ហ្គីណេ៖ មេដឹកនាំកងទ័ពរដ្ឋប្រហារ បានឱ្យដឹងថា ក្រុមនេះកំពុងឃុំខ្លួនប្រធានាធិបតីដែលត្រូវបានទម្លាក់ពីអំណាច Alpha Conde នៅក្នុងពន្ធនាគារយោធា។
ក្រោយរដ្ឋប្រហារយោធាកាលពីថ្ងៃទី 5 កញ្ញា ប្រធានាធិបតីប្រទេសហ្គីណេ លោក Alpha Conde មិនបានបង្ហាញខ្លួនជាសាធារណៈ និងពុំទាន់ត្រូវបានគេដឹងច្បាស់ថា កំពុងស្ថិតនៅទីណាឱ្យប្រាកដនៅឡើយ។ ប៉ុន្តែ ថ្មីៗនេះ នៅលើបណ្ដាញសង្គម គេឃើញមានរូបថតរបស់លោក Conde ក្នុងសម្លៀកបំពាក់អាវសាមី ខៅខូវប៊យ អង្គុយលើកៅអីសាឡុង ខណៈនៅជុំវិញគឺជាក្រុមប្រដាប់អាវុធ។ Doumbouya មេដឹកនាំរដ្ឋប្រហារ និងជាមេបញ្ជាការកងកម្លាំងពិសេសរបស់ ហ្គីណេ ក្រោយមកក៏បានទទួលស្គាល់ថា ពួកគេកំពុងឃុំខ្លួន Conde។
កងកម្លាំងរដ្ឋប្រហារបានឱ្យដឹងថា ប្រធានាធិបតី Conde កំពុងត្រូវបានឃុំខ្លួននៅក្នុងពន្ធនាគារយោធា នេះបើតាមសារព័ត៌មាន Guardian ដែលបានចេញផ្សាយកាលពីថ្ងៃទី 6 កញ្ញា។ ក្រៅពីលោក Conde កម្លាំងរដ្ឋប្រហារក៏បានចាប់ខ្លួនមន្ត្រីជាន់ខ្ពស់នៃរដ្ឋាភិបាល ហ្គីណេ ជាច្រើនរូបផងដែរ។
Doumbouya កាលពីថ្ងៃទី 5 កញ្ញា បានប្រកាសរំលាយរដ្ឋធម្មនុញ្ញ រំលាយរដ្ឋាភិបាល បិទព្រំដែន និងដាក់បម្រាមគោចរ 24 ម៉ោង។ អ្នកទោសនយោបាយទាំងអស់នឹងត្រូវបានដោះលែង ហើយដំណើរការនៃប្រគល់អំណាចដែលអូសបន្លាយ 18 ខែ នឹងត្រូវបានចាប់ផ្ដើម ក្រោមការគ្រប់គ្រងរបស់គណៈកម្មការផ្សះផ្សា និងអភិវឌ្ឍជាតិថ្មី។
«បើសិនជាប្រជាជនត្រូវក្រុមអ្នកមានអំណាចកៀបសង្កត់ កងទ័ពត្រូវតែចេញមុខផ្ដល់សេរីភាពដល់ប្រជាជន» វរសេនីយឯក Doumbouya សង្កត់ធ្ងន់ដូច្នេះ។
មេដឹកនាំកងកម្លាំងរដ្ឋប្រហារ កាលពីថ្ងៃទី 6 កញ្ញា បានកោះហៅរដ្ឋមន្ត្រី និងមេដឹកនាំស្ថាប័នទាំងឡាយរបស់រដ្ឋាភិបាលចាស់មកចូលរួមប្រជុំ ហើយបានព្រមានដល់អ្នកដែលមិនបានចូលរួមថា នឹងត្រូវបានចោទពីបទ «បះបោរ»។ នៅក្នុងកិច្ចប្រជុំ ក្រុមមេដឹកនាំរដ្ឋប្រហារប្រកាសថា អតីតរដ្ឋមន្ត្រីទាំងអស់មិនត្រូវបានកំណត់ជាគោលដៅនោះទេ ប៉ុន្តែ ត្រូវប្រគល់មធ្យោបាយទាំងអស់របស់រដ្ឋាភិបាល និងមិនត្រូវចាកចេញពីប្រទេស ពេលមិនទាន់មានការអនុញ្ញាត។
ហ្គីណេ គឺជាប្រទេសក្រីក្របំផុតមួយរបស់ពិភពលោក បើទោះជាមានធនធានធម្មជាតិសម្បូរបែប។ ប្រទេសនេះ កំពុងជួបវិបត្តិនយោបាយយ៉ាងធ្ងន់ធ្ងរ។ រដ្ឋប្រហារយោធាថ្មីបំផុត បានធ្វើឱ្យក្រឡាប់ចាក់អំណាចរបស់ប្រធានាធិបតី Conde ដែលបានគ្រប់គ្រងប្រទេសរយៈពេល 11 ឆ្នាំមកនេះ។
ប្រទេសជាច្រើនបានថ្កោលទោសចំពោះរដ្ឋប្រហារនេះ។ «អំពើហិង្សា និងច្បាប់ទាំងឡាយណាក្រៅពីរដ្ឋធម្មនុញ្ញ សុទ្ធតែធ្វើឱ្យប៉ះពាល់ដល់ក្ដីសង្ឃឹមដែលថា ហ្គីណេ នឹងប្រកបដោយសន្តិភាព ស្ថិរភាព និងរីកចម្រើន» អ្នកនាំពាក្យរបស់ក្រសួងការបរទេស សហរដ្ឋអាមេរិក Ned Price និយាយដូច្នេះ និងបានអំពាវនាវឱ្យគ្រប់ភាគីគោរពច្បាប់។
សហភាពអាហ្វ្រិក និងអង្គការសហប្រជាជាតិ សុទ្ធតែបានអំពាវនាវឱ្យដោះលែងប្រធានាធិបតី Conde។ សហគមន៍សេដ្ឋកិច្ចនៃបណ្ដារដ្ឋអាហ្វ្រិកខាងលិច (Economic Community of West African States) បានគំរាមថានឹងដាក់ទណ្ឌកម្ម បើសិន ហ្គីណេ មិនស្ការរដ្ឋធម្មនុញ្ញឡើងវិញ៕
