចំពោះរាជរដ្ឋាភិបាលដែលបានអំពាវនាវឱ្យមានការយោគយល់ពីម្ចាស់អគារ និងបានអន្តរាគមន៍គោលនយោបាយជាច្រើនដល់ធុរជនកម្ពុជា។ នៅក្នុងនោះដែរលោកក៏បានថ្លែងអំណរគុណផងដែរចំពោះក្រសួងសុខភិបាលដែលបាន និងកំពុង​ដឹកនាំការងារប្រយុទ្ធប្រឆាំងការរីករាលដាលនៃជំងឺ covid-19 និងថ្លែងអំណរគុណដល់ក្រសួងអប់រំដែលបានផ្តួចផ្តើម​ដំណើរការ​ ការគាំទ្រឱ្យមានកម្មវិធីរៀនពីច​ម្ងាយជូន​សិស្សចំណេះទូទៅខ្មែរ។ ដើម្បីរក្សានិរន្តរភាពសាលារៀន ក៏ដូចជាស្ថេរភាពការងារ​បុគ្គលិក គ្រូបង្រៀន​តាមគ្រឹះស្ថាន​អប់រំឯកជនទាំងអស់ លោក​ស្នើរសូមឱ្យស្ថាប័នពាក់ព័ន្ធមេត្តាពិចារណា​ចាត់វិស័យអប់រំឯកជនដែលកំពុងផ្តល់ការងាររាប់ម៉ឺននាក់​ និងផ្តល់ការសិក្សាដល់សិស្ស និស្សិតរាប់សែននាក់ ជាវិស័យអាទិភាពមួយផង។


លោក ប៉ិច បូឡែន ក៏បានស្នើរសុំផងដែរឱ្យ​ភាគីពាក់ព័ន្ធមេត្តាពិចារណា​ផ្តល់ជូនយន្តការពិសេសមួយចំនួនជូនដល់គ្រឹះស្ថានឯកជន​នានាដោយក្នុងនោះយន្តការសំខាន់ដំបូង គឺ​សូមឱ្យមានការរៀបចំឡើងវិញ​ ឬការផ្តល់ឥណទានបន្ថែមដោយមានការបត់បែន និងយោគយល់។ បន្ថែមពីលើនេះលោកស្នើរសូមឱ្យមានការលើកលែងការបង់ប្រាក់របបបេឡាជាតិសន្តិសុខសង្គម​រហូតដល់ស្ថានភាពប្រសើរឡើងវិញជាថ្មី និងសុំឱ្យមានការផ្តល់ប្រាក់ឧបត្ថម្ភបន្ថែមចំនួន 20% នៃប្រាក់ខែអប្បបរមា 190ដុល្លារដល់បុគ្គលិកអប់រំ និងគ្រូបង្រៀន​ដែលអាចនឹងទទួលផលប៉ះពាល់​ពីការកត់បន្ថយបៀវត្ស​ ការព្យួរការងារ ឬការផ្អាកអាជីវកម្ម។

ប្រធានសហព័ន្ធសេវាអប់រំនៃកម្ពុជា ក៏បានស្នើរសុំផងដែរទៅដល់ភាគីពាក់ព័ន្ធទាំងអស់ឱ្យមានការពន្យារពេលរៀបចំសៀវភៅការងារបុគ្គលិកបរទេសក្នុងអំឡុងពេលនៃការឆ្លងកាត់ការប្រយុទ្ធប្រឆាំងមេរោគ covid-19 នេះ និង​សូមផ្តល់ជូននូវកញ្ចប់ថវិកាសមរម្យណាមួយសម្រាប់គ្រឹះស្ថានអប់រំ ដែលរងផលប៉ះពាល់​ខ្លាំងដោយសារ covid-19 សម្រាប់ដំណើរការគ្រឹះស្ថានថ្មីឡើងវិញ។ ចំពោះម្ចាស់អគារវិញលោកស្នើរសុំឱ្យពួកគាត់ទាំងអស់ដាក់ចិត្តយល់ និងស្វែងរកដំណោះស្រាយឈ្នះ-ឈ្នះ មួយជាមួយម្ចាស់អាជីវកម្មក្នុងអំឡុងពេលនេះ។

