ក្រសួង​អប់រំ ដាក់ឱ្យ​ប្រើប្រាស់​កម្មវិធី​សិក្សា​តាម​អន​ឡាញ សម្រាប់​សិ​ក្ស​ចាប់​ថ្នាក់​ទី1 ដល់ទី12

កម្មវិធី​ទូរ​សព្ទ​ដៃ​ឆ្លាត​វៃ ដែលមាន​ឈ្មោះថា «កម្មវិធី​ស្វ័យ​សិក្សា MoEYS E-Leaming» នឹងត្រូវ​បាន ក្រសួង​អប់រំ យុវជន និង​កីឡា ដាក់ឱ្យ​ដំណើរការ​ចាប់ពី​ថ្ងៃស្អែក​នេះ​តទៅ សម្រាប់​ឱ្យ​សិស្សានុសិស្ស សិក្សា​តាម​ប្រពន្ធ​អ៊ី​ន​ធើ​ណិ​ត។

ក្រសួង​អប់រំ សហការ​ជាមួយ សហភាព​សហព័ន្ធ​យុវជន​កម្ពុជា ផលិតកម្ម​វិធី​ទូរ​សព្ទ​ដៃ​ឆ្លាត​វៃ​មួយ​ដែលមាន​ឈ្មោះថា «កម្មវិធី​ស្វ័យ​សិក្សា MoEYS E-Leaming» ដែល​បង្កើតឡើង​ដោយយោង​ទៅតាម​ចក្ខុវិស័យ​របស់​ក្រសួង​អប់រំ និង​បរិបទ​ឧស្សាហ​កម្ម 4.0 ព្រមទាំង​ជា ការឆ្លើយតប​ទៅនឹង​បញ្ហា​Covid-19ផងដែរ។ នេះ​បើតាម​សេចក្ដី​ជំរាបជូន ប្រធាន​មន្ទីរអប់រំ យុវជន និង​កីឡា រាជធានី-ខេត្ត របស់​រដ្ឋមន្ត្រី​នៃ​ក្រសួង​អប់រំ យុវជន និង​កីឡា ឯកឧត្តម​បណ្ឌិត​សភាចា​រ្យ  ហង់ជួន ណា​រ៉ុ​ន ចុះ​ថ្ងៃទី5 ខែឧសភា ឆ្នាំ2021។

Advertisement

ក្រសួង​អប់រំ បានឱ្យដឹងថា «កម្មវិធី​ស្វ័យ​សិក្សា MoEYS E-Leaming» សម្រាប់​សិស្សានុសិស្ស ចាប់ពី​ថ្នាក់​ទី1 ដល់ទី12 នេះ មាន​សៀវភៅ​សិក្សា​អេឡិចត្រូនិក សៀវភៅ​សិក្សា​គោល សៀវភៅ​កំណែ​អំ​ណាន​ទូទៅ ចំណេះដឹង​សកល រឿងនិទាន កម្មវិធី​តេស្ត​សមត្ថភាព​សិស្ស និង​មាន​ទំព័រ​ព័ត៌មាន​អប់រំ​ផងដែរ។

«កម្មវិធី​ស្វ័យ​សិក្សា MoEYS E-Leaming» នឹងត្រូវ​បានដាក់​ឱ្យប្រើ​ប្រាស់​ចាប់ពី​ថ្ងៃទី7 ខែឧសភា ឆ្នាំ2021។ អាណា​ព្យាបាល​ សិស្សានុសិស្ស និង​សាធារណជន អាច​ទាញយក​កម្មវិធី​ MoEYS E-Leaming ដោយ​គ្រាន់តែ​ចូលទៅ​កាន់​គេហទំព័រ http://onelink.to/moeysapp , កម្មវិធី PlayStore, AppStore និង App Gallery នៅលើ​ទូរស័ព្ទដៃ៕

ប្រភព​៖ ក្រសួង​អប់រំ
ដកស្រង់​៖ បុត្រា

Advertisement