ជើងហោះហើរជាប្រវត្តិសាស្ត្ររបស់រ៉ុកកែត Falcon 9 នាថ្ងៃទី27ឧសភាខាងមុខនឹងក្លាយជាលើកដំបូងបង្អស់ដែលទីភ្នាក់ងារអវកាសអាមេរិកាំង NASA បាញ់បង្ហោះយានអវកាសដឹកអវកាសយានិកពីទឹកដីសហរដ្ឋអាមេរិក ក្រោយរយៈពេលជិត1ទសវត្សរ៍មកនេះ។
រ៉ុកកែត Falcon 9 របស់ក្រុមហ៊ុន SpaceX នឹងត្រូវបានបាញ់បង្ហោះពីមជ្ឈមណ្ឌលអវកាស Dennedy ក្នុងរដ្ឋ Florida សហរដ្ឋអាមេរិក។ នៅក្នុងយានអវកាស Crew Dragon របស់ក្រុមហ៊ុន SpaceX នោះ នឹងមានអវកាសយានិកជនជាតិអាមេរិកាំង2រូប។ គោលដៅរបស់ពួកគេគឺស្ថានីយអវកាសអន្តរជាតិ(ISS) ជាកន្លែងដែលពួកគេត្រូវចំណាយពេលចាប់ពី1ខែទៅ4ខែ នៅលើកម្ពស់400គីឡូម៉ែត្រពីលើផែនដី។
ជើងហោះហើរនេះ មិនត្រឹមតែជាសញ្ញានៃជោគជ័យផ្នែកបច្ចេកវិទ្យានោះទេ ប៉ុន្តែវាក៏មានអត្ថន័យធំធេងទាក់ទងនឹងភូមិសាស្ត្រនយោបាយរបស់អាមេរិកាំងផងដែរ។
NASA នឹងលែងពឹងផ្អែកទៅលើកាំជ្រួច Soyuz របស់រុស្ស៊ីដូចមុនទៀតហើយក្នុងការហោះហើរទៅកាន់ស្ថានីយអវកាសអន្តរជាតិ ISS ដោយពួកគេនឹងអាចបញ្ជូនអវកាសចរឡើងទៅទីអវកាសពីសហរដ្ឋអាមេរិកផ្ទាល់។
នេះនឹងជាបេសកកម្មឡើងទៅកាន់អវកាសដែលមានមនុស្សបើកបរដំបូងបង្អស់ដែលត្រូវបានបាញ់បង្ហោះពីទឹកដីសហរដ្ឋអាមេរិកក្នុងរយៈពេលជិត1ទសវត្សរ៍មកនេះ។
ក្រុមហ៊ុន SpaceX របស់មហាសេដ្ឋី Elon Musk បានទទួលជោគជ័យក្នុងការហោះហើរលក្ខណៈហ្វឹកហាត់មួយដោយប្រើអវកាសយានិកសិប្បនិម្មិតកាលពីខែមីនា ឆ្នាំ2019។
ពួកគេក៏បានដឹកជញ្ជូនទំនិញឡើងទៅកាន់ស្ថានីយអវកាសអន្តរជាតិ ចំនួន19លើក ចាប់ពីឆ្នាំ2012 រហូតមកដល់បច្ចុប្បន្ន ដោយប្រើប្រាស់យានអវកាស Crew Dragon៕
ប្រភព៖ សារព័ត៌មានបរទេស
