ក្រុមប្រឹក្សាសន្តិសុខនៃ អង្គការសហប្រជាជាតិ បានសម្ដែងការព្រួយបារម្ភយ៉ាងខ្លាំជាលើកដំបូងចំពោះស្ថានការណ៍នៅ អ៊ុយក្រែន ប៉ុន្តែបានចៀសវាងការប្រើពាក្យពេចន៍រិះគន់លើ រុស្ស៊ី។
«ក្រុមប្រឹក្សាសន្តិសុខ សម្ដែងការព្រួយបារម្ភយ៉ាងជ្រាលជ្រៅចំពោះការរក្សាសន្តិភាព និងសន្តិសុខរបស់ អ៊ុយក្រែន» ប្រកាសរបស់ក្រុមប្រឹក្សាសន្តិសុខនៃ អង្គការសហប្រជាជាតិ កាលពីថ្ងៃទី ៦ ឧសភា មានឃ្លាលើកឡើងដូច្នេះ ។ «ក្រុមប្រឹក្សាសន្តិសុខរំលឹកឡើងវិញថា យោងតាមធម្មនុញ្ញនៃអង្គការសហប្រជាជាតិ ប្រទេសជាសមាជិកទាំងអស់ សុទ្ធតែមានកាតព្វកិច្ចដោះស្រាយជម្លោះអន្តរជាតិដោយសន្តិវិធី»។
នេះគឺជាលើកដំបូងហើយដែល ក្រុមប្រឹក្សាសន្តិសុខ នៃ អង្គការសហប្រជាជាតិដែលមានសមាជិកចំនួន ១៥ ក្នុងនោះមានសមាជិកអចិន្ត្រៃយ៍ចំនួន ៥ គឺ សហរដ្ឋអាម៉េរិក រុស្ស៊ី អង់គ្លេស បារាំង និង ចិន ប្រកាសអំពីស្ថានការណ៍នៅ អ៊ុយក្រែន រាប់ចាប់តាំងពី មូស្គូ បានបើកយុទ្ធនាការយោធាពិសេសកាលពីចុងខែកុម្ភៈ។
រុស្ស៊ី បានប្រើសិទ្ធិវេតូ (veto) ដើម្បីទប់ស្កាត់ ក្រុមប្រឹក្សាសន្តិសុខ អនុម័តប្រកាសស្ដីពី អ៊ុយក្រែន នាពេលកន្លង។ ដើម្បីត្រូវបានអនុម័ត សេចក្ដីសម្រេចរបស់ក្រុមប្រឹក្សានេះត្រូវការសំឡេងគាំទ្រយ៉ាង ៩ និងមិនត្រូវបានប្រទេសណាមួយក្នុងចំណោមសមាជិកអចិន្ត្រៃយ៍ ជំទាស់។
Juan Ramon De La Fuente ឯកអគ្គរដ្ឋទូតរបស់ ម៉ិកស៊ិក ប្រចាំនៅ អង្គការសហប្រជាជាតិ ដែលជាប្រទេសមួយបានជួយធ្វើសេចក្ដីព្រាងនៃសេចក្ដីប្រកាសដែលត្រូវបានអនុម័តកាលពីថ្ងៃទី ៦ ឧសភា យល់ថា នេះគឺជា «ជំហានសាមញ្ញដំបូង ប៉ុន្តែវានឹងគូសវាសផ្លូវដើរត្រឹមត្រូវ» នៅពេលត្រូវបានសួរថា ហេតុអ្វី ក្រុមប្រឹក្សាសន្តិសុខត្រូវចំណាយពេលរហូត ២ ខែ ដើម្បីធ្វើសេចក្ដីព្រាងនៃប្រកាសមួយនេះ។
