(សហរដ្ឋអាម៉េរិក)-ប្រព័ន្ធរ៉ូបូតមហាល្អិតធ្វើអំពីភាគល្អិតនៃអ៊ុកស៊ីតដែក អាចប្រែរូបទៅតាមទម្រង់របស់ធ្មេញ និងសម្អាតធ្មេញបានយ៉ាងមានប្រសិទ្ធភាព។
ក្រុមវិស្វករនៅសាកលវិទ្យាល័យ Pennsylvania បានអភិវឌ្ឍប្រព័ន្ធរ៉ូបូតម្យ៉ាងដែលល្អិតបំផុត អាចប្រែរូបរាងទៅជាសរសៃរឹង ឬដូចទៅនឹងអំបោះសម្រាប់ដុសរូតចន្លោះធ្មេញ។ ពួកវាមិនត្រឹមតែសម្អាតធ្មេញនោះទេ តែថែមទាំងអាចបញ្ចេញសារធាតុកម្ចាត់បាក់តេរីអាក្រក់ទៀតផង។ លទ្ធផលនៃការស្រាវជ្រាវថ្មីនេះទើបតែត្រូវបានចុះផ្សាយលើទស្សនាវដ្ដី ACS Nano កាលពីថ្ងៃទី ២៨ មិថុនាកន្លងទៅ។
ប្រព័ន្ធរ៉ូបូតនេះរួមមាន ភាគល្អិតនៃអ៊ុកស៊ីតដែក (Iron oxide nanoparticle) ដែលអាចប្រមូលផ្ដុំគ្នាបង្កើតបានជារូបរាងផ្សេងៗ ទៅតាមទម្រង់របស់ធ្មេញ និងអាចរុលចូលទៅសម្អាតត្រង់កន្លុកកន្លៀកនៃចន្លោះធ្មេញ ដោយវាអាចត្រូវបានបញ្ជាដោយមេដែកពីខាងក្រៅ។
ប្រព័ន្ធនេះអាចបញ្ចេញសារធាតុ អ៊ីដ្រូសែន ភើរ៉ូស៊ីត (hydrogen peroxide) ដែលនាំឱ្យមានប្រតិកម្មរ៉ាឌីកាល់សេរី ជួយកម្ចាត់បាក់តេរីអាក្រក់នៅលើធ្មេញ និងសម្អាតស្រទាប់ជីវសាស្ត្រដែលពួកបាក់តេរីបានបន្សល់ទុកនៅលើធ្មេញ៕
