ភ្នំពេញៈ ក្រោយពីក្រសួងវប្បធម៌ និងវិចិត្រសិល្បៈចេញបម្រាមមួយឆ្នាំក្នុងការហាមឃាត់ក្រុមហ៊ុន ឬផលិតកម្មនានា មិនឲ្យទទួលតារាសម្តែងស្រីសិចស៊ីទើបតែរះក្នុងសិល្បៈនាង ដេននី ក្វាន់ នោះ ក៏ស្រាប់តែមានសារមួយឃ្លាចេញពីគណនីហ្វេសប៊ុករបស់លោក ខៀវ កាញារិទ្ធ ជារដ្ឋមន្រ្តីក្រសួងព័ត៌មាន បង្ហាញពីចំណាប់អារម្មណ៍ផ្ទាល់ខ្លួន មានខ្លឹមសារវែកញែករកភាពយុត្តិធម៌ឲ្យតួស្រីនេះគួរឲ្យភ្ញាក់ដល់មហាជន និងសាមីខ្លួននាងទៀតផង។
ចេញពីគណនីហ្វេ ប៊ុករបស់លោក ខៀវ កាញារិទ្ធ ជារដ្ឋមន្រ្តីក្រសួងព័ត៌មានសរសេរថា៖ «ខ្ញុំមិនដែលស្គាល់នាងទេ ហើយក៏មិនឈឺក្បាលរឿងនាងស្លៀកពាក់នៅក្រៅឆាកដែរ តែការហាមឃាត់ការសំដែង របស់នាងត្រូវមានភស្តុតាងច្បាស់លាស់ (ក្រោយការណែនាំហើយ)» ដែលបង្ហោះអមដោយលិខិតផ្លូវការមួយពីក្រសួងវប្បធម៌ទៅឲ្យក្រសួងរបស់ព័ត៌មានសហការនាដើមខែឧសភានេះ។
កញ្ញា ដេននី ក្វាន់ មានស្រុកកំណើតមកពីខេត្តព្រះវិហារប្រាប់ពីអារម្មណ៍ដែរថា៖ «ខ្ញុំយល់ថា លោកពូរដ្ឋមន្រ្តីយោបល់ត្រឹមត្រូវព្រោះខ្សែភាពយន្តរបស់នាងខ្ញុំបានថតមានតែពីររឿងគត់ ខណៈមួយបានចាក់បញ្ចាំងតាមទូរទស្សន៍ហើយ និងមួយរឿងទៀតមិនទាន់ចាក់បញ្ចាំងទេ។ រឿងទាំងពីរដែលបានថតសុទ្ធតែមិនមានឈុតអ្វីបង្ហាញភាពសិចស៊ីប៉ះពាល់នោះទេ ខណៈ MV បទចម្រៀងនាងខ្ញុំក៏ដូចគ្មានដែរ»៕
