រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិរបស់ កម្ពុជា ឯកឧត្តម ប្រាក់ សុខុន និងគណៈប្រតិភូ បានអញ្ជើញទៅដល់ទីក្រុង ហាងចូវ ប្រទេសចិន ដើម្បីបំពេញទស្សនកិច្ចផ្លូវរដ្ឋរយៈពេល ៣ ថ្ងៃ។
នៅក្នុងដំណើរទស្សនកិច្ចនេះ រដ្ឋមន្ត្រីការបរទេសកម្ពុជា នឹងមានជំនួបជាមួយរដ្ឋមន្ត្រីការបរទេសចិន លោក វ៉ាង យី (Wang Yi) ដើម្បីពិភាក្សាអំពីទំនាក់ទំនងទ្វេភាគី និងកិច្ចសហប្រតិបត្តិការក្នុងវិស័យផ្សេងៗ រវាង កម្ពុជា និងប្រទេសចិន ក្នុងនោះក៏មានវិស័យសេដ្ឋកិច្ច ទេសចរណ៍ កសិកម្ម ពាណិជ្ជកម្ម និងការពារជាតិ រួមទាំងបញ្ហារួមមួយចំនួនដែលប្រទេសទាំងពីរកំពុងមានការព្រួយបារម្ភ។
ក្រសួងការបរទេសកម្ពុជា យល់ថា ដំណើរទស្សនកិច្ចលើកនេះនឹងជួយបង្កើនទំនាក់ទំនងភាពជាដៃគូយុទ្ធសាស្ត្រពេញលេញ មិត្តភាពជាប្រពៃណីយូរអង្វែង សាមគ្គីភាព និងសហប្រតិបត្តិការជាក់លាក់ ក៏ដូចជាការជំរុញកិច្ចសហការក្នុងក្របខណ្ឌពហុប៉ូល ដើម្បីផលប្រយោជន៍របស់ប្រជាជននៃប្រទេសទាំងពីរ។
ទស្សនកិច្ចលើកនេះរបស់រដ្ឋមន្ត្រីក្រសួងការបរទេសកម្ពុជា ត្រូវបានធ្វើឡើងដើម្បីឆ្លើយតបនឹងការអញ្ជើញរបស់ ឯកឧត្តម វ៉ាង យី ដែលជាទីប្រឹក្សារដ្ឋ និងជារដ្ឋមន្ត្រីក្រសួងការបរទេសចិន។ ដំណើរទស្សនកិច្ចនេះ រយៈពេល ៣ ថ្ងៃ រាប់ចាប់ពីថ្ងៃទី ៣ ដល់ថ្ងៃទី ៥ ខែធ្នូ ឆ្នាំ ២០២១៕
