នៅថ្ងៃ28 ខែកក្កដា ឆ្នាំ២០២០ នេះ គេមើលឃើញថា តារាចម្រៀងបែបយុវវ័យ លោក វង្ស ថាណាន់ សំឡេងមានទឹកដមពូកែច្រៀងបានគ្រប់ប្រភេទបទនោះ ខណៈនេះលោកសម្រេចចិត្តចូលផលិតកម្ម Galaxy Navatra ជាផ្លូវការហើយ បន្ទាប់ពីគេមើលឃើញតារាចម្រៀងល្បីនៅថោន ខេម នាំមុខមុនលោក។
បទថ្មីដែលទើបតែចេញក្ដៅៗហុយៗមានចំណងជើងថា«ស្នេហ៍ក្រៅផ្លូវការ» ត្រូវបានម្ចាស់បទ លោក វង្ស ថាណាន់ បានទម្លាយអារម្មណ៍ពិតថាការសម្រេចចិត្តដើរចូលផលិតកម្ម Galaxy Navatra គឺមានមូលហេតុតែមួយគត់ គឺលោកចង់មានទ្រនំមួយច្បាស់លាស់ និងមានភាពកក់ក្រៅក្នុងចិត្ត ត្បិតអី Galaxy Navatra បច្ចុប្បន្នកំពុងតែមានសន្ទុះ ទទួលបានការគាំទ្រខ្លាំងពីមហាជន ព្រោះរាល់បទចម្រៀងដែលចេញមក ដឹងតែមានការពេញចិត្តពីទស្សនិកជន មិនថាជាប្រភេទមនោសញ្ចេតនា ញាក់កន្ត្រាក់អារម្មណ៍ និងបទបែបចង្វាក់ប្រពៃណីឡើយ។
គួរបញ្ជាក់ផងដែរថា កន្លងមកអតីតបេក្ខភាពប្រលងកម្មវិធី Cambodian Idol រដូវកាលទី2 រូបនេះ ធ្លាប់បង្ហាញមុខក្នុងអឹមវីក្នុងផលិតកម្ម Galaxy Navatra តាមរយៈបទ «អារម្មណ៍ Sad»របស់តារាស្រី តន់ ច័ន្ទសីម៉ា រួចម្ដងហើយ។ ដោយឡែកថ្មីៗនេះ ខាងផលិតកម្មទើបតែបញ្ចេញបទទោលរបស់លោក ដើម្បីបង្ហាញពីការបើកទំព័រចម្រៀងថ្មីក្នុងផលិតកម្ម៕
