ឧត្តមសេនីយ៍ Kivinen អះអាងថា ហ្វាំងឡង់ បានប្រុងប្រៀបរួចរាល់ហើយសម្រាប់កាលៈទេសៈដែលត្រូវបាន រុស្ស៊ី វាយប្រហារ ហើយថា «នឹងវាយបកយ៉ាងខ្លាំងក្លា»។
«យើងបានអភិវឌ្ឍប្រព័ន្ធការពារយោធារបស់យើង ដែលមានជំនាញក្នុងការទប់ទល់នឹងប្រភេទសង្គ្រាមដូចដែលកំពុងត្រូវបានធ្វើឡើងនៅ អ៊ុយក្រែន ជាមួយនឹងការវាយប្រហារជាហ្វូងតាមផ្លូវអាកាស ការបង្កើនចំនួនរថពាសដែក និងទ័ពអាកាស» ឧត្តមសេនីយ៍ Timo Kivinen មេបញ្ជាការកងកម្លាំងស្វ័យការពាររបស់ ហ្វាំងឡង់ កាលពីថ្ងៃទី ២២ មិថុនា បានថ្លែងដូច្នេះ។ លោកបន្ថែមថា «អ៊ុយក្រែន គឺជាតំបន់ដែលមានការលំបាកសម្រាប់ រុស្ស៊ី ហើយ ហ្វាំងឡង់ ក៏ដូច្នេះ។
លោក Kivinen អះអាងថា ហ្វាំងឡង់ បានប្រុងប្រៀបរួចរាល់ហើយសម្រាប់កាលៈទេសៈដែលត្រូវរងការវាយប្រហារពី រុស្ស៊ី ហើយថា នឹងវាយបកយ៉ាងចាស់ដៃ បើសិនប្រការនេះកើតឡើង។ ឧត្តមសេនីយ៍រូបនេះបញ្ជាក់ថា ប្រទេសហ្វាំងឡង់ មានកម្លាំងប្រយុទ្ធ ក៏ដូចជាបានកសាងឃ្លាំងអាវុធច្រើនគួរសម។
ទាក់ទិននឹងការលើកឡើងរបស់ឧត្តមសេនីយ៍ Kivinen ភាគីខាងរុស្ស៊ី មិនទាន់មានប្រតិកម្មអ្វីនៅឡើយ។
ការអះអាងរបស់មន្ត្រីជាន់ខ្ពស់នៃ ប្រទេសហ្វាំងឡង់ ខាងលើ ត្រូវបានលើកឡើងក្នុងគ្រាដែលទំនាក់ទំនងរវាង ប្រទេសនេះ និង រុស្ស៊ី កំពុងមានភាពតានតឹងខ្លាំង ក្រោយពី ហ្វាំងឡង់ និង ស៊ុយអែត បានដាក់ពាក្យសុំចូលជាសមាជិករបស់សម្ព័ន្ធមិត្តយោធាណាតូ កាលពីថ្ងៃទី ១៨ ឧសភា។
