ករណី​ជះ​ទឹក​ថ្នាំលាប​លើ​ឯកអគ្គរដ្ឋទូត​រុស្ស៊ី! រដ្ឋមន្ត្រី​មហាផ្ទៃ​ប៉ូឡូញ ថា អាច​យល់បាន​នូវ​អារម្មណ៍​របស់​បាតុករ

រដ្ឋមន្ត្រីក្រសួងមហាផ្ទៃរបស់ ប៉ូឡូញ លោក Mariusz Kaminski (ស្ដាំ)

ខណៈដែល​រដ្ឋមន្ត្រីក្រសួង​ការបរទេស​ប៉ូឡូញ រិះគន់​លើ​ករណី​បាតុករ​ជះ​ទឹក​ថ្នាំលាប​លើ​ឯកអគ្គរដ្ឋទូត​រុស្ស៊ី Andreev រដ្ឋមន្ត្រី​ក្រសួងមហាផ្ទៃ​ប៉ូឡូញ ឯណោះ​វិញ បែរជា​និយាយថា គេ​អាច​យល់បាន​នូវ​អារម្មណ៍​របស់​ក្រុមបាតុករ​នាពេលនោះ។

«ក្រុម​អ្នកការទូត​ត្រូវតែ​ទទួលបាន​នូវ​ការការពារ​ពិសេស បើទោះជា​គោលនយោបាយ​ដែល​រដ្ឋាភិបាល​របស់​ពួកគេ​កំពុង​អនុវត្ត​បែបណាក៏ដោយ» រដ្ឋមន្ត្រីការបរទេស​ប៉ូឡូញ Zbigniew Rau លើកឡើង​ដូច្នេះ បន្ទាប់ពី​មាន​ករណី​ក្រុមបាតុករ​​ជះ​​ទឹក​​ថ្នាំ​លាប​​លើ ឯកអគ្គរដ្ឋទូត​រុស្ស៊ី លោក Sergei Andreev នៅ រដ្ឋ​ធានា Warsaw កាលពី​ថ្ងៃទី ៩ ឧសភា។ រដ្ឋមន្ត្រីការបរទេស​ប៉ូឡូញ បាន​ហៅ​ទង្វើ​នេះ​ថា​ជាហេតុ​ការណ៍ «អាក្រក់​ជាទីបំផុត»។

Advertisement

ក៏ប៉ុន្តែ អ្នកនាំពាក្យ​របស់​រដ្ឋា​ភិ​បាល​ប៉ូឡូញ លោក Lan Piotr Muller កាលពី​ថ្ងៃទី ១០ ឧសភា បានឱ្យដឹងថា «អាច​យល់បាន» នូវ​ការផ្ទុះ​កំហឹង​របស់​ក្រុមបាតុករ​ដែល​បាន​ជះ​ទឹក​ថ្នាំលាប​លើ ឯកអគ្គរដ្ឋទូត​រុស្ស៊ី Andreev ហើយ​ថា «មិនមាន​មូលហេតុ​ណាមួយ​ដែល​គួរ​រិះគន់​ទង្វើ​របស់​ពួកគេ​ឡើយ»។

រដ្ឋមន្ត្រី​ក្រសួងមហាផ្ទៃ​របស់ ប៉ូឡូញ លោក Mariusz Kaminski ក៏បាន​បង្ហោះ​សារ​នៅលើ Twitter ថា «ការប្រមូលផ្ដុំ​របស់​ក្រុមប្រឆាំង​យុទ្ធនាការ​យោធា​របស់ រុស្ស៊ី នៅ អ៊ុយ​ក្រែ​ន គឺជា​រឿង​ស្របច្បាប់​ទាំងស្រុង។ អារម្មណ៍​របស់​ក្រុម ស្ត្រី​អ៊ុយ​ក្រែ​ន ដែល​បាន​ចូលរួម​ធ្វើបាតុកម្ម ជា​អ្នក​ដែលមាន​ស្វាមី​កំពុង​ប្រយុទ្ធ​ដើម្បី​ការពារ​ទឹកដី គឺជា​ប្រការ​ដែល​ងាយ​យល់»។

Advertisement