ក្រុមហ៊ុន Foxconn និងស្ថាបនិក Terry Gou បានសុំច្បាប់អាជ្ញាធរកោះតៃវ៉ាន់ ដើម្បីចេញប្រាក់ផ្ទាល់ខ្លួន ទិញវ៉ាក់សាំងបង្ការ Covid-19 ចំនួន 5លានដូស ដើម្បីចាក់ជូនពលរដ្ឋនៃកោះនេះ។
សំណើររបស់មហាសេដ្ឋី Terry Gou ត្រូវបានធ្វើឡើងកាលពីថ្ងៃទី1 ខែមិថុនា។ ចំណែកវ៉ាក់សាំងដែលលោកមានបំណងទិញ នោះគឺ BioNTech របស់អាល្លឺម៉ង់។ ក្រោយការទិញបាន វ៉ាក់សាំងទាំងនោះនឹងត្រូវបានបែងចែក និងចាក់ជូនពលរដ្ឋតៃវ៉ាន់ ក្នុងគ្រាដែលកោះនេះ កំពុងប្រឈមនឹងការកើនឡើងខ្លាំងនៃករណីឆ្លងវីរុសCovid-19។
សំណើររបស់ស្ថាបនិកក្រុមហ៊ុន Foxconn នេះ ក៏យោងទៅតាមការបើកភ្លើងខៀវ ពីអាជ្ញាធរកោះតៃវ៉ាន់ ដែលថា អង្គការសាសនា និងអាជ្ញាធរមូលដ្ឋាន មានសិទ្ធិរៀបចំការនាំចូលវ៉ាក់សាំង បើសិនជាមានលក្ខខណ្ឌសមស្រប។
លោក Terry Gou សង្ឃឹមថា នឹងបញ្ជូនវ៉ាក់សាំង BioNTech ពីប្រទេសអាល្លឺម៉ង់ ឆ្ពោះត្រង់មកកោះតៃវ៉ាន់ ដោយ «មិនឆ្លងកាត់អន្តរការី ឬភាគីកណ្ដាលណាមួយឡើយ»។ មហាសេដ្ឋីរូបនេះ ក៏បានបញ្ជាក់ថា លោកបានផ្ដល់ឯកសារទាំងអស់ដែលអាជ្ញាធរត្រូវការ។
រដ្ឋមន្ត្រីក្រសួងសុខាភិបាលតៃវ៉ាន់ លោក Chen Shih-chung បានសំដែងការដឹងគុណចំពោះមហាសេដ្ឋី Terry Gou និងបានប្រាប់ថា អាជ្ញាធរ កំពុងត្រួតពិនិត្យលើពាក្យសុំនាំចូលវ៉ាក់សាំងរបស់លោក។
ក្រៅពី Foxconn នៅមានស្ថាប័នជាច្រើនផ្សេងទៀត ដែលស្នើសុំនាំចូលវ៉ាក់សាំងបង្ការ Covid-19 មកកាន់តៃវ៉ាន់ ក្នុងនោះមានដូចជា សម្ព័ន្ធសមាគមព្រះពុទ្ធសាសនាអន្តរជាតិរបស់តៃវ៉ាន់។ល។
គិតមកដល់ថ្ងៃទី2 ខែមិថុនានេះ កោះតៃវ៉ាក់ បានរកឃើញអ្នកឆ្លង Covid-19 ចំនួន 9,389នាក់ ក្នុងនោះមានអ្នកស្លាប់ចំនួន 149នាក់, ជាសះស្បើយ 1,133នាក់ និងកំពុងព្យាបាល 8,107នាក់។
តៃវ៉ាន់ បានបញ្ជាទិញវ៉ាក់សាំងរាប់លានដូស ពី AstraZeneca, Moderna រួមនឹងក្រុមហ៊ុនក្នុងស្រុកចំនួនពីរផ្សេងទៀត។ ចំណែក កិច្ចព្រមព្រៀងជាមួយ BioNTech ត្រូវជួបឧបសគ្គ ដោយសារតែមានការរារាំងពីចិនដីគោក។ នេះបើតាមមេដឹកនាំកោះតៃវ៉ាន់ លោកស្រី Tsai Ing-wen៕
ប្រភព៖ Reuters
ប្រែសម្រួល៖ បុត្រា