សភាកាណាដា បានយល់ព្រមឱ្យ ហ្វាំងឡង់ និង ស៊ុយអែត ក្លាយជាសមាជិករបស់ អង្គការណាតូ បន្ទាប់ពីសម្ព័ន្ធយោធានេះចាប់ផ្ដើមដំណើរការអនុម័ត។
«កាណាដា បានក្លាយជាប្រទេសដំបូងគេដែលបានអនុម័តលើពិធីសារសុំចូលជាសមាជិកណាតូ របស់ ហ្វាំងឡង់ និង ស៊ុយអែត។ ប្រការនេះបានជួយឱ្យប្រទេសទាំងពីរ ឆ្ពោះទៅក្បែរឋានៈជាសមាជិក» នាយករដ្ឋមន្ត្រីកាណាដា Justin Trudeau ប្រកាសកាលពីថ្ងៃទី ៥ កក្កដាដូច្នេះ។
«ក្នុងនាមជាមិត្តម្នាក់ និងជាដៃគូសហការសន្តិសុខជិតស្និទ្ធ កាណាដា គាំទ្រពេញទំហឹងចំពោះ ហ្វាំងឡង់ និង ស៊ុយអែត ចូលជាសមាជិកណាតូ» លោក Justin Trudeau បន្ថែម។
កាលពីថ្ងៃទី ៥ កក្កដា អគ្គលេខាធិការនៃ អង្គការណាតូ លោក Jens Stoltenberg បានចុះហត្ថលេខាលើពិធីសារ ចាប់ផ្ដើមដំណើរការអនុម័តលើការបញ្ចូល ហ្វាំងឡង់ និង ស៊ុយអែត ជាសមាជិក។ ការបញ្ចូលជាសមាជិកនេះត្រូវការការយល់ព្រមពីសភារបស់ប្រទេសទាំង ៣០ ដែលជាសមាជិករបស់ ណាតូ ហើយដំណើរការនេះនឹងមិនដូចគ្នាឡើង នៅក្នុងប្រទេសនីមួយ។
ដំណើរការនៃការអនុម័តខាងលើនេះ ជាធម្មតា បណ្ដាប្រទេសជាសមាជិកនឹងត្រូវការពេលពីច្រើនខែ រហូតដល់ ១ ឆ្នាំ។ ម៉ាសេដ្វានខាងជើង (North Macedonia) ដែលជាប្រទេសបានចូលជាសមាជិករបស់ ណាតូ ចុងក្រោយគេ ត្រូវរង់ចាំប្រហែល ១ ឆ្នាំ ទើបបានក្លាយជាសមាជិក។