គួរបញ្ជាក់ផងដែរថា កន្លងមកសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានអំពាវនាវដល់ម្ចាស់ទីតាំងជួល​សម្រាប់ម្ចាស់អាជីវកម្មឱ្យមានការយោគយល់ក្នុងកាលៈទេសៈដែលម្ចាស់អាជីវកម្មនីមួយៗកំពុងបាត់បង់ចំណូល​ ដោយម្ចាស់ទីតាំងអាចបញ្ចុះតម្លៃប្រមាណ 50% ឬច្រើនជាងនេះដើម្បីជួយដល់អតិថិជនរបស់ខ្លួនដោះស្រាយបញ្ហាអាជីវកម្ម​​រហូតស្ថានភាពត្រឡប់មកប្រសើរឡើងវិញ។

សម្តេចតេជោ ហ៊ុន សែន បានមានប្រសាសន៍ថា៖ «​សូមឱ្យមានការយោគយល់គ្នា នៅលើបញ្ហាហ្នឹង ខ្ញុំបានស្តាប់នូវមនុស្សមួយចំនួនដែលបានរកស៊ីជួល អគារគេ ជួលទីតាំងគេ ឥឡូវម្ចាស់ដើមទារពេញថ្លៃ ក្នុងពេលដែលគ្នារកចំណូលអត់បាន អញ្ចឹងទេ សូមកុំកាប់មេមាន់ ទទួលទាន គួរត្រូវរក្សាមេមាន់នេះ ដើម្បីថ្ងៃក្រោយ ឱ្យវាពងកូនតទៅទៀត អញ្ចឹងប្រសិនបើកាប់គ្នា ក្នុងពេលនេះគឺបានសេចក្តីថា ហាងហ្នឹងត្រូវបិទទ្វារ រហូតគ្មានអ្នកណាជួល ទៅថ្ងៃក្រោយ។ ប៉ុន្តែ ប្រសិនជាអនុគ្រោះឱ្យគ្នា 1ខែ 2ខែ ឬក៏បញ្ចុះថ្លៃប៉ុណ្ណនេះភាគរយ ឬ50ភាគរយ 60 ឬ70ភាគរយ គឺយើងអាចរក្សាអតិថិជនឱ្យជួលត្រឡប់មកវិញ នៅពេលដែលសភាពការណ៍បានរើបម្រាស់ត្រឡប់មកវិញ»។

លោក ប៉ិច បូឡែន បាននិយាយថា៖ «ខ្ញុំជឿជាក់ថាយើងទាំងអស់គ្នា រដ្ឋាភិបាល ស្ថាប័នរដ្ឋ វិស័យឯកជន មាតាបិតា អ្នកអាណាព្យាបាល និងគ្រឹះស្ថានអប់រំ រួមទាំងប្រជាជនទាំងអស់គ្នាពិតជាអាចយកជ័យជំនះក្នុងការទប់ស្កាត់ការរាលដាលនៃមេរោគ covid-19នេះ ហើយនឹងអាចបន្តការអភិវឌ្ឍធនធានមនុស្ស និងសេដ្ឋកិច្ច​ប្រទេសយើងឱ្យរីកចម្រើនបន្តដូចចិត្តយើងចង់បានទាំងអស់គ្នា»។

កន្លងមកក្នុងដំណាក់កាលនៃការទប់ស្កាត់ការរីករាលដាលនៃ​មេរោគ covid-19 សហព័ន្ធសេវាអប់រំ​កម្ពុជា បានចូលរួមនូវថវិកាប្រមាណ 1ម៉ឺនដុល្លារ និងក្រុមហ៊ុន Westline Education Group ក៏បានចូលរួម​ថវិកាចំនួន 1ម៉ឺនដុល្លារផងដែរជាមួយសម្តេចនាយករដ្ឋមន្ត្រីក្នុងយុទ្ធនាការទប់ស្កាត់ការរីករាលជំងឺ covid-19៕