កូរ៉េខាងជើង ឱ្យដឹងថា បានរកឃើញមនុស្សរាប់សែននាក់ដែលមានរោគសញ្ញាក្ដៅខ្លួន ក្នុងនោះមាន ៦ នាក់បានស្លាប់ ហើយក្នុងចំណោមនោះដែរ មាន ១ ករណី ស្លាប់ដោយសារឆ្លង អូមីក្រុង។
«ករណីក្ដៅខ្លួនខ្លាំងដោយមិនដឹងមូលហេតុ បានផ្ទុះឡើងនៅទូទាំងប្រទេស ចាប់ពីចុងខែមេសា។ ដោយឡែកក្នុងថ្ងៃទី ១២ ឧសភា មនុស្សប្រហែល ១៨,០០០ នាក់ មានអាការក្ដៅខ្លួនត្រូវបានរកឃើញនៅទូទាំងប្រទេស» ទីភ្នាក់ងារសារព័ត៌មានរដ្ឋកូរ៉េខាងជើង KCNA បានផ្សាយដូច្នេះ។
KCNA ក៏បានឱ្យដឹងថា មនុស្ស ៦ នាក់បានបាត់បង់ជីវិត ក្នុងនោះមានម្នាក់គឺជាករណីវិជ្ជមាននឹង កូវីដ-១៩ ប្រភេទអូមីក្រុង។
បច្ចុប្បន្ន មិនទាន់ដឹងច្បាស់ថា អ្នកដែលបានស្លាប់ផ្សេងទៀតគឺជាករណីឆ្លងជំងឺកូវីដ-១៩ ឬយ៉ាងណានៅឡើយ។
ព័ត៌មាននេះត្រូវបានចុះផ្សាយមួយថ្ងៃបន្ទាប់ពី កូរ៉េខាងជើង បញ្ជាក់ថា មានករណីឆ្លងកូវីដ-១៩ ដំបូង ហើយថា ប្រទេសនេះកំពុងអនុវត្តវិធានការទប់ស្កាត់យ៉ាងតឹងរ៉ឹងបំផុត។