អវកាសចរ ២ រូបរបស់ រុស្ស៊ី និង អវកាសចរ ១ រូបរបស់ អាម៉េរិក កាលពីថ្ងៃទី ២១ កញ្ញា បានរួមដំណើរជាមួយគ្នា ហោះឡើងទៅកាន់ស្ថានីយអវកាសអន្តរជាតិ នៅក្នុងបេសកកម្មមួយដែលគ្រប់គ្រងដោយទីភ្នាក់ងារអវកាសរុស្ស៊ី (Roscosmos)។
អ្នកអវកាសទាំង ៣ រូបនេះរួមមាន Sergey Prokopyev និង Dmitri Petelin មកពី Roscosmos និង Frank Rubio មកពី NASA។ ពួកគេហោះទៅកាន់ ISS ដោយប្រើប្រាស់រ៉ុក្កែត និងយានអវកាស Soyuz ពីព្រលានយានអវកាស Baikonur នៅ កាហ្សាកស្ថាន កាលពីម៉ោង ១៩ និង ៥៤ នាទី ថ្ងៃទី ២១ កញ្ញា ត្រូវនឹងម៉ោងប្រហែល ២០ និង ៥៤ នាទីនៅ កម្ពុជា។
យាន Soyus បានចូលចតនៅ ISS វេលាម៉ោង ២៣ និង ០៦ នាទីថ្ងៃដដែល (ម៉ោងនៅ កម្ពុជា) ក្រោយការបាញ់បង្ហោះបានប្រហែល ៣ ម៉ោង នេះបើតាម Space។
ជើងហោះហើរនេះគឺជាកិច្ចសហការដ៏កម្ររវាង រុស្ស៊ី និង សហរដ្ឋអាម៉េរិក រាប់ចាប់តាំងពី ប្រធានាធិបតី ពូទីន បានចូលលុកលុយ អ៊ុយក្រែនកាលពីថ្ងៃទី ២៤ កុម្ភៈ ២០២២។
បច្ចុប្បន្ន ISS ពឹងផ្អែកលើប្រព័ន្ធរុញច្រានរបស់ រុស្ស៊ី ដើម្បីរក្សាកម្ពស់ ៤០០ គីឡូម៉ែត្រ ធៀបនឹងផ្ទៃទឹកសមុទ្រ ក្នុងគ្រាដែលក្រុមរបស់ សហរដ្ឋអាម៉េរិក ទទួលខុសត្រូវចំពោះបញ្ហាអគ្គិសនី និងប្រព័ន្ធទ្រទ្រង់ជីវិត។
រុស្ស៊ី និង អាម៉េរិក បានចាប់ផ្ដើមសាងសង់ស្ថានីយអវកាសនៅអំឡុងចុងទសវត្សរ៍ឆ្នាំ ១៩៩០ ហើយប្រការនេះត្រូវបានចាត់ទុកថាជាស្នាដៃប្រវត្តិសាស្ត្រនៃកិច្ចសហប្រតិបត្តិការអន្តរជាតិ ក្រោយបញ្ចប់សង្គ្រាមត្រជាក់ និងការរត់ប្រណាំងផ្នែកអវកាសដែលអូសបន្លាយពេលអស់រាប់ទសវត្សរ៍៕
