ក្រុមហ៊ុនការពារជាតិ Rheinmetall ប្រកាសបង្ហាញរថក្រោះ KF៥១ Panther ដែលត្រូវបានធ្វើទំនើបកម្មជាច្រើនទៅលើប្រព័ន្ធកាំភ្លើងធំ និងប្រព័ន្ធការពារខ្លួន ដើម្បីជំនួសឱ្យស៊េរី Leopard ២ របស់ អាល្លឺម៉ង់។
ពិធីបង្ហាញកំពូលរថក្រោះ KF៥១ Panther ត្រូវបានរៀបចំធ្វើឡើងនៅក្នុងព្រឹត្តិការណ៍តាំងពិព័រណ៍ឧស្សាហកម្មការពារជាតិ Eurosatory នៅក្នុង រដ្ឋធានីប៉ារីស របស់ ប្រទេសបារាំង កាលពីថ្ងៃទី ១៣ ខែមិថុនា។ ក្រុមហ៊ុនការពារជាតិរបស់ អាល្លឺម៉ង់ Rheinmetall ឱ្យដឹងថា នេះគឺជាគម្រោងវិនិយោគឯកជន ក្នុងគោលបំណងអភិវឌ្ឍកំណែរថក្រោះបន្ទាប់របស់ស៊េរី Leopard ២ នៅក្នុងជួរកងទ័ពអាល្លឺម៉ង នាបច្ចុប្បន្ន ក៏ដូចជាទាក់ទាញអតិថិជននៅ អឺរ៉ុប។
Panther ក៏ជាឈ្មោះរបស់រថក្រោះមួយប្រភេទក្នុងចំណោមរថក្រោះលំដាប់មធ្យមដ៏ល្បីឈ្មោះរបស់ អាល្លឺម៉ង់ កាលពីសម័យសង្គ្រាមលោកលើកទី ២ ដែលមានជាង ៦,០០០ គ្រឿងត្រូវបានផលិត។
Rheinmetall មិនទាន់ប្រកាសព័ត៌មានលម្អិតអំពីមុខងារយុទ្ធសាស្ត្រនានារបស់ KF៥១ Panther ប៉ុន្តែ ឱ្យដឹងថា វាមានទម្ងន់ប្រហែល ៦៥ តោន ស្រាលជាងឆ្ងាយធៀបនឹងបណ្ដារថក្រោះយុទ្ធសាស្ត្ររបស់ បស្ចិមលោកនាពេលបច្ចុប្បន្ន។ KF៥១ Panther ត្រូវបានបំពាក់ម៉ាស៊ីនម៉ាស៊ូតកម្លាំង ១,៤៧៥ សេះ។
កាំភ្លើងធំរបស់ KF៥១ Panther ដែលមានកាណុង ១៣០ មម បច្ចុប្បន្នកំពុងស្ថិតក្នុងដំណាក់កាលអភិវឌ្ឍ។ នាយកប្រតិបត្តិរបស់ Rheinmetall លោក Armin Papperger ឱ្យដឹងថា កាំភ្លើងធំ ១៣០ មម មាន «ប្រសិទ្ធភាពខ្ពស់ជាង ៥០% និងបាញ់បានឆ្ងាយជាងច្រើន» ធៀបនឹងកាំភ្លើងធំ ១២០ មម នៅលើ ស៊េរី Leopard ។
រថក្រោះនេះ តាមគម្រោងនឹងត្រូវបានបំពាក់កាំភ្លើងយន្ត ១២.៧ មម និងប្រព័ន្ធអាវុធដែលអាចបញ្ជាពីចម្ងាយ រួមនឹងកន្លែងសម្រាប់ដាក់យន្តហោះគ្មានមនុស្សបើក (UAV), គ្រាប់កាំភ្លើង HERO ១២០ និង មីស៊ីលមួយចំនួនដែលមិនទាន់ត្រូវបានប្រកាសឱ្យដឹង។
ក្រុមហ៊ុនខាងលើអះអាងថា ក្រុមប្រយុទ្ធរបស់រថក្រោះនេះនឹងត្រូវបានការពារសុវត្ថិភាពខ្ពស់ជាង ធៀបនឹង Leopard 2 ដោយមានបច្ចេកវិទ្យាការពារខ្លួនបែបសកម្ម អកម្ម និងដែកការពារពិសេស។
KF៥១ Panther ដាក់មនុស្សបាន ៣ នាក់ រួមមាន ប្រធានក្រុម អ្នកបើកបរ និងខ្មាន់កាំភ្លើងធំ ដោយសារតែមានប្រព័ន្ធបញ្ចូលគ្រាប់ស្វ័យប្រវត្តិសម្រាប់កាំភ្លើងធំ។ ប៉ុន្តែ រថក្រោះនេះក៏អាចដាក់មនុស្សបានម្នាក់បន្ថែមទៀត ដែលអាចមានតួនាទីជាមេបញ្ជាការក្រុមរថក្រោះ ឬអ្នកកាន់ UAV៕
