យ៉ាងហោចណាស់ ក៏មានកម្មវិធីចំនួន 59ដែរ ដែលនឹងត្រូវប្រកាសឱ្យឈប់ប្រើប្រាស់នៅប្រទេសឥណ្ឌា ក្នុងនោះក៏មាន TikTok និង WeChat ផងដែរ។
ក្នុងរយៈពេលប៉ុន្មានឆ្នាំចុងក្រោយនេះ ប្រទេសឥណ្ឌាបានលេចមុខ និងក្លាយជាអ្នកច្នៃប្រឌិតឈានមុខគេ នៅពេលនិយាយពីការជឿនលឿនផ្នែកបច្ចេកវិទ្យា និងជាទីផ្សារចម្បងនៅក្នុងលម្ហឌីជីថល។
តែថ្មីៗនេះ ក្រសួងបច្ចេកវិទ្យាព័ត៌មានរបស់ប្រទេសឥណ្ឌា បានធ្វើការហាមឃាត់ ឈប់ឱ្យប្រើប្រាស់កម្មវិធីទូរស័ព្ទចំនួន 59កម្មវិធី ដែលមាននៅលើប្រព័ន្ធប្រតិបត្តិការ Android និងប្រព័ន្ធប្រតិបត្តិការ iOS ក្រោយពីពិនិត្យឃើញថា មានគុណវិបត្តិជាច្រើន ពាក់ព័ន្ធនឹងកម្មវិធីទាំងអស់នេះ ដែលភាគច្រើនត្រូវបានដាក់ឱ្យប្រើប្រាស់សម្រាប់ផ្សព្វផ្សាយពាណិជ្ជកម្ម និងដើម្បីបម្រើផលប្រយោជន៍ឱ្យក្រុមហ៊ុនពួកគេតែប៉ុណ្ណោះ ហើយម្យ៉ាងទៀត កម្មវិធីនេះអាចធ្វើឱ្យប៉ះពាល់ដល់សិទ្ធិបុគ្គល ក៏ដូចជាសិទ្ធិថ្នាក់ដឹកនាំ ក្នុងការលួចទាញយកទិន្នន័យទៀតផង។
នាយកដ្ឋានប្រឆាំងបទល្មើសបច្ចេកវិទ្យា ក៏ទើបតែបានផ្សព្វផ្សាយកាលពីសប្ដាហ៍កន្លងទៅដែរ ទាក់ទងនឹងកម្មវិធី Tiktok ដែលបានទាញយកទិន្នន័យឯកជនភាពពី Clipboards របស់អ្នកប្រើប្រាស់ដោយគ្មានការអនុញ្ញាតពីពួកគេ។ ការទាញយកទិន្នន័យនេះ គឺជាការរំលោភសិទ្ធិបុគ្គលយ៉ាងធ្ងន់ធ្ងរ ព្រោះទិន្នន័យដែលពួកគេទាញយកនោះអាចជា លេខសម្ងាត់ ឬលេខគណនីដែលនាំឱ្យមានការជ្រៀតចូលផ្សេងៗទៀតដោយពុំមានការអនុញ្ញាត។
ដើម្បីចៀសវាងការលួចទាញយកទិន្នន័យពីកម្មវិធីណាមួយនោះ នាយកដ្ឋានប្រឆាំងបទល្មើសបច្ចេកវិទ្យា សូមឱ្យលោកអ្នកទាញយកតែកម្មវិធីណាដែលលោកអ្នកត្រូវការ ហើយលុបកម្មវិធីទាំងនោះចោលវិញ នៅពេលដែលលោកអ្នកឈប់ប្រើប្រាស់ ព្រោះកម្មវិធីខ្លះ នៅតែមានដំណើការរហូត បើទោះជាលោកអ្នកឈប់ប្រើវាហើយក៏ដោយ៕
ប្រភព៖ នាយកដ្ឋានប្រឆាំងបទល្មើសបច្ចេកវិទ្យា
